Artikolu 12 Tikkettar tal-imballaġġ

1.   Mit-12 ta’ Awwissu 2028 jew 24 xahar mid-data tad-dħul fis-seħħ tal-atti ta' implimentazzjoni adottati skont il-paragrafi 6 jew 7 ta' dan l-Artikolu, skont liema tiġi l-aħħar, l-imballaġġ imqiegħed fis-suq għandu jiġi mmarkat b'tikketta armonizzata li jkun fiha informazzjoni dwar il-kompożizzjoni materjali tiegħu sabiex tiġi ffaċilitata s-separazzjoni mill-konsumatur. It-tikketta għandha tkun ibbażata fuq pittogrammi u tkun tinftiehem faċilment, inkluż għall-persuni b'diżabbiltà. Għall-imballaġġ imsemmi fl-Artikolu 9(1) u, fejn applikabbli, l-imballaġġ imsemmi fl-Artikolu 9(2), it-tikketta għandha tindika li l-materjal huwa kompostabbli, li mhuwiex adatt għall-ikkompostjar domestiku, u li l-imballaġġ kompostabbli ma għandux jintrema fin-natura. Bl-eċċezzjoni tal-imballaġġ tal-kummerċ elettroniku, dan l-obbligu ma japplikax għall-imballaġġ għat-trasport jew għall-imballaġġ li huwa soġġett għal sistema ta' rifużjoni tad-depożitu.

L-imballaġġ imqiegħed fis-suq li jkun fih sustanzi ta’ tħassib għandu jiġi mmarkat permezz ta’ teknoloġiji standardizzati, miftuħa u tal-immarkar diġitali f’konformità mal-metodoloġija msemmija fil-paragrafu 7, it-tieni subparagrafu.

Flimkien mat-tikketta armonizzata msemmija f'dan il-paragrafu, operaturi ekonomiċi jistgħu jqiegħdu kodiċi QR jew tip ieħor ta' mezz tad-data standardizzat, miftuħ u diġitali, fuq l-imballaġġ li jkun fih informazzjoni dwar id-destinazzjoni ta' kull komponent separat tal-imballaġġ sabiex tiġi ffaċilitata s-separazzjoni mill-konsumatur.

L-imballaġġ li huwa soġġett għas-sistema ta' rifużjoni tad-depożitu kif imsemmija fl-Artikolu 50(1) għandu jiġi mmarkat b'tikketta ċara u mhux ambigwa. Minbarra t-tikketta nazzjonali, l-imballaġġ jista' jiġi mmarkat b'tikketta bil-kulur armonizzata stabbilita fl-att ta' implimentazzjoni rilevanti adottat skont il-paragrafu 6 ta' dan l-Artikolu. L-Istati Membri jistgħu jirrikjedu li l-imballaġġ li huwa soġġett għal sistemi ta' rifużjoni tad-depożitu jiġi mmarkat b'dik it-tikketta bil-kulur armonizzata, dment li dan ma jwassalx għal distorsjonijiet fis-suq intern jew ostakli għall-kummerċ għall-prodotti minn Stati Membri oħra.

2.   Imballaġġ riutilizzabbli mqiegħed fis-suq mit-12 ta’ Frar 2029 jew 30 xahar mid-data tad-dħul fis-seħħ tal-att ta' implimentazzjoni adottat skont il-paragrafu 6, skont liema tiġi l-aħħar, għandu jkollu tikketta li tinforma lill-utenti li l-imballaġġ huwa riutilizzabbli. Aktar informazzjoni dwar ir-riutilizzabbiltà, inkluż id-disponibbiltà ta' sistema lokali, nazzjonali jew fl-Unjoni kollha għall-użu mill-ġdid u informazzjoni dwar punti tal-ġbir, għandha tkun disponibbli permezz ta' kodiċi QR jew tip ieħor ta' mezz tad-data standardizzat, miftuħ u diġitali li jiffaċilita it-traċċar tal-imballaġġ u l-kalkolu ta' vjaġġi u rotazzjonijiet jew, jekk dak il-kalkolu ma jkunx fattibbli, stima medja. Barra minn hekk, l-imballaġġ għall-bejgħ riutilizzabbli għandu jiġi identifikat b'mod ċar u distint mill-imballaġġ li jintuża darba biss fil-punt tal-bejgħ.

3.   B'deroga mill-paragrafu 2 ta' dan l-Artikolu, ir-rekwiżit li jkun hemm tikketta u kodiċi QR jew tip ieħor ta' mezz tad-data standardizzat, miftuħ u diġitali ma għandux japplika għal sistemi b'ċirkwit miftuħ li ma jkollhomx operatur tas-sistema f'konformità mal-Anness VI.

4.   Meta l-imballaġġ li għalih japplika l-Artikolu 7 jitqiegħed fis-suq mit-12 ta’ Awwissu 2028 jew 24 xahar mid-data tad-dħul fis-seħħ tal-att ta' implimentazzjoni adottat skont il-paragrafu 6 ta' dan l-Artikolu, skont liema tiġi l-aħħar, u jkun immarkat b'tikketta li jkun fiha informazzjoni dwar is-sehem tal-kontenut riċiklat, dik it-tabella u, fejn applikabbli, il-kodiċi QR jew tip ieħor ta' mezz tad-data standardizzat, miftuħ u diġitali, għandhom jikkonformaw mal-ispeċifikazzjonijiet stabbiliti fl-att ta' implimentazzjoni rilevanti adottat skont il-paragrafu 6 ta’ dan l-Artikolu u għandhom ikunu bbażati fuq il-metodoloġija stabbilita skont l-Artikolu 7(8). Meta l-imballaġġ ikun immarkat b'tikketta li jkun fiha informazzjoni dwar is-sehem tal-kontenut tal-plastik b'bażi bijoloġika, dik it-tikketta għandha tikkonforma mal-ispeċifikazzjonijiet stabbiliti fl-att ta' implimentazzjoni rilevanti adottat skont il-paragrafu 6 ta’ dan l-Artikolu.

5.   It-tikketti msemmija fil-paragrafi 1, 2 u 4 u l-kodiċi QR jew tip ieħor ta' mezz tad-data standardizzat, miftuħ u diġitali msemmi fil-paragrafu 2 għandhom jitwaħħlu, jiġu stampati jew jitnaqqxu u jkunu jidhru, jistgħu jinqraw u ma jinqalgħux minn fuq l-imballaġġ, sabiex ma jkunux jistgħu jitħassru faċilment. L-informazzjoni li tinsab fihom għandha tkun disponibbli wkoll għall-utenti finali qabel ix-xiri tal-prodott permezz ta' bejgħ online. Meta tali twaħħil, stampar jew tinqix ma jkunx possibbli jew ma jkunx approvat minħabba n-natura u d-daqs tal-imballaġġ, it-tikketta, il-kodiċi QR jew il-mezz l-ieħor tad-data standardizzat, miftuħ u diġitali għandhom jitwaħħlu fuq l-imballaġġ kollettiv. Meta anki dan ma jkunx possibbli jew ma jkunx ġustifikat minħabba n-natura u d-daqs tal-imballaġġ jew meta jkun rilevanti li jiġi previst aċċess nondiskriminatorju għall-informazzjoni minn gruppi vulnerabbli, b'mod partikolari persuni b'insuffiċjenza fil-vista, l-informazzjoni għandha tiġi pprovduta permezz ta' kodiċi wieħed li jinqara elettronikament jew tip ieħor ta' mezz tad-data.

L-informazzjoni li tinsab fit-tikketti msemmija fil-paragrafi 1, 2 u 4 u l-kodiċi QR jew tip ieħor ta' mezz tad-data standardizzat, miftuħ u diġitali għandha tkun disponibbli b'lingwa waħda jew aktar li tista' tinftiehem faċilment mill-utenti finali, kif determinat mill-Istat Membru li fih l-imballaġġ għandu jitqiegħed għad-dispożizzjoni fis-suq.

Fejn l-informazzjoni tiġi pprovduta b'mezzi elettroniċi f'konformità mal-paragrafi 1, 2 u 4, għandhom japplikaw ir-rekwiżiti li ġejjin:

Meta l-liġi tal-Unjoni jirrikjedi li l-informazzjoni dwar il-prodott fl-imballaġġ tiġi pprovduta permezz ta' mezz tad-data, għandu jintuża mezz tad-data wieħed biex jipprovdi l-informazzjoni meħtieġa għall- prodott fl-imballaġġ u għall-imballaġġ, u t-tnejn għandhom ikunu jistgħu jintgħarfu faċilment.

6.   Sat-12 ta’ Awwissu 2026, il-Kummissjoni għandha tadotta atti ta' implimentazzjoni biex tistabbilixxi tikketta u speċifikazzjonijiet armonizzati għar-rekwiżiti u l-formati tat-tikkettar, inkluż meta previst permezz ta' mezzi diġitali, għat-tikkettar tal-imballaġġ imsemmi fil-paragrafi 1, 2 u 4 ta' dan l-Artikolu. Meta tiżviluppa dawk l-atti ta' implimentazzjoni, il-Kummissjoni għandha tqis l-ispeċifiċitajiet tal-imballaġġ kompost. Meta tiżviluppa t-tikketta armonizzata għall-imballaġġ soġġett għas-sistemi ta' rifużjoni tad-depożitu msemmija fl-Artikolu 50(2), il-Kummissjoni għandha tqis kwalunkwe varjazzjoni li teżisti fid-depożitu impost mill-Istati Membri. Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 65(2).

7.   Sat-12 ta’ Awwissu 2026, il-Kummissjoni għandha tadotta atti ta' implimentazzjoni biex tistabbilixxi l-metodoloġija għall-identifikazzjoni tal-kompożizzjoni materjali tal-imballaġġ imsemmi fil-paragrafu 1 permezz ta' teknoloġiji tal-immarkar standardizzati, miftuħa u diġitali, inkluż għall-imballaġġ kompost u komponenti integrati jew separati tal-imballaġġ.

Sal-1 ta' Jannar 2030, il-Kummissjoni għandha tadotta wkoll atti ta’ implimentazzjoni sabiex tistabbilixxi l-metodoloġija għall-identifikazzjoni ta' sustanzi ta' tħassib permezz ta' teknoloġiji tal-immarkar standardizzati, miftuħa u diġitali. Dik il-metodoloġija għandha tiżgura li l-immarkar jinkludi mill-inqas l-isem u l-konċentrazzjoni tas-sustanza ta' tħassib preżenti f'kull materjal f'unità tal-imballaġġ.

Dawk l-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 65(2).

8.   Mingħajr preġudizzju għar-rekwiżiti li jikkonċernaw tikketti armonizzati oħra tal-UE, l-operaturi ekonomiċi ma għandhomx jipprovdu jew juru tikketti, marki, simboli jew skrizzjonijiet li x'aktarx iqarrqu jew jikkonfondu lill-konsumaturi jew utenti finali oħra fir-rigward tar-rekwiżiti tas-sostenibbiltà għall-imballaġġ, karatteristiċi oħra tal-imballaġġ jew għażliet oħra ta' mmaniġġar tal-iskart mill-imballaġġ li għalihom ġie stabbilit tikkettar armonizzat f'dan ir-Regolament. Il-Kummissjoni għandha, fejn xieraq, tadotta linji gwida sabiex tiċċara aspetti li x'aktarx iqarrqu jew jikkonfondu lill-konsumaturi jew utenti finali oħra.

9.   Sat-12 ta’ Frar 2027, l-imballaġġ inkluż fi skema ta' responsabbiltà estiża tal-produttur jista’ jiġi identifikat fit-territorju kollu tal-Istati Membri li fihom dik l-iskema jew dik is-sistema tapplika. Tali identifikazzjoni għandha tinkiseb biss permezz ta' simbolu li jikkorrispondi f'kodiċi QR jew teknoloġija oħra tal-immarkar standardizzata, miftuħa u diġitali sabiex jintwera li l-produttur jissodisfa l-obbligi tiegħu ta' responsabbiltà estiża tal-produttur. Dak is-simbolu għandu jkun ċar u mhux ambigwu u ma għandux iqarraq lill-konsumaturi jew utenti finali oħra fir-rigward tar-riċiklabbiltà jew ir-riutilizzabbiltà tal-imballaġġ.

10.   L-imballaġġ kopert minn sistema ta' rifużjoni tad-depożitu differenti minn dik imsemmija fl-Artikolu 50(1) jista', skont il-liġi nazzjonali, jiġi identifikat permezz tas-simbolu korrispondenti fit-territorju kollu li fih tapplika dik l-iskema jew sistema. Dak is-simbolu għandu jkun ċar u mhux ambigwu u ma għandux iqarraq lill-konsumaturi jew utenti finali oħra fir-rigward tar-riċiklabbiltà jew ir-riutilizzabbiltà tal-imballaġġ fl-Istati Membri fejn għandu jiġi ritornat. L-Istati Membri ma għandhomx jipprojbixxu t-twaħħil ta' tikketti relatati mas-sistemi ta' rifużjoni tad-depożitu fis-seħħ fi Stati Membri oħra.

11.   Dan l-Artikolu ma għandux japplika għall-imballaġġ immedjat u ta' barra kif definit fir-Regolamenti (UE) 2017/745, (UE) 2017/746 u (UE) 2019/6 u fid-Direttiva 2001/83/KE, jekk ma jkun hemm l-ebda spazju fuq l-imballaġġ minħabba rekwiżiti oħra ta' tikkettar kif definit f'dawk l-atti leġiżlattivi tal-Unjoni jew jekk it-tikkettar tal-imballaġġ jista' jipperikola l-użu sikur ta' prodotti mediċinali għall-użu mill-bniedem jew ta' prodotti mediċinali veterinarji.

12.   L-imballaġġ kif imsemmi fil-paragrafi 1, 2 u 4 li jiġi mmanifatturat fl-Unjoni jew importat qabel l-iskadenzi msemmija f'dawk il-paragrafi u li ma jikkonformax mal-kriterji stabbiliti f'dawk il-paragrafi jista' jitqiegħed għad-dispożizzjoni fis-suq sa 3 snin mid-data tad-dħul fis-seħħ tar-rekwiżiti tat-tikkettar stabbiliti f'dawk il-paragrafi.