Airteagal 55 Comhlachtaí rochtana sonraí sláinte

1.   Ainmneoidh na Ballstáit comhlacht rochtana sonraí sláinte amháin nó níos mó a bheidh freagrach as na cúraimí agus na hoibleagáidí a leagtar amach in Airteagail 57, 58 agus 59 a chur i gcrích. Féadfaidh na Ballstáit comhlacht earnála poiblí nua amháin nó níos mó a bhunú nó féadfaidh siad brath ar chomhlachtaí earnála poiblí atá ann cheana nó ar sheirbhísí inmheánacha comhlachtaí earnála poiblí a chomhlíonann na coinníollacha a leagtar amach san Airteagal seo. Féadfar na cúraimí a leagtar amach in Airteagal 57 a dháileadh idir comhlachtaí rochtana sonraí sláinte éagsúla. I gcás ina n-ainmníonn Ballstát roinnt comhlachtaí rochtana sonraí sláinte, ainmneoidh sé comhlacht rochtana sonraí sláinte amháin a ghníomhóidh mar chomhordaitheoir agus a bheidh freagrach as cúraimí a chomhordú leis na comhlachtaí rochtana sonraí sláinte eile laistigh de chríoch an Bhallstáit sin i mBallstáit eile.

Rannchuideoidh gach comhlacht rochtana sonraí sláinte le cur i bhfeidhm comhsheasmhach an Rialacháin seo ar fud an Aontais. Chun na críche sin, oibreoidh comhlachtaí rochtana sonraí sláinte i gcomhar le chéile, leis an gCoimisiún, agus, i gcás ábhair imní maidir le cosaint sonraí, leis na húdaráis mhaoirseachta ábhartha.

2.   Chun tacú leis na comhlachtaí rochtana sonraí sláinte agus a gcúraimí á gcomhlíonadh go héifeachtach acu agus a gcumhachtaí á bhfeidhmiú acu, áiritheoidh na Ballstáit go soláthraítear do gach comhlacht rochtana sonraí sláinte na heilimintí seo a leanas:

I gcás ina gceanglaítear measúnú ó chomhlachtaí eitice faoin dlí náisiúnta, cuirfidh na comhlachtaí sin saineolas ar fáil don chomhlacht rochtana sonraí sláinte. De rogha air sin, féadfaidh na Ballstáit foráil a dhéanamh do chomhlachtaí eitice a bheith mar chuid den chomhlacht rochtana sonraí sláinte.

3.   Áiritheoidh na Ballstáit go seachnófar aon choinbhleachtaí leasa idir codanna eagraíochta na gcomhlachtaí rochtana sonraí sláinte bhfuil na cúraimí éagsúla comhlachtaí den sórt sin á gcomhlíonadh acu, mar shampla, trí fhoráil a dhéanamh maidir le coimircí eagraíochtúla amhail deighilt idir feidhmeanna éagsúla comhlachtaí rochtana sonraí sláinte, lena n-áirítear measúnú a dhéanamh ar iarratais, tacair sonraí a ghlacadh agus a ullmhú, mar shampla ainm bréige ar thacair sonraí a chur i bhfeidhm agus iad a anaithnidiú, agus sonraí a sholáthar i dtimpeallachtaí slána próiseála.

4.   Agus a gcúraimí á gcomhlíonadh acu, oibreoidh na comhlachtaí rochtana sonraí sláinte go gníomhach i gcomhar le hionadaithe na bpáirtithe leasmhara ábhartha, go háirithe le hionadaithe othar, sealbhóirí sonraí sláinte agus úsáideoirí sonraí sláinte agus seachnóidh siad aon choinbhleachtaí leasa.

5.   I gcomhlíonadh a gcúraimí agus i bhfeidhmiú a gcumhachtaí, seachnóidh comhlachtaí rochtana sonraí sláinte aon choinbhleachtaí leasa. Gníomhóidh foireann na gcomhlachtaí rochtana sonraí sláinte ar mhaithe le leas an phobail agus ar bhealach neamhspleách.

6.   Cuirfidh na Ballstáit an Coimisiún ar an eolas faoi chéannacht na gcomhlachtaí rochtana sonraí sláinte arna n-ainmniú de bhun mhír 1 faoin 26 Márta 2027. Cuirfidh siad an Coimisiún ar an eolas freisin faoi aon mhodhnú ina dhiaidh sin ar chéannacht na gcomhlachtaí sin. Cuirfidh an Coimisiún agus na Ballstáit an fhaisnéis sin ar fáil go poiblí.