Artikolu 52 Kunfidenzjalità

1.   La l-awtoritajiet superviżorji nazzjonali, li jaġixxu f’konformità mal-leġiżlazzjoni nazzjonali tagħhom, la l-awtoritajiet kompetenti nazzjonali, la l-Kummissjoni, la l-PRB, la l-Maniġer tan-Network u lanqas l-Aġenzija ma għandhom jiddivulgaw informazzjoni ta’ natura kunfidenzjali, b’mod partikolari informazzjoni dwar il-fornituri tas-servizzi tan-navigazzjoni bl-ajru, ir-relazzjonijiet kummerċjali tagħhom u l-komponenti tal-kostijiet u d-dħul tagħhom.

2.   Il-paragrafu 1 għandu jkun mingħajr preġudizzju għad-dritt ta’ divulgazzjoni mill-awtoritajiet superviżorji nazzjonali u mill-Kummissjoni meta tkun essenzjali għall-qadi ta’ dmirijiethom. F’dak il-każ din id-divulgazzjoni għandha tkun proporzjonata u għandha tirrispetta l-interessi leġittimi tal-fornituri tas-servizzi tan-navigazzjoni bl-ajru, l-utenti tal-ispazju tal-ajru, l-ajruporti jew partijiet ikkonċernati rilevanti oħra fil-protezzjoni tal-informazzjoni kummerċjalment sensittiva tagħhom.

3.   L-informazzjoni u d-data li ssir aċċessibbli skont l-Artikoli 12(4), 23(10), 24(6), 25(2), 36(3) u 36(4) jew irrapportata skont l-Artikoli 29(6), b’mod partikolari fir-rigward tal-kostijiet iddeterminati u l-kostijiet reali tal-fornituri deżinjati tas-servizzi tat-traffiku tal-ajru għandhom jiġu divulgati pubblikament, soġġett għall-protezzjoni tas-sigurtà pubblika, ta’ materji ta’ difiża u ċivili u tal-interessi kummerċjali ta’ persuna fiżika jew ġuridika, inkluż il-propjetà intellettwali, ħlief jekk ikun hemm xi interess pubbliku prevalenti fid-divulgazzjoni.