Airteagal 37 Doiciméadacht theicniúil

1.   Déanfaidh monaróirí doiciméadacht theicniúil a tharraingt suas sula gcuirfear an córas RTS ar an margadh nó i mbun seirbhíse agus coinneoidh siad an doiciméadacht sin cothrom le dáta.

2.   Leis an doiciméadacht theicniúil dá dtagraítear i mír 1 den Airteagal seo, léireofar go gcomhlíonann an córas RTS na ceanglais bhunriachtanacha a leagtar amach in Iarscríbhinn II agus cuirfear an fhaisnéis go léir is gá chun measúnú a dhéanamh ar chomhlíontacht an chórais RTS leis na ceanglais sin ar fáil d’údaráis faireachais margaidh. Sa doiciméadacht theicniúil sin, beidh, ar a laghad, na heilimintí a leagtar amach in Iarscríbhinn III, mar aon le tagairt do na torthaí a fhaightear ó thimpeallacht tástála digití Eorpach dá dtagraítear in Airteagal 40.

3.   Déanfar an doiciméadacht theicniúil dá dtagraítear i mír 1 a tharraingt suas i dteanga oifigiúil de chuid an Bhallstáit lena mbaineann nó i dteanga is furasta a thuiscint sa Bhallstát sin. Tar éis iarraidh réasúnaithe a fháil ó údarás faireachais margaidh Ballstáit, cuirfidh an monaróir aistriúchán de na codanna ábhartha den doiciméadacht theicniúil ar fáil i dteanga oifigiúil de chuid an Bhallstáit sin.

4.   I gcás ina n-iarrfaidh údarás faireachais margaidh an doiciméadacht theicniúil nó aistriúchán ar chodanna di ó mhonaróir, soláthróidh an monaróir doiciméadacht theicniúil nó aistriúchán den sórt sin laistigh de 30 lá ó dháta na hiarrata, ach amháin má tá bonn cirt le sprioc-am níos giorra de dheasca riosca tromchúiseach láithreach. Mura gcomhlíonann an monaróir ceanglais mhíreanna 1, 2 agus 3 den Airteagal seo, féadfaidh an t-údarás faireachais margaidh ceangal a chur air tástáil a bheith déanta ag comhlacht neamhspleách ar a chostas féin laistigh de thréimhse shonraithe chun a fhíorú go gcomhlíontar na ceanglais bhunriachtanacha a leagtar síos in Iarscríbhinn II agus na sonraíochtaí comhchoiteanna dá dtagraítear in Airteagal 36.