Airteagal 26 Fógra a thabhairt faoi staidéir

1.   Tabharfaidh oibreoirí gnó fógra don Bhunachar Sonraí d’Fhógraí Staidéir dá dtagraítear in Airteagal 9 den Rialachán seo, gan mhoill, maidir le haon staidéir a ghineann sonraí ceimiceán agus a choimisiúnaíonn siad chun tacú le hiarratas, fógra nó sainchomhad rialála ar tugadh fógra ina leith nó a cuireadh faoi bhráid Údaráis, chomh maith le haon staidéir maidir le ceimiceáin astu féin nó i dtáirgí a choimisiúnaíonn oibreoirí gnó mar chuid de mheasúnú riosca faoi ghníomhartha dlí an Aontais a liostaítear in Iarscríbhinn I, Cuid 1, a ghabhann leis an Rialachán seo. Mar sin féin, ní thabharfaidh oibreoirí gnó fógra don Bhunachar Sonraí d’Fhógraí Staidéir dá dtagraítear in Airteagal 9 den Rialachán seo faoi staidéir a bhfuil fógra le tabhairt ina leith faoi Airteagal 32b de Rialachán (CE) Uimh. 178/2002.

2.   Chun críocha mhír 1, tabharfaidh oibreoirí gnó fógra don Bhunachar Sonraí d’Fhógraí Staidéir dá dtagraítear in Airteagal 9 den Rialachán seo faoi chéannacht na gceimiceán lena mbaineann, teideal agus raon feidhme an staidéir, an tsaotharlann nó saoráid tástála ina ndéantar an staidéar, dátaí tosaithe agus críochnaithe beartaithe, agus, i gcás inarb ábhartha, cé acu atá nó nach bhfuil an staidéar coimisiúnaithe chun cinneadh ECHA a chomhlíonadh de bhun Airteagail 40, 41 nó 46 de Rialachán (CE) Uimh. 1907/2006.

Tráth a choimisiúnaítear staidéar, cuirfidh oibreoirí gnó an tsaotharlann nó an tsaoráid tástála ina ndéantar an staidéar ar an eolas go bhfuil an staidéar faoi réir na hoibleagáide maidir le fógra a thabhairt de bhun mhír 3 den Airteagal seo.

3.   Tabharfaidh saotharlanna agus saoráidí tástála fógra freisin don Bhunachar Sonraí d’Fhógraí Staidéir dá dtagraítear in Airteagal 9 den Rialachán seo, gan mhoill, maidir le haon fhaisnéis dá dtagraítear i mír 2 den Airteagal seo a bhaineann le staidéir coimisiúnaithe ag oibreoirí gnó chun tacú le hiarratas, fógra nó sainchomhad rialála arna gcur in iúl nó arna dtiolacadh d’Údarás, chomh maith le haon staidéir ar cheimiceáin, astu féin nó i dtáirgí, a choimisiúnaíonn siad mar chuid de mheasúnú riosca nó sábháilteachta, faoi ghníomhartha dlí an Aontais a liostaítear in Iarscríbhinn I, Cuid 1, a ghabhann leis an Rialachán seo. Mar sin féin, ní thabharfaidh saotharlanna agus saoráidí tástála fógra don Bhunachar Sonraí d’Fhógraí Staidéir dá dtagraítear in Airteagal 9 den Rialachán seo faoi staidéir a bhfuil fógra le tabhairt ina leith faoi Airteagal 32b de Rialachán (CE) Uimh. 178/2002.

4.   Chun críocha mhír 3 den Airteagal seo, i gcás gach staidéir, tabharfaidh saotharlanna agus saoráidí tástála fógra don Bhunachar Sonraí d’Fhógraí Staidéir dá dtagraítear in Airteagal 9 faoi chéannacht na gceimiceán lena mbaineann, teideal agus raon feidhme an staidéir, dátaí tosaithe agus críochnaithe beartaithe agus ainm an oibreora gnó a choimisiúnaigh an staidéar.

5.   Beidh feidhm ag míreanna 3 agus 4, mutatis mutandis, maidir le saotharlanna agus saoráidí tástála atá suite i dtríú tíortha a mhéid a leagtar amach i gcomhaontuithe ábhartha leis na tríú tíortha sin.

6.   Beidh feidhm ag na hoibleagáidí a leagtar síos i míreanna 1 go 5 ón 2 Samhain 2027.

7.   Féadfaidh na Ballstáit foráil a dhéanamh do dhíolúintí a cheadú ó na hoibleagáidí a leagtar síos i míreanna 1 go 5 le haghaidh staidéir a dhéantar ar mhaithe le cosaint.

I gcás ina bhforáiltear i ngníomh dlí an Aontais a liostaítear in Iarscríbhinn I, Cuid 1, go bhféadfaidh na Ballstáit foráil a dhéanamh do dhíolúintí ó oibleagáidí an ghnímh dlí sin ar mhaithe leis an tslándáil náisiúnta, féadfaidh na Ballstáit foráil a dhéanamh do dhíolúintí ó na hoibleagáidí a leagtar síos i míreanna 1 go 5.

8.   Leagfaidh ECHA, i ndlúthchomhar le EFSA agus i gcomhairle le geallsealbhóirí, síos na socruithe praiticiúla chun an tAirteagal seo a chur chun feidhme.