8. Measúnú ar shocruithe clárúcháin an BTT

Ba cheart d’údaráis inniúla a chinntiú go bhfuil próisis leordhóthanacha curtha i bhfeidhm ag an BTT chun leabhar clárúcháin a choinneáil ar bun a chuireann ar chumas an BTT taifead a dhéanamh ar a shócmhainní agus a dhliteanais go léir atá cláraithe nó tionscanta, agus ar a ítimí atá lasmuigh den chlár comhardaithe.

Ba cheart d’údaráis inniúla measúnú a dhéanamh ar leordhóthanacht agus iomláine na mbeartas, na bpróiseas agus na nósanna imeachta arna mbunú chun leabhar clárúcháin a choinneáil agus ba cheart dóibh a áirithiú go bhfuil siad oiriúnach chun comhlíonadh na gceanglas a chuirtear ar fáil i gcaighdeán teicniúil rialála ÚBE maidir le socruithe clárúcháin¹² .

Ba cheart d’údaráis inniúla a chinntiú go leagtar amach sa bheartas sin na straitéisí clárúcháin agus fálaithe do na cineálacha éagsúla idirbheart, chomh maith leis na nósanna imeachta, na rialuithe agus an creat rialachais gaolmhar.

Ba cheart d’údaráis inniúla a fhíorú go bhfuil na socruithe clárúcháin atá leagtha amach sa bheartas ailínithe le straitéis ghnó an BTT. Ba cheart a leagan amach go soiléir sa bheartas oibríochtaí inghrúpa a bhfuil coinne leo agus bainistiú na rioscaí a eascraíonn as na hoibríochtaí sin.

Maidir le socruithe ‘droim le droim’, ba cheart d’údaráis inniúla a fhíorú nach bhfuil sé beartaithe sa bheartas brath go córasach ná go substaintiúil ar straitéisí fálaithe ‘droim le droim’ ná ar aistrithe riosca inghrúpa.

Ba cheart d’údaráis inniúla a fhíorú go bhfuil an beartas formheasta ag comhlacht rialaithe an cheannghnóthais is iarratasóir.

12 Ar fáil ag Final Report on draft Regulatory Technical Standards on booking arrangements.pdf 20