Airteagal 19 Gearáin a láimhseáil agus rochtain ar an gceartas

1.   Daoine nádúrtha nó dlítheanacha a meastar faoin dlí náisiúnta go bhfuil leas leordhóthanach acu nó iadsan a measann gur sáraíodh a gcearta, beidh siad i dteideal gearáin chuí-réasúnaithe a chur faoi bhráid na n-údarás inniúil i gcás ina measann siad, ar bhonn imthosca oibiachtúla, nach gcomhlíonann oibreoir eacnamaíoch, iompróir de chuid an Aontais, iompróir nach iompróir de chuid an Aontais é nó seoltóir, oibreoir, gníomhaire nó máistir soithigh farraige an Rialachán seo.

Chun críocha na chéad fhomhíre, measfar go bhfuil leas leordhóthanach ag eintitis neamhrialtasacha nó eagraíochtaí a chuireann cosaint shláinte an duine nó cosaint an chomhshaoil chun cinn nó iadsan a chuireann cosaint tomhaltóirí chun cinn agus a chomhlíonann aon cheanglas faoin dlí náisiúnta.

2.   Déanfaidh na húdaráis inniúla measúnú ar ghearáin chuí-réasúnaithe dá dtagraítear i mír 1 den Airteagal seo agus, i gcás inarb iomchuí, déanfaidh siad na bearta is gá chun na gearáin sin a fhíorú, lena n-áirítear cigireachtaí ar an duine nó ar an eagraíocht nó éisteachtaí uathu. I gcás ina bhfaighfear amach go bhfuil bunús leis an ngearán, déanfaidh na húdaráis inniúla na gníomhaíochtaí is gá i gcomhréir le hAirteagail 5(3), 14(2) agus 15(2).

3.   Déanfaidh na húdaráis inniúla, a luaithe is féidir, na daoine dá dtagraítear i mír 1 a thíolaic an gearán a chur ar an eolas faoin gcinneadh uathu aontú don iarraidh ar ghníomhaíocht a cuireadh chun cinn sa ghearán nó diúltú don iarraidh sin, agus soláthróidh siad na cúiseanna leis sin.

4.   Áiritheoidh na Ballstáit go bhfuil ag duine dá dtagraítear i mír 1 rochtain ar chúirt nó ar chomhlacht poiblí neamhspleách neamhchlaonta eile atá inniúil ar athbhreithniú a dhéanamh ar dhlíthiúlacht nós imeachta agus shubstainteach aon chinntí, aon ghníomhartha nó aon mhainneachtana gníomhú de chuid an údaráis inniúil faoin Rialachán seo, gan dochar d’aon fhoráil den dlí náisiúnta lena gceanglaítear nach mór nósanna imeachta um athbhreithniú riaracháin a bheith ídithe sula rachfar ar iontaoibh imeachtaí breithiúnacha. Beidh na nósanna imeachta athbhreithniúcháin sin cóir, cothrom, tráthúil agus ní bheidh siad róchostasach, agus soláthrófar leo leigheasanna leordhóthanacha agus éifeachtacha, lena n-áirítear faoiseamh urghaire i gcás inar gá.

5.   Áiritheoidh na Ballstáit go gcuirfear faisnéis phraiticiúil ar fáil don phobal maidir le rochtain ar na nósanna imeachta um athbhreithniú riaracháin agus athbhreithniú breithiúnach dá dtagraítear san Airteagal seo.