2.3. Arranġamenti organizzazzjonali

L-awtoritajiet kompetenti għandhom jiżguraw li l-arranġamenti organizzazzjonali tagħhom għat-twettiq tal-SREP jinkludu mill-inqas dan li ġej:

• a. deskrizzjoni tar-rwoli u r-responsabbiltajiet tal-persunal superviżorju tagħhom fir-rigward tat-twettiq tal-SREP, kif ukoll il-linji ta’ rapportar rilevanti, kemm f’sitwazzjonijiet normali kif ukoll f’dawk ta’ emerġenza;
• b. proċeduri biex jiġu dokumentati u rreġistrati s-sejbiet u l-ġudizzji superviżorji;
• c. arranġamenti għall-approvazzjoni tas-sejbiet u l-punteġġi, kif ukoll proċeduri ta’ eskalazzjoni meta jkun hemm opinjonijiet kuntrarji fl-awtorità kompetenti, kemm f’sitwazzjonijiet normali kif ukoll f’dawk ta’ emerġenza;
• d. arranġamenti għall-organizzazzjoni ta’ djalogu mal-istituzzjoni skont il-mudell tal-involviment minimu kif stipulat fit-taqsima 2.4 biex jiġu vvalutati l-elementi individwali tal-SREP;
• e. arranġamenti għall-involviment f’konsultazzjonijiet ma’ istituzzjoni u l-komunikazzjoni tal-eżiti tal-SREP lill-istituzzjoni, li jirriflettu wkoll l-interazzjoni fi ħdan il-kulleġġi tas-superviżuri għal gruppi transfruntiera u l-entitajiet tagħhom, f’konformità mar-Regolament ta’ Implimentazzjoni tal-Kummissjoni (UE) Nru 710/2014¹⁰ ;
• f. kontrokontrolli interni li jappoġġaw it-teħid ta’ deċiżjonijiet effettiv, il-konsistenza tal-eżiti u r-responsabbiltà.

¹⁰ Ir-Regolament ta’ Implimentazzjoni tal-Kummissjoni (UE) Nru 710/2014 tat-23 ta’ Ġunju 2014 li jistabbilixxi standards tekniċi ta’ implimentazzjoni fir-rigward tal-kundizzjonijiet uniformi tal-applikazzjoni tal-proċess ta’ deċiżjonijiet konġunti dwar ir-rekwiżiti prudenzjali speċifiċi għall-istituzzjonijiet skont id-Direttiva 2013/36/UE tal-Parlament Ewropew u tal-Kunsill (ĠU L 188, 27.6.2014, p. 19, ELI: http://data.europa.eu/eli/reg_impl/2014/710/oj).

Meta jiġu ddefiniti arranġamenti għal djalogu mal-istituzzjonijiet, l-awtoritajiet kompetenti għandhom jikkunsidraw l-implikazzjonijiet potenzjali tal-forniment tal-punteġġi lill-istituzzjonijiet fir-rigward tal-obbligi ta’ żvelar tagħhom skont ir-rekwiżiti tar-Regolament (UE) Nru 596/2014¹¹ u d-Direttivi 2014/57/UE¹² u 2004/109/KE¹³ .

¹¹ Ir-Regolament (UE) Nru 596/2014 tal-Parlament Ewropew u tal-Kunsill tas-16 ta’ April 2014 dwar l-abbuż tas-suq (Regolament dwar l-abbuż tas-suq) u li jħassar id-Direttiva 2003/6/KE tal-Parlament Ewropew u tal-Kunsill u d-Direttivi tal-Kummissjoni 2003/124/KE, 2003/125/KE u 2004/72/KE (ĠU L 173, 12.6.2014, p. 1).

¹² Id-Direttiva 2014/57/UE tal-Parlament Ewropew u tal-Kunsill tas-16 ta’ April 2014 dwar sanzjonijiet kriminali għal abbuż tas-suq (direttiva dwar l-abbuż tas-suq) (ĠU L 173, 12.6.2014, p. 179, ELI: http://data.europa.eu/eli/reg/2014/596/oj).

¹³ Id-Direttiva 2004/109/KE tal-Parlament Ewropew u tal-Kunsill tal-15 ta’ Diċembru 2004 dwar l-armonizzazzjoni tar-rekwiżiti ta’ trasparenza f’dak li għandu x’jaqsam ma’ informazzjoni dwar emittenti li t-titoli tagħhom huma ammessi għall-kummerċ f’suq regolat u li temenda d-Direttiva 2001/34/KE (ĠU L 390, 31.12.2004, p. 38, ELI: http://data.europa.eu/eli/dir/2004/109/oj).