Artikolu 12 Forniment ta’ servizzi ta’ informazzjoni komuni

1.   Meta jiġu pprovduti CIS, id-data disseminata għandha tippreżenta l-integrità u l-kwalità meħtieġa biex tippermetti l-forniment sikur u sigur ta’ servizzi għall-ġestjoni tat-traffiku tal-inġenji tal-ajru mingħajr bdot abbord b’mod li jippermetti l-użu kondiviż tal-ispazju tal-ajru flimkien ma’ inġenji tal-ajru bl-ekwipaġġ.

2.   Il-fornitur tas-CIS għandu jissodisfa l-kundizzjonijiet kumulattivi li ġejjin:

3.   Meta s-CIS jiġu pprovduti minn fornitur uniku tas-CIS deżinjat mill-Istat Membru fir-rigward ta’ spazju tal-ajru tal-U-space speċifiku, il-prezz għal dawn is-servizzi għandu jkun ibbażat fuq il-kostijiet fissi u varjabbli tal-forniment tas-servizz ikkonċernat u jista’, barra minn hekk, jinkludi marġni kummerċjali li tirrifletti kompromess xieraq bejn ir-redditu u r-ritorn. Fejn is-CIS ma jiġux ipprovduti minn fornitur uniku tas-CIS, is-CIS individwali għandu jiġi pprovdut mingħajr ħlas.

4.   Il-kostijiet li abbażi tagħhom jiġi stabbilit il-prezz tas-CIS għandhom jiġu stipulati f’kont separat mill-kontijiet għal kwalunkwe attività oħra tal-fornitur ta’ servizzi kkonċernat u għandhom ikunu aċċessibbli mill-awtorità superviżorja nazzjonali kkonċernata. Dawk il-kostijiet għandhom ikunu disponibbli għall-pubbliku mingħajr preġudizzju għall-Artikolu 52(3).

5.   Il-prezz stabbilit mill-fornitur tas-CIS għandu jkun soġġett għal valutazzjoni u approvazzjoni mill-awtorità superviżorja nazzjonali kkonċernata. Il-prezz ta’ dawn is-servizzi għandu jkun disponibbli għall-pubbliku.

6.   Id-data meħtieġa għat-tħaddim ta’ inġenji tal-ajru mingħajr bdot abbord fl-ispazju tal-ajru tal-U-space għandha tkun disponibbli fuq bażi nondiskriminatorja, mingħajr preġudizzju għas-sigurtà nazzjonali, l-ordni pubbliku u l-interessi tal-politika tad-difiża, mill-fornituri tas-servizzi tan-navigazzjoni bl-ajru. Il-fornituri tas-CIS u l-fornituri tas-servizzi tal-U-space għandhom jużaw biss dik id-data għal finijiet operazzjonali tas-servizzi li jipprovdu.

Il-prezzijiet tal-aċċess għal din id-data għandhom ikunu bbażati fuq il-kostijiet addizzjonali biex issir disponibbli d-data u l-kost tal-ġenerazzjoni tad-data, meta dawn il-kostijiet tal-aħħar mhumiex koperti skont l-Artikolu 30 u għajr jekk jintużaw riżorsi finanzjarji oħrajn mill-Istati Membri biex jiġu koperti dawn il-kostijiet.