KAPITOLU VI DISPOŻIZZJONIJIET FINALI

Artikolu 50

L-Unjoni u l-Istati Membri tagħha għandhom jimmiraw għall-estensjoni tal-Ajru Uniku Ewropew għal pajjiżi li mhumiex membri tal-Unjoni Ewropea u jappoġġawha. Għal dak il-għan, għandhom jagħmlu ħilithom, fil-qafas tal-ftehimiet konklużi ma’ pajjiżi terzi ġirien b’mod partikolari fiż-żona tal-EUROCONTROL jew fir-reġjun tal-ICAO EUR, biex jestendu l-Ajru Uniku Ewropew għal dawk il-pajjiżi. Barra minn hekk, għandhom jagħmlu ħilithom biex jikkooperaw ma’ dawk il-pajjiżi jew fil-kuntest ta’ ftehimiet dwar il-forniment ta’ servizzi transfruntieri ma’ pajjiżi terzi, dwar il-kooperazzjoni fir-rigward tal-modernizzazzjoni tal-ATM, dwar il-funzjonijiet tan-network, inkella fil-qafas tal-Ftehim bejn l-Unjoni u l-EUROCONTROL li jipprovdi qafas ġenerali għal kooperazzjoni msaħħa u jsaħħaħ id-dimensjoni pan-Ewropea tal-ATM.

Dan l-Artikolu huwa mingħajr preġudizzju għad-deċiżjonijiet tal-Istati Membri dwar jekk l-Ajru Uniku Ewropew għandux jiġi estiż għall-pajjiżi u t-territorji ekstra-Ewropej tagħhom jew territorji awtonomi f’reġjuni oħra tal-ICAO.

Artikolu 51

Il-Kummissjoni tista’ titlob l-appoġġ ta’ korpi oħra għat-twettiq tal-kompiti tagħha skont dan ir-Regolament, inkluż mill-EUROCONTROL fil-qafas tal-Ftehim bejn l-Unjoni u l-EUROCONTROL li jipprovdi qafas ġenerali għal kooperazzjoni msaħħa.

Artikolu 53

L-Istati Membri għandhom jistabbilixxu regoli dwar il-penali applikabbli għal ksur ta’ dan ir-Regolament u tal-atti ta’ implimentazzjoni adottati abbażi tiegħu, b’mod partikolari mill-utenti tal-ispazju tal-ajru, l-operaturi tal-ajruporti u l-fornituri tas-servizzi tan-navigazzjoni bl-ajru, u għandhom jieħdu l-miżuri kollha meħtieġa biex jiżguraw li jiġu implimentati. Il-penali previsti għandhom ikunu effettivi, proporzjonati u dissważivi.

Artikolu 56

Ir-Regolamenti (KE) Nru 549/2004, (KE) Nru 550/2004 u (KE) Nru 551/2004 huma mħassra, mingħajr preġudizzju għall-Artikolu 58 ta’ dan ir-Regolament.

Ir-referenzi għar-Regolamenti mħassra għandhom jinftiehmu bħala referenzi għal dan ir-Regolament u għandhom jinqraw skont it-tabella ta’ korrelazzjoni fl-Anness II.