Artikolu 4 Ħatra, stabbiliment u rekwiżiti dwar l-awtoritajiet superviżorji nazzjonali

1.   L-Istati Membri, b’mod konġunt jew b’mod individwali, għandhom jaħtru jew jistabbilixxu korp jew korpi bħala l-awtorità superviżorja nazzjonali tagħhom biex twettaq il-kompiti assenjati lil tali awtorità b’dan ir-Regolament.

2.   L-awtorità superviżorja nazzjonali għandha teżerċita s-setgħat tagħha b’mod imparzjali, indipendenti u trasparenti u għandha tkun organizzata, mgħammra bil-persunal, ġestita u ffinanzjata kif xieraq.

3.   Mingħajr preġudizzju għall-paragrafu 1, l-awtoritajiet superviżorji nazzjonali għandhom ikunu indipendenti minn kwalunkwe fornitur tas-servizzi tan-navigazzjoni bl-ajru, mil-lat organizzattiv, ġerarkiku u ta’ teħid ta’ deċiżjonijiet, u għandhom ikunu jew legalment jew funzjonalment distinti mill-fornituri tas-servizzi tan-navigazzjoni bl-ajru. Barra minn hekk, il-fornituri tas-servizzi tan-navigazzjoni bl-ajru ma għandu jkollhom ebda setgħa ta’ teħid tad-deċiżjonijiet fuq l-allokazzjoni tal-baġits tal-awtoritajiet superviżorji nazzjonali. Dment li tali indipendenza tkun garantita, awtorità superviżorja nazzjonali tista’ tkun parti mill-istess ministeru jew amministrazzjoni nazzjonali bħal fornitur tas-servizzi tan-navigazzjoni bl-ajru.

4.   Meta awtorità superviżorja nazzjonali ma tkunx distinta legalment minn fornitur tas-servizzi tan-navigazzjoni bl-ajru, l-Istat Membru kkonċernat għandu jinforma lill-Kummissjoni dwar il-miżuri meħuda minnu biex jiżgura li l-awtorità superviżorja nazzjonali tissodisfa r-rekwiżiti tal-paragrafu 3 u għandu jiddokumenta kif tinkiseb l-indipendenza, filwaqt li juri l-effettività ta’ tali indipendenza. Għal dan il-għan, fejn l-awtorità superviżorja nazzjonali u l-fornitur tas-servizzi tan-navigazzjoni bl-ajru huma parti mill-istess amministrazzjoni, l-awtorità superviżorja nazzjonali ma għandhiex tfittex jew tieħu struzzjonijiet minn livell ġerarkiku ta’ dik l-amministrazzjoni li jkollha awtorità fuq il-fornitur tas-servizzi tan-navigazzjoni bl-ajru, sa fejn huma kkonċernati l-kompiti tagħhom imsemmija fl-Artikolu 5 u d-deċiżjonijiet relatati.

5.   Ma’ awtorità superviżorja nazzjonali tista’ tingħaqad awtorità regolatorja oħra, bħal awtorità kompetenti nazzjonali jew awtorità nazzjonali tal-kompetizzjoni kif imsemmija fl-Artikolu 11 tar-Regolament tal-Kunsill (KE) Nru 1/2003 (19), dment li d-deċiżjonijiet relatati mal-kompiti kkonferiti lill-awtorità superviżorja nazzjonali skont dan ir-Regolament jittieħdu indipendentement minn kompiti oħra kkonferiti lill-awtorità konġunta. F’dak il-każ, l-awtorità konġunta għandha tissodisfa r-rekwiżiti ta’ indipendenza stipulati f’dan l-Artikolu.

L-awtorità superviżorja nazzjonali għandha tkun rappreżentata fi kwistjonijiet relatati mal-kompiti stipulati fl-Artikolu 5 ta’ dan ir-Regolament b’mod li jiżgura l-indipendenza tad-deċiżjonijiet tagħha.

6.   Mingħajr preġudizzju għal-liġi nazzjonali dwar ir-reklutaġġ ta’ uffiċjali pubbliċi, l-Istati Membri għandhom jiżguraw li l-persunal tal-awtoritajiet superviżorji nazzjonali tagħhom, inkluż il-persunal temporanju, jiġi reklutat permezz ta’ proċessi ta’ reklutaġġ ċari u trasparenti, li jiżguraw l-indipendenza tagħhom u għandhom jiżguraw li l-persunal tal-awtoritajiet superviżorji nazzjonali jintgħażel abbażi ta’ kwalifiki speċifiċi, inkluż kompetenza xierqa u esperjenza rilevanti, jew ikun soġġett għal taħriġ xieraq, għat-twettiq effettiv tal-kompiti stipulati fl-Artikolu 5.

L-Istati Membri għandhom jistabbilixxu regoli biex jevitaw kunflitti ta’ interess għall-persunal, inkluż persuni li jieħdu deċiżjonijiet li jeżerċitaw is-setgħat stipulati fil-Kapitolu III ta’ dan ir-Regolament, sabiex l-awtoritajiet superviżorji nazzjonali jkunu jistgħu jwettqu l-kompiti stipulati fl-Artikolu 5 b’mod indipendenti.

7.   Mingħajr preġudizzju għall-Artikolu 30(3), l-Istati Membri għandhom jiżguraw li l-awtoritajiet superviżorji nazzjonali jkollhom ir-riżorsi finanzjarji u l-kapaċitajiet meħtieġa biex iwettqu l-kompiti stipulati fl-Artikolu 5 b’mod effiċjenti u f’waqthom.

8.   L-Istati Membri għandhom jinnotifikaw lill-Kummissjoni bl-ismijiet u l-indirizzi tal-awtoritajiet superviżorji nazzjonali tagħhom, u bil-bidliet li jsirulhom, u bil-miżuri meħuda biex tkun żgurata l-konformità ma’ dan l-Artikolu.