12.2. Sommarju tas-sejbiet, punteġġ u miżuri superviżorji

Wara l-valutazzjoni ta’ hawn fuq, l-awtoritajiet kompetenti għandhom jiffurmaw fehma ġenerali dwar ir-riskji ewlenin tat-TCB. Din il-perspettiva għandha tkun riflessa f’sommarju annwali tal-valutazzjoni globali tal-SREP, akkumpanjata minn punteġġ ta’ vijabbiltà bbażat fuq il-kunsiderazzjonijiet speċifikati fit-tabella 21. Is-sommarju annwali għandu jinkludi wkoll kwalunkwe sejba superviżorja magħmula matul it-12-il xahar preċedenti. Tabella 21. Kunsiderazzjonijiet superviżorji biex jiġi assenjat il-punteġġ globali tal-SREP Punteġġ Perspettiva superviżorja Kunsiderazzjonijiet

L-awtoritajiet kompetenti jistgħu, abbażi tal-vulnerabbiltajiet u n-nuqqasijiet identifikati fil-valutazzjoni tal-elementi tal-SREP għat-TCBs, jimponu miżuri superviżorji li jirrikjedu li t-TCB:

• a. iżżomm ammont ta’ dotazzjoni kapitali li jaqbeż ir-rekwiżiti minimi stabbiliti fl-Artikolu 48e tad-Direttiva 2013/36/UE;
• b. tirrestrinġi l-forma tal-istrumenti permessi f’konformità mal-Linji Gwida tal-EBA dwar l-istrumenti disponibbli għal fergħat ta’ pajjiżi terzi għal użu mhux ristrett u immedjat biex ikopru r-riskji jew it-telf f’konformità mal-Artikolu 48e(2)(c) tad-Direttiva 2013/36/UE, l-istrumenti minn ġuriżdizzjoni partikolari jew l-istrumenti denominati f’munita partikolari;
• c. tintroduċi kundizzjonijiet operazzjonali addizzjonali għal dawk f’konformità mal-Linji Gwida tal-EBA dwar l-istrumenti disponibbli għal fergħat ta’ pajjiżi terzi għal użu mhux ristrett u immedjat biex ikopru r-riskji jew it-telf f’konformità mal-Artikolu 48e(2)(c) tad-Direttiva 2013/36/UE;
• d. tissodisfa rekwiżiti ta’ likwidità speċifiċi oħrajn minbarra r-rekwiżiti stabbiliti fl-Artikolu 48f tad-Direttiva 2013/36/UE;
• e. tirrinforza l-governanza, l-immaniġġjar tar-riskju jew l-arranġamenti ta’ reġistrazzjoni tagħha;
• f. tirrestrinġi jew tillimita l-ambitu tan-negozju tagħha jew tal-attivitajiet li twettaq, kif ukoll il-kontropartijiet għal dawk l-attivitajiet;
• g. tnaqqas ir-riskju inerenti fl-attivitajiet, il-prodotti u s-sistemi tagħha, inklużi l-attivitajiet esternalizzati, u tieqaf tinvolvi ruħha f’tali attivitajiet jew toffri tali prodotti;
• h. tikkonforma ma’ rekwiżiti ta’ rapportar addizzjonali f’konformità mal-Artikolu 48k(3) jew iżżid il-frekwenza tar-rapportar regolari;
• i. tagħmel divulgazzjonijiet pubbliċi;
• j. Fuq bażi ta’ każ b’każ u wara li jkunu kkunsidraw il-kriterji fl-Artikolu 48i(1) tad-Direttiva 2013/36/UE, l-awtoritajiet kompetenti jistgħu jitolbu lit-TCB biex tapplika għall-awtorizzazzjoni bħala sussidjarja f’konformità mat-Titolu III, il-Kapitolu 1 tad-Direttiva. Dan jinkludi fejn l-awtorità kompetenti tivvaluta li t-TCB hija ta’ importanza sistemika jew tippreżenta riskji sinifikanti għall-istabbiltà finanzjarja f’konformità mal-Artikolu 48j tad-Direttiva 2013/36/UE.

Għal TCBs ta’ importanza sistemika, l-awtoritajiet kompetenti jistgħu wkoll jikkunsidraw:

• a) Jirrikjedu li t-TCB tistruttura l-assi jew l-attivitajiet tagħha b’tali mod li ma tibqax tikkwalifika bħala ta’ importanza sistemika jew li ma tibqax tippreżenta riskju bla bżonn għall-istabbiltà finanzjarja tal-Unjoni jew tal-Istat Membru fejn tkun stabbilita;
• b) li jimponu rekwiżiti prudenzjali addizzjonali – inkluża l-governanza – fuq it-TCB.

L-awtoritajiet kompetenti għandhom jikkomunikaw l-eżiti tal-valutazzjoni tal-SREP lill-maniġment tal-fergħa ta’ pajjiż terz u jinformawhom dwar kwalunkwe azzjoni li l-fergħa ta’ pajjiż terz għandha tieħu biex tikkonforma mal-miżuri superviżorji applikati abbażi tas-sejbiet. L-awtoritajiet kompetenti għandhom jikkomunikaw l-eżiti tal-valutazzjoni tal-SREP inkluż kwalunkwe miżura superviżorja applikata lill-awtorità responsabbli għas-superviżjoni tal-impriża prinċipali f’konformità mal-ftehimiet amministrattivi jew arranġamenti oħra konklużi f’konformità mal-Artikolu 48c(2) tad-Direttiva 2013/36/UE.