15. Feidhm an chomhlíonta

Ba cheart d’eisitheoirí ARTanna feidhm bhuan agus éifeachtach an chomhlíonta a bhunú chun riosca comhlíonta a bhainistiú agus ba cheart dóibh duine a cheapadh le bheith freagrach as an bhfeidhm sin i ngníomhaíochtaí uile an eintitis (an t-oifigeach um chomhlíonadh).

Féadfar ról an oifigigh um chomhlíonadh, ag cur prionsabal na comhréireachta atá leagtha amach i dTeideal I san áireamh, a chomhcheangal le ceann RMF nó, sa chás nach bhfuil sé comhréireach duine a cheapadh a bheith tiomanta don fheidhm seo amháin, is féidir le duine sinsearach eile an fheidhm a chur i gcrích (e.g. ceann dlí), ar choinníoll nach bhfuil aon choinbhleacht leasa idir na cúraimí a chuirtear i gcrích.

Ba cheart eolas, scileanna agus taithí leordhóthanach a bheith ag na baill foirne laistigh d’fheidhm an chomhlíonta maidir le comhlíonadh agus nósanna imeachta ábhartha agus ba cheart rochtain a bheith acu ar oiliúint rialta.

Ba cheart don chomhlacht bainistíochta, agus é i mbun a fheidhme maoirseachta, maoirseacht a dhéanamh ar chur chun feidhme beartais um chomhlíonadh atá doiciméadaithe go maith, agus ba cheart eolas maidir leis an mbeartas sin a roinnt le gach comhalta foirne. Ba cheart d’eisitheoirí ARTanna próiseas a chur ar bun chun measúnú rialta a dhéanamh ar athruithe ar an dlí agus ar na rialacháin is infheidhme maidir lena ngníomhaíochtaí.

Ba cheart d’fheidhm an chomhlíonta comhairle a chur ar an gcomhlacht bainistíochta maidir le bearta atá le déanamh chun comhlíonadh na ndlíthe, na rialacha, na rialachán agus na gcaighdeán is infheidhme a áirithiú, agus ba cheart di measúnú a dhéanamh ar an tionchar a d’fhéadfadh a bheith ag aon athruithe sa timpeallacht dhlíthiúil nó rialála ar ghníomhaíochtaí agus ar chreat comhlíonta eisitheoir ARTanna.

Ba cheart go n-áiritheodh feidhm an chomhlíonta go ndéantar faireachán ar chomhlíonadh trí chlár faireacháin ar chomhlíonadh atá struchtúrtha agus dea-shainithe agus go gcomhlíontar an beartas comhlíonta. Ba cheart d’fheidhm an chomhlíonta tuairisciú don chomhlacht bainistíochta agus cumarsáid a dhéanamh de réir mar is iomchuí leis an RMF maidir le riosca comhlíontachta eisitheoir ARTanna agus maidir lena bhainistiú. Ba cheart d’fheidhm an chomhlíonta agus do RMF comhoibriú agus faisnéis a mhalartú de réir mar is iomchuí chun a gcúraimí faoi seach a dhéanamh. Ba cheart don chomhlacht bainistíochta agus do RMF torthaí na feidhme comhlíonta a chur san áireamh i bpróisis chinnteoireachta.

Ba cheart d’eisitheoir ARTanna gníomhaíocht iomchuí a dhéanamh in aghaidh iompraíocht inmheánach nó sheachtrach a d’fhéadfadh calaois nó coireacht airgeadais agus sáruithe smachta a éascú nó a chumasú (e.g. sáruithe ar nósanna imeachta inmheánacha nó sáruithe ar theorainneacha).