9.8. Interazzjoni bejn miżuri superviżorji u tal-AML/CFT

Meta japplikaw miżuri superviżorji biex jindirizzaw in-nuqqasijiet prudenzjali relatati mar-riskju tal-ML/TF, l-awtoritajiet kompetenti għandhom jinvolvu ruħhom mas-superviżuri fil-qasam tal-AML/CFT sabiex in-nuqqasijiet/il-vulnerabbiltajiet sottostanti jiġu indirizzati b’mod adegwat mill-miżuri xierqa fi ħdan il-mandat rispettiv tas-superviżuri fil-qasam tal-AML/CFT u tal-awtoritajiet kompetenti mill-perspettivi rispettivi tagħhom⁴⁹ .

⁴⁹ F’konformità mal-Linji Gwida tal-EBA dwar il-Kooperazzjoni fil-qasam tal-AML/CFT (EBA/GL/2021/15).

Meta l-awtoritajiet kompetenti matul l-eżerċitar tal-attivitajiet superviżorji tagħhom ikollhom indikazzjonijiet raġonevoli ta’ nuqqasijiet fil-qafas tas-sistemi u tal-kontrolli tal-istituzzjoni jew fil-qafas ta’ governanza interna li huma relatati mal-AML/CFT jew raġunijiet raġonevoli biex jissuspettaw li l-istituzzjoni żiedet l-iskopertura għar-riskji tal-ML/TF, huma għandhom:

• a. jinnotifikaw lis-superviżur fil-qasam tal-AML/CFT dwar dawn in-nuqqasijiet u r-riskji malli jiġu identifikati u jikkomunikaw magħhom f’konformità mal-Linji Gwida dwar il-Kooperazzjoni fil-qasam tal-AML/CFT;
• b. jivvalutaw l-impatt li tali nuqqasijiet u riskji jista’ jkollhom fuq is-sitwazzjoni prudenzjali tal-istituzzjoni;
• c. jikkomunikaw mas-superviżuri tal-AML/CFT u f’konformità mal-mandati u l-funzjonijiet tal-awtoritajiet rispettivi, iqisu l-aktar miżuri superviżorji prudenzjali xierqa biex jindirizzaw dawn in-nuqqasijiet u r-riskji flimkien ma’ kwalunkwe miżura meħuda mis-superviżuri fil-qasam tal-AML/CFT.

Meta l-awtoritajiet kompetenti jiġu nnotifikati jew isiru konxji mill-miżuri superviżorji jew mis-sanzjonijiet ippjanati jew imposti mis-superviżuri fil-qasam tal-AML/CFT, għandhom iqisu jekk u kif l-implikazzjonijiet prudenzjali potenzjali tad-dgħufijiet u tal-fallimenti identifikati mis-superviżuri fil-qasam tal-AML/CFT jeħtieġ li jiġu mitigati.