Artikolu 27 Reviżjoni tal-miri ta’ prestazzjoni u tal-pjanijiet ta’ prestazzjoni waqt perjodu referenzjarju

1.   Meta, waqt perjodu referenzjarju, il-miri ta’ prestazzjoni għall-Unjoni kollha ma jibqgħux adegwati, fid-dawl ta’ ċirkostanzi jew kunsiderazzjonijiet tas-sikurezza li nbidlu b’mod sinifikanti, u meta r-reviżjoni ta’ mira waħda jew aktar tkun meħtieġa u proporzjonata, il-Kummissjoni għandha tirrevedi dawk il-miri ta’ prestazzjoni għall-Unjoni kollha. L-Artikolu 22 għandu japplika għal din id-deċiżjoni.

Meta, wara tali reviżjoni, il-miri ta’ prestazzjoni li jinsabu fil-pjanijiet ta’ prestazzjoni adottati skont l-Artikolu 24(6) ma jibqgħux konsistenti mal-miri ta’ prestazzjoni għall-Unjoni kollha, l-awtoritajiet superviżorji nazzjonali għandhom jirrevedu dawk il-pjanijiet fir-rigward tal-miri ta’ prestazzjoni kkonċernati. L-Artikoli 23, 24 u 25 għandhom japplikaw għar-reviżjoni ta’ dawk il-pjanijiet. Il-konsultazzjoni msemmija fl-Artikolu 23(8) tista’ tkun limitata, għall-fini ta’ dan is-subparagrafu, għall-miri ta’ prestazzjoni u partijiet tal-abbozzi ta’ pjanijiet ta’ prestazzjoni li huma direttament jew indirettament affettwati mir-reviżjoni.

Wara r-reviżjoni msemmija fl-ewwel subparagrafu, l-awtoritajiet superviżorji nazzjonali għandhom iħejju abbozzi ġodda tal-pjanijiet ta’ prestazzjoni, li għalihom għandhom japplikaw l-Artikoli 23, 24 u 25. Il-Maniġer tan-Network għandu jfassal abbozz ġdid tal-Pjan ta’ Prestazzjoni tan-Network, li għalih għandu japplika l-Artikolu 26.

2.   Id-deċiżjoni dwar il-miri ta’ prestazzjoni riveduti għall-Unjoni kollha msemmija fil-paragrafu 1 għandha tinkludi dispożizzjonijiet tranżizzjonali għall-perjodu taż-żmien sakemm isiru applikabbli l-pjanijiet ta’ prestazzjoni definittivi riveduti. Il-miri ta’ prestazzjoni riveduti għall-Unjoni kollha u d-dispożizzjonijiet tranżizzjonali ma għandhomx japplikaw b’mod retroattiv.

3.   F’każ ta’ kriżi tan-network, bħal kunflitti ġeopolitiċi, kriżijiet tas-saħħa jew diżastru naturali, li tipprevjeni l-ħruġ ta’ tbassir affidabbli tat-traffiku, id-dispożizzjonijiet tranżizzjonali adottati mill-Kummissjoni f’konformità mal-paragrafu 2 jistgħu jinkludu s-sospensjoni temporanja jew adattament tal-iskema ta’ prestazzjoni sakemm tintemm il-kriżi tan-network u jkunu disponibbli previżjonijiet affidabbli ġodda. F’dak il-każ, il-Kummissjoni għandha tiddefinixxi l-kundizzjonijiet relatati, inkluż l-adattamenti meħtieġa għall-imposti applikabbli, fid-deċiżjoni msemmija fil-paragrafu 1.

4.   L-Istati Membri jistgħu, soġġett għall-approvazzjoni tal-Kummissjoni, jirrevedu mira ta’ prestazzjoni waħda jew diversi tul perjodu referenzjarju meta jintlaħqu l-livelli limiti ta’ allert, jew meta jintwera li d-data inizjali, is-suppożizzjonijiet u r-raġunamenti li jirfdu l-miri ta’ prestazzjoni ma għadhomx aktar preċiżi b’mod sinifikanti u dejjiemi minħabba ċirkostanzi li ma kinux imbassra waqt l-adozzjoni tal-pjan ta’ prestazzjoni. Jekk tikkonkludi li r-reviżjoni hija meħtieġa u proporzjonata u li l-miri ta’ prestazzjoni riveduti huma konsistenti mal-miri ta’ prestazzjoni għall-Unjoni kollha, il-Kummissjoni għandha tapprova din ir-reviżjoni.

F’dak il-każ, l-Istati Membri għandhom jirrevedu l-pjanijiet ta’ prestazzjoni fir-rigward tal-miri kkonċernati, f’konformità mal-proċeduri stipulati fl-Artikoli 23 u 24. Il-konsultazzjoni msemmija fl-Artikolu 23(8) tista’ tkun limitata, għall-finijiet ta’ dan il-paragrafu, għall-miri ta’ prestazzjoni u partijiet mill-pjanijiet ta’ prestazzjoni li huma direttament jew indirettament affettwati mir-reviżjoni.