2. Déanfaidh na húdaráis réitigh pleananna réitigh a tharraingt suas le haghaidh gnóthais árachais agus athárachais a measann siad ina leith gur dóchúla, i gcomparáid le gnóthais eile faoina sainchúram, go mbeadh an ghníomhaíocht réitigh chun leasa an phobail dá dtagraítear in Airteagal 19(5) i gcás ina gclisfeadh ar an ngnóthas lena mbaineann, nó a measann na húdaráis ina leith go bhfuil feidhm chriticiúil acu. Cuirfear san áireamh sa mheasúnuithe sin, ar a laghad, an gá atá le cuspóirí réitigh a bhaint amach agus méid, samhail ghnó, próifíl riosca, idirnascthacht, inionadaitheacht an ghnóthais agus go háirithe a ghníomhaíocht trasteorann.
Ar bhonn na measúnuithe dá dtagraítear sa chéad fhomhír, áiritheoidh na húdaráis réitigh go mbeidh ar a laghad 40 % de mhargadh árachais agus athárachais saoil an Bhallstáit agus ar a laghad 40 % de mhargadh árachais agus athárachais an Bhallstáit nach árachas saoil é – an sciar den mhargadh árachais saoil bunaithe ar ollfhorálacha teicniúla agus an sciar den mhargadh árachais nach árachas saoil é bunaithe ar ollphréimheanna i scríbhinn – faoi réir cheanglais na pleanála réitigh. Agus leibhéal cumhdaigh an mhargaidh á ríomh, féadfar foghnóthais grúpa a chur san áireamh i gcás ina bhfuil na foghnóthais sin cumhdaithe sa phlean réitigh grúpa.
Ní bheidh gnóthais bheaga neamhchasta faoi réir cheanglais na pleanála réitigh, ach amháin i gcás ina measfaidh an t-údarás réitigh go bhfuil riosca ar leith ag baint le gnóthas mar sin ar an leibhéal náisiúnta nó réigiúnach.