Beartais agus próisis riosca

Ba cheart don chomhlacht bainistíochta, bunaithe ar a straitéis fhoriomlán IRRBB, glacadh le beartais, próisis agus córais riosca láidre a bheidh mar bhonn leis an méid seo a leanas a áirithiú:

• (a) nósanna imeachta chun cásanna a nuashonrú chun IRRBB a thomhas agus a mheas bunaithe;
• (b) cur chuige tomhais agus toimhdí comhfhreagracha oiriúnacha agus comhréireacha chun IRRBB a thomhas agus a mheas, lena n-áirítear caipiteal inmheánach a leithdháileadh ar rioscaí IRRBB;
• (c) déantar athbhreithniú rialta ar thoimhdí na samhlacha a úsáidtear agus, más gá, leasaítear iad;
• (d) mínítear na caighdeáin atá luaite le meastóireacht a dhéanamh ar shuíomhanna agus feidhmíocht a thomhas;
• (e) doiciméid agus rialú cuí straitéisí fálaithe incheadaithe agus ionstraimí fálaithe; agus
• (f) tá na línte údaráis agus freagrachta a bhaineann le neamhchosaintí ar IRRBB a bhainistiú mínithe.

Ba cheart go mbeadh na beartais seo ciallmhar, stuama agus doiciméadaithe agus ba cheart go ndéileálfaí iontu le gach comhpháirt de IRRBB atá tábhachtach i ndáil le himthosca aonair na hinstitiúide. Gan dochar do phrionsabal na comhréireachta, ba cheart go n-áireofaí i mbeartais IRRBB:

• (a) Cur i bhfeidhm na teorann idir ‘leabhar neamhthrádála’ agus ‘leabhar trádála’. Ba cheart aistrithe riosca inmheánacha idir an leabhar baincéireachta agus an leabhar trádála a dhoiciméadú agus faireachán cuí a dhéanamh air laistigh den fhaireachán ginearálta atá á dhéanamh ar IRRBB atá bunaithe in ionstraimí díorthach ráta úis.
• (b) Glacadh leis an míniú níos mionsonraithe ar luach eacnamaíoch agus a chomhsheasmhacht leis an modh a úsáideadh chun sócmhainní agus dliteanais a luacháil (e.g., bunaithe ar luach lascainithe shreafaí airgid na todhchaí agus luach lascainithe ghlanioncam úis na todhchaí) d'úsáid inmheánach.
• (c) Glacadh leis an míniú níos mionsonraithe ar bhearta a bhaineann le glanioncam úis móide athruithe margadhluacha agus a chomhsheasmhacht le cur chuige na hinstitiúide i ndáil le pleananna airgeadais a fhorbairt agus réamhaisnéisí airgeadais d'úsáid inmheánach.
• (d) Méid agus foirm na dturraingí difriúla ráta úis atá le húsáid do ríomhanna inmheánacha IRRBB.
• (e) Úsáid a bhaint as cuir chuige mhodh an tsreabhaidh airgid coinníollach nó neamhchoinníollach.
• (f) An cur chuige maidir le ‘idirbhearta píblíne’⁷ (lena n-áirítear aon fhálú gaolmhar).
• (g) Comhiomlánú neamhchosaintí trasairgeadra ráta úis.
• (h) Tomhas agus bainistiú an riosca boinn mar thoradh ar innéacsanna difriúla ráta úis.
• (i) Cibé acu an gcuirtear nó nach gcuirtear sócmhainní agus dliteanais neamhúsmhara an leabhair neamhthrádála (lena n-áirítear caipiteal agus cúlchistí) san áireamh i ríomhanna a bhfuil IRRBB le haghaidh ICAAP á dtomhas acu.
• (j) Cur chuige iompraíochta cuntas reatha agus coigiltis (i.e., an aibíocht a nglactar léi le haghaidh dliteanas lena mbaineann aibíocht chonarthach ghearrthéarmach ach aibíocht iompair fhada).
• (k) Tomhas IRRBB ag eascairt as roghanna iompair agus uathoibríocha sócmhainní nó dliteanas, lena n-áirítear éifeachtaí dronnachta agus próifílí torthaí neamhlíneacha.
• (l) An méid gráinneachta a úsáidtear i ríomhanna tomhais (e.g., an úsáid a bhaintear as eatraimh ama).
• (m) An sainmhíniú inmheánach ar chorrlaigh tráchtála agus modheolaíocht oiriúnach don chur chuige inmheánach maidir le corrlaigh tráchtála.

⁷ Go bunúsach, soláthraíonn neamhchosaintí píblíne (e.g., sa chás go bhfuil iasacht comhaontaithe agus gur féidir leis an gcustaiméir cinneadh a dhéanamh maidir leis an iasacht sin a tharraingt anuas) rogha don chustaiméir ar dócha a bheidh á feidhmiú nuair nach bhfuil na coinníollacha margaidh oiriúnach don institiúid (dronnacht dhiúltach). Braitheann bainistiú neamhchosaintí píblíne ar shonraí beachta maidir le hiarratais faighte, agus samhaltú tarraingí anuas ionchais.

Ba cheart gach beartas IRRBB a athbhreithniú go rialta, gach bliain ar a laghad, agus iad a athbhreithniú nuair is gá.

D'fhonn a áirithiú go bhfuil beartais agus nósanna imeachta bainistíochta institiúide IRRBB oiriúnach agus fónta, ba cheart don chomhlacht bainistíochta nó dá thoscairí athbhreithniú a dhéanamh ar bheartais agus nósanna imeachta bainistíochta IRRBB i bhfianaise thorthaí na dtuarascálacha rialta.

Ba cheart don chomhlacht bainistíochta nó dá thoscairí a áirithiú go bhfuil gníomhaíochtaí anailíse agus bainistíochta riosca a bhaineann le IRRBB á gcur i gcrích ag baill foirne oiriúnacha agus inniúla a bhfuil an t-eolas agus an taithí theicniúil acu atá comhsheasmhach le cineál agus raon feidhme ghníomhaíochtaí na hinstitiúide.