4.4 Aitheantas cliaint a mheaitseáil mar chuid den phróiseas fíorúcháin

Ba cheart go gceadódh cianréitigh ionduchtaithe cliant arna gcur chun feidhme ag institiúidí creidmheasa agus airgeadais, ar a laghad, na nithe seo a leanas, mar chuid dá bpróiseas fíorúcháin:

• a) go bhfuil meaits ann idir faisnéis infheicthe an duine nádúrtha agus an doiciméadú a cuireadh ar fáil;
• b) i gcás inar eintiteas dlíthiúil an cliant, go bhfuil sé cláraithe go poiblí, i gcás inarb infheidhme;
• c) i gcás inar eintiteas dlíthiúil an cliant, go bhfuil an duine nádúrtha a dhéanann ionadaíocht air i dteideal gníomhú ar a shon.

I gcás ina mbaineann an cianréiteach ionduchtaithe cliant le húsáid sonraí bithmhéadracha chun aitheantas an chliaint a fhíorú, ba cheart d’institiúidí creidmheasa agus airgeadais a chinntiú go bhfuil na sonraí bithmhéadracha uathúil a ndóthain le go mbeidís nasctha go doshéanta le duine nádúrtha aonair. Ba cheart d’institiúidí creidmheasa agus airgeadais algartaim láidre iontaofa a úsáid chun an meaits idir na sonraí bithmhéadracha a cuireadh ar fáil ar an doiciméad aitheantais a cuireadh isteach agus an cliant atá á ionduchtú a fhíorú. I gcásanna nach soláthraíonn an réiteach an leibhéal muiníne is gá, ba cheart rialuithe breise a chur chun feidhme.

I gcásanna nach bhfuil an fhianaise a sholáthraítear ar cháilíocht leordhóthanach as a leanann débhrí nó éiginnteacht ionas go gcuirtear isteach ar fheidhmiú ciansheiceálacha, ba cheart briseadh isteach ar an gcianphróiseas ionduchtaithe aonair cliant agus é a atosú nó a atreorú chuig fíorú duine le duine.

I gcás ina n-úsáideann institiúidí creidmheasa agus airgeadais cianréitigh ionduchtaithe gan duine ina bhfeighil, nuair nach n-idirghníomhaíonn an cliant le fostaí chun an próiseas fíorúcháin a chur i gcrích, ba cheart dóibh:

• a) a chinntiú go dtógtar aon ghrianghraf/grianghraif nó físeán faoi choinníollacha soilsithe imleor agus go ngabhtar na hairíonna riachtanacha leis an tsoiléireacht is gá chun aitheantas an chliaint a fhíorú i gceart;
• b) a chinntiú go dtógtar aon ghrianghraf/grianghraif nó físeán fad a bhíonn an próiseas fíorúcháin á chur i gcrích ag an gcliant;
• c) fíoruithe braite beochta a dhéanamh, lena bhféadfar nósanna imeachta a áireamh i gcás inar gá gníomh sonrach ón gcliant chun a fhíorú go bhfuil sé/sí i láthair sa seisiún cumarsáide nó ar féidir iad a bhunú ar anailís ar na sonraí a fuarthas agus nach gá don chliant gníomh sonrach a dhéanamh ina leith;
• d) algartaim láidre iontaofa a úsáid chun a fhíorú an dtagann an grianghraf nó na grianghraif nó an físeán a tógadh leis an bpictiúr a fuarthas ón doiciméad oifigiúil nó na doiciméid oifigiúla ar leis an gcliant é/iad.

I gcás ina n-úsáideann institiúidí creidmheasa agus airgeadais cianréitigh ionduchtaithe cliant a bhfuil duine i bhfeighil orthu, ina n-idirghníomhaíonn an cliant le fostaí chun an próiseas fíorúcháin a cur i gcrích, ba cheart dóibh:

• a) a chinntiú gur leor cáilíocht na híomhá agus na fuaime chun aitheantas an chliaint a fhíorú i gceart agus go n-úsáidtear córais teicneolaíochta iontaofa;
• b) foráil a dhéanamh do rannpháirtíocht fostaí a bhfuil dóthain eolais aige ar an rialachán AML/CFT is infheidhme agus ar ghnéithe slándála an chianfhíoraithe agus atá oilte a dhóthain chun úsáid d’aon ghnó teicníochtaí meabhlaireachta a bhaineann le cianfhíorú a réamh-mheas agus a chosc, agus chun iad a bhrath agus frithghníomhú i gcás ina n-úsáidtear iad;
• c) treoir agallaimh a chur i dtoll a chéile ina saineofar na céimeanna ina dhiaidh sin den chianphróiseas ionduchtaithe chomh maith leis na gníomhartha a theastaíonn ón bhfostaí. Ba cheart go mbeadh treoir sa treoir agallaimh maidir le tosca síceolaíochta nó gnéithe eile a d'fhéadfadh a bheith ina gcomharthaí d'iompraíocht amhrasach a thabhairt faoi deara agus a shainaithint le linn an chianfhíorúcháin.

I gcás inar féidir, ba cheart d’institiúidí creidmheasa agus airgeadais cianréitigh ionduchtaithe cliant a úsáid lena n-áirítear randamacht i seicheamh na ngníomhaíochtaí atá le déanamh ag an gcliant chun críocha fíoraithe chun cosaint a thabhairt i gcoinne rioscaí amhail úsáid a bhaint as féiniúlachtaí sintéiseacha nó comhéigean. I gcás inar féidir, ba cheart d’institiúidí creidmheasa agus airgeadais sanntaí randamacha a sholáthar don fhostaí atá freagrach as an gcianphróiseas fíorúcháin chun claonpháirteachas idir an cliant agus an fostaí atá freagrach a sheachaint.

I dteannta leis an méid thuas, agus i gcás inarb ionann é agus an riosca ML/TF a bhaineann leis an gcaidreamh gnó, ba cheart d’institiúidí creidmheasa agus airgeadais úsáid a bhaint as ceann amháin nó níos mó de na rialuithe seo a leanas nó as beart comhchosúil chun iontaofacht an phróisis fhoraithe a mhéadú. Féadfaidh an méid seo a leanas a bheith san áireamh sna rialuithe nó sna bearta sin, ach níl siad teoranta dóibh:

• a) tarraingítear an chéad íocaíocht ar chuntas in ainm aonair nó in ainm chomhpháirteach an chliaint le hinstitiúid creidmheasa nó airgeadais arna rialáil ag an LEE nó i dtríú tír a bhfuil ceanglais AML/CFT aici nach bhfuil ar chéim stóinseachta níos ísle ná na cinn a cheanglaítear le Treoir (AE) 2015/849;
• b) paschód a ghintear go randamach a sheoladh chuig an gcliant chun a láithreacht le linn an chianphróisis fíorúcháin a dheimhniú. Ba cheart gur cód aonúsáide nó cód amteoranta é an paschód.
• c) sonraí bithmhéadracha a ghabháil chun iad a chur i gcomparáid le sonraí a bhailítear trí fhoinsí neamhspleácha iontaofa eile;
• d) teagmhálacha teileafóin leis an gcliant;
• e) post díreach (idir phost agus phost leictreonach) chuig an gcliant.

Ba cheart d’institiúidí creidmheasa nó airgeadais a mheas go bhfuil na critéir i míreanna 38 go 43 le comhlíonadh i gcás ina n-úsáideann an réiteach ceann díobh seo a leanas:

• a) scéimeanna ríomh-shainaitheantais a fhógraítear i gcomhréir le hAirteagal 9 de Rialachán (AE) Uimh. 910/2014 agus a chomhlíonann ceanglais na leibhéal dearbhaithe ‘substaintiúil’ nó ‘ard’ i gcomhréir le hAirteagal 8 den Rialachán sin;
• b) seirbhísí iontaoibhe cáilithe ábhartha a chomhlíonann ceanglais Rialachán (AE) Uimh. 910/2014, go háirithe Caibidil III, Roinn 3 agus Airteagal 24(1), fomhír 2, pointe (b) den Rialachán sin.