12.2. Achoimre ar thorthaí, scóráil agus bearta maoirseachta

I ndiaidh an mheasúnaithe thuas, ba cheart d'údaráis inniúla teacht ar thuairim foriomlán maidir le príomhrioscaí an TCB. Ba cheart an tuairim seo a léiriú in achoimre bhliantúil ar mheasúnú foriomlán SREP, agus scór inmharthanachta bunaithe ar na breithniúcháin a shonraítear i dtábla 21 a bheith ag gabháil leis. Ba cheart go n-áireofaí san achoimre bhliantúil freisin aon torthaí maoirseachta a rinneadh le linn na 12 mhí roimhe sin. Tábla 21. Breithniúcháin mhaoirseachta maidir le scór foriomlán SREP a shannadh Scór Tuairim mhaoirseachta Breithniúcháin

Féadfaidh údaráis inniúla, ar bhonn na leochaileachtaí agus na n-easnamh a sainaithníodh sa mheasúnú ar ghnéithe SREP le haghaidh TCBanna, bearta maoirseachta a fhorchur lena gceanglaítear ar an TCB an méid seo a leanas a dhéanamh:

• a. suim dearlaice caipitil a choinneáil ar mó é ná na híoscheanglais atá leagtha síos in Airteagal 48e de Threoir 2013/36/AE;
• b. srian a chur le foirm na n-ionstraimí a cheadaítear i gcomhréir le Treoirlínte an ÚBE maidir le hionstraimí atá ar fáil do bhrainsí tríú tír lena n-úsáid gan srian agus láithreach chun rioscaí nó caillteanais a chlúdach i gcomhréir le hAirteagal 48e(2)(c) de Threoir 2013/36/AE, leis na hionstraimí ó dhlínse ar leith nó leis na hionstraimí atá ainmnithe in airgeadra ar leith;
• c. coinníollacha oibríochtúla a thabhairt isteach sa bhreis orthu sin i gcomhréir le Treoirlínte an ÚBE maidir le hionstraimí atá ar fáil do bhrainsí tríú tír lena n-úsáid gan srian agus láithreach chun rioscaí nó caillteanais a chlúdach i gcomhréir le hAirteagal 48e(2)(c) de Threoir 2013/36/AE;
• d. ceanglais shonracha leachtachta eile a chomhlíonadh sa bhreis ar na ceanglais a leagtar síos in Airteagal 48f de Threoir 2013/36/AE;
• e. a socruithe rialachais, bainistithe riosca nó clárúcháin a atreisiú;
• f. raon feidhm a ngnó nó na ngníomhaíochtaí a dhéanann siad a shrianadh nó a theorannú, mar aon le contrapháirtithe na ngníomhaíochtaí sin a shrianadh nó a theorannú;
• g. an riosca atá ina dhlúthchuid dá ngníomhaíochtaí, dá dtáirgí agus dá gcórais, lena n-áirítear gníomhaíochtaí seachfhoinsithe, a laghdú agus scor de bheith ag gabháil do ghníomhaíochtaí den sórt sin nó scor de bheith ag tairiscint táirgí den sórt sin;
• h. ceanglais bhreise tuairiscithe a chomhlíonadh i gcomhréir le hAirteagal 48k(3) nó minicíocht an tuairiscithe thráthrialta a mhéadú;
• i. nochtuithe poiblí a dhéanamh;
• j. Ar bonn cáis, agus tar éis féachaint do na critéir in Airteagal 48i(1) de Theoir 2013/36/AE, féadfaidh údaráis inniúla a cheangal ar an TCB iarratas a dhéanamh ar údarú mar fhochuideachta i gcomhréir le Teideal III, Caibidil 1 den Treoir. Áirítear leis seo cás ina measann an t-údarás inniúil go bhfuil tábhacht chórasach ag baint leis an gTCB nó go gcruthaíonn sé rioscaí suntasacha cobhsaíochta airgeadais i gcomhréir le hAirteagal 48j de Threoir 2013/36/AE.

I gcás TCBanna a bhfuil tábhacht chórasach leo, féadfaidh na húdaráis inniúla na nithe seo a leanas a bhreithniú freisin:

• a) A cheangal ar an TCB a shócmhainní nó a ghníomhaíochtaí a struchtúrú ar bhealach a fhágann go scoireann sé de bheith cáilithe mar TCB a bhfuil tábhacht chórasach leis nó nach gcruthaíonn sé níos mó riosca iomarcach do chobhsaíocht airgeadais an Aontais nó an Bhallstáit ina bhfuil sé bunaithe;
• b) ceanglais bhreise stuamachta – lena n-áirítear ceanglais rialachais – a fhorchur ar an TCB.

Ba cheart d’údaráis inniúla torthaí an mheasúnaithe SREP a chur in iúl do bhainistíocht an bhrainse tríú tír agus iad a chur ar an eolas faoi aon ghníomhaíocht nach foláir don bhrainse tríú tír a dhéanamh chun na bearta maoirseachta a cuireadh i bhfeidhm bunaithe ar na torthaí a chomhlíonadh. Ba cheart d’údaráis inniúla torthaí mheasúnú SREP a chur in iúl, lena n‑áirítear aon bhearta maoirseachta a cuireadh i bhfeidhm maidir leis an údarás atá freagrach as maoirseacht a dhéanamh ar an máthairghnóthas i gcomhréir leis na comhaontuithe riaracháin nó leis na socruithe eile a tugadh i gcrích i gcomhréir le hAirteagal 48c(2) de Threoir 2013/36/AE.