Artikolu 23 Pjanijiet ta’ prestazzjoni u miri ta’ prestazzjoni għal servizzi tan-navigazzjoni bl-ajru

1.   L-Istati Membri għandhom, għal kull perjodu referenzjarju, jadottaw abbozz ta’ pjan ta’ prestazzjoni, skont dan l-Artikolu.

2.   Il-fornituri tas-servizzi tan-navigazzjoni bl-ajru deżinjati skont l-Artikoli 8 u 10 għandhom, għal kull perjodu referenzjarju u għas-servizzi tan-navigazzjoni bl-ajru li jipprovdu u, fejn applikabbli, jakkwistaw mingħand fornituri oħra, iħejju inputs għall-abbozz tal-pjan ta’ prestazzjoni u jissottomettuhom lill-awtorità superviżorja nazzjonali.

L-awtorità superviżorja nazzjonali tista’ titlob li dawk l-inputs ikunu fil-forma ta’ abbozz ta’ pjan ta’ prestazzjoni.

Tali inputs għandhom jitħejjew mill-fornituri tas-servizzi tan-navigazzjoni bl-ajru ddeżinjati skont l-Artikoli 8 u 10 wara l-istabbiliment ta’ miri ta’ prestazzjoni għall-Unjoni kollha, fi żmien debitu biex l-awtorità superviżorja nazzjonali tkun tista’ tikkonforma mal-limitu ta’ żmien stipulat fil-paragrafu 5 ta’ dan l-Artikolu.

3.   Meta jiġu deżinjati f’konformità mal-Artikolu 10, il-fornituri tas-servizzi tal-MET għandhom jipprovdu wkoll inputs fuq il-bażi tal-kost tagħhom lill-awtorità superviżorja nazzjonali.

4.   L-inputs, ipprovduti mill-fornituri tas-servizzi tan-navigazzjoni bl-ajru ddeżinjati skont l-Artikoli 8 u 10 taħt il-paragrafi 2 u 3 ta’ dan l-Artikolu rigward l-allokazzjoni tal-kostijiet inklużi fil-pjanijiet ta’ prestazzjoni għandhom ikunu bbażati fuq il-prinċipji ġenerali msemmija fl-Artikolu 21(4), il-punt (l).

5.   L-awtorità superviżorja nazzjonali għandha tirrieżamina l-informazzjoni pprovduta minn kull fornitur tas-servizzi tan-navigazzjoni bl-ajru ddeżinjat skont l-Artikoli 8 u 10, taħt il-paragrafi 2, 3 u 4 ta’ dan l-Artikolu, u għandha tapprovaha, jew, fejn ikun il-każ, għandha tagħmel il-bidliet meħtieġa. Sussegwentement, abbażi ta’ dik l-informazzjoni u, jekk xieraq, inputs minn awtoritajiet nazzjonali oħra, l-awtorità superviżorja nazzjonali għandha tħejji abbozz ta’ pjan ta’ prestazzjoni nazzjonali uniku. Dak l-abbozz tal-pjan ta’ prestazzjoni nazzjonali għandu jiġi adottat mill-Istat Membru.

L-abbozz tal-pjan ta’ prestazzjoni għandu jitħejja mill-awtorità superviżorja nazzjonali qabel il-bidu tal-perjodu referenzjarju kkonċernat.

6.   L-awtoritajiet superviżorji nazzjonali għandhom jiżguraw li l-allokazzjoni tal-kostijiet inklużi fl-abbozz tal-pjan ta’ prestazzjoni tikkonforma mal-prinċipji ġenerali msemmija fl-Artikolu 21(4), il-punt (l) meta jkunu qed iħejju l-pjanijiet ta’ prestazzjoni.

7.   Bl-għan li jittejjeb il-livell ta’ prestazzjoni tal-ġestjoni tat-traffiku tal-ajru, diversi Stati Membri jistgħu jiżviluppaw pjan konġunt ta’ prestazzjoni għas-servizzi tan-navigazzjoni bl-ajru en route u, kif xieraq, għas-servizzi tan-navigazzjoni bl-ajru fit-terminal. Dan il-pjan għandu mill-inqas ikopri d-durata ta’ perjodu referenzjarju wieħed, jinkludi mill-inqas mira ta’ prestazzjoni konġunta waħda u jinvolvi kooperazzjoni transfruntiera. Il-kooperazzjoni transfruntiera tista’ tinkludi akkwist konġunt bil-ħsieb li jittejbu l-interoperabbiltà u l-governanza konġunta sabiex jiġi ottimizzat l-użu tal-ispazju tal-ajru.

8.   L-abbozz tal-pjan ta’ prestazzjoni msemmi fil-paragrafu 1 għandu jinkludi l-informazzjoni rilevanti, b’mod partikolari t-tbassir tat-traffiku u d-data operazzjonali, ipprovduti mill-EUROCONTROL u mill-Maniġer tan-Network jew, jekk xieraq u ġustifikat u wara konsultazzjoni mal-utenti tal-ispazju tal-ajru u mal-fornituri tas-servizzi tan-navigazzjoni bl-ajru kkonċernati, previżjonijiet oħra tat-traffiku.

Meta tkun qed tħejji l-abbozz tal-pjan ta’ prestazzjoni, l-awtorità superviżorja nazzjonali għandha tikkonsulta lir-rappreżentanti tal-utenti tal-ispazju tal-ajru u, meta rilevanti, lill-awtoritajiet militari, lill-operaturi tal-ajruporti, lill-koordinaturi tal-ajruporti kif ukoll lill-awtorità kompetenti nazzjonali mingħajr preġudizzju għall-arranġamenti nazzjonali li jirriżultaw mill-Artikolu 4(5) ta’ dan ir-Regolament. Il-konformità mar-Regolament (UE) 2018/1139 u mal-atti delegati u ta’ implimentazzjoni adottati abbażi tiegħu għandha tiġi vverifikata.

9.   L-abbozz tal-pjan ta’ prestazzjoni għandu jkun fih, kif xieraq, miri ta’ prestazzjoni għas-servizzi tan-navigazzjoni bl-ajru en route fl-oqsma ewlenin ta’ prestazzjoni msemmija fl-Artikolu 21(3), il-punt (a), b’konsistenza mal-miri ta’ prestazzjoni għall-Unjoni kollha, kif ukoll miri ta’ prestazzjoni għas-servizzi tan-navigazzjoni bl-ajru fit-terminal, fl-oqsma ewlenin ta’ prestazzjoni tal-kosteffiċjenza u tal-kapaċità u, soġġett għall-kundizzjonijiet stipulati fl-Artikolu 21(3), il-punt (c)(iii), fil-qasam ewlieni tal-prestazzjoni tal-klima u tal-ambjent. L-abbozzi tal-pjanijiet ta’ prestazzjoni għandhom jinkludu deskrizzjoni dwar kif jiġu applikati l-prinċipji ġenerali msemmija fl-Artikolu 21(4), il-punt (l), għall-allokazzjoni ta’ tali kostijiet komuni.

L-abbozzi tal-pjanijiet ta’ prestazzjoni għandhom iqisu l-Pjan Regolatorju Ewropew tal-ATM, l-interdipendenzi bejn l-oqsma ewlenin ta’ prestazzjoni msemmija fl-Artikolu 21(3), il-punt (a), u ċ-ċirkostanzi lokali.

10.   Mingħajr preġudizzju għall-Artikolu 52(3), l-abbozzi tal-pjanijiet ta’ prestazzjoni adottati għandhom ikunu disponibbli għall-pubbliku.

11.   L-abbozzi tal-pjanijiet ta’ prestazzjoni adottati għandhom jiġu ppreżentati lill-Kummissjoni għall-valutazzjoni u l-approvazzjoni f’konformità mal-Artikolu 24.