5.3 Próiseas aitheantais ar an leibhéal aonair agus ar leibhéal comhdhlúite

Agus na catagóirí ball foirne faoi Airteagal 30(1) de Threoir (AE) 2019/2034 á sainaithint, ba cheart do ghnólachtaí infheistíochta na critéir cháilíochtúla agus chainníochtúla um aitheantas a chuimsítear sa CTR maidir le bhaill foirne shainaitheanta agus na critéir bhreise sin arna socrú ag na gnólachtaí infheistíochta araon a chur i bhfeidhm, ar bhonn aonair, ag baint úsáid as na figiúirí agus staid an ghnólachta infheistíochta aonair á chur san áireamh, agus ar bhonn comhdhlúite chomh maith. Ar bhonn comhdhlúite, ba cheart don mháthairghnóthas de chuid an Aontais na critéir a chur i bhfeidhm agus úsáid á baint as na figiúirí comhdhlúite agus an staid chomhdhlúite agus an tionchar ar phróifíl riosca na ngnólachtaí infheistíochta á gcur san áireamh ar bhonn comhdhlúite.

Agus critéir cháilíochta um aitheantas á gcur i bhfeidhm ar an leibhéal comhdhlúite, ní ghabhtar baill foirne i bhfochuideachta ach amháin má tá siad freagrach as na feidhmeanna dá dtagraítear sna critéir sin ar bhonn comhdhlúite. Mar shampla, níor cheart ball foirne i bhfochuideachta atá ina chomhalta nó ina comhalta de chomhlacht bainistíochta na fochuideachta sin a ghabháil leis an gcritéar ‘tá an ball foirne ina chomhalta nó ina comhalta den chomhlacht bainistíochta ina fheidhm bhainistíochta’ ach amháin más comhalta de chomhlacht bainistíochta an mháthairghnólachta infheistíochta de chuid AE é nó í freisin.

Agus critéir chainníochtúla um aitheantas á gcur i bhfeidhm ar bhonn comhdhlúite, ba cheart do ghnólachtaí infheistíochta an luach saothair ar fad a dhámhtar ar bhall foirne laistigh de raon feidhme iomlán an chomhdhlúthaithe stuamachta a chur san áireamh.

Agus critéir cháilíochtúla um aitheantas á gcur i bhfeidhm acu, ba cheart do ghnólachtaí infheistíochta na baill foirne atá freagrach as an bhfeidhm atá ainmnithe sna critéir cháilíochtúla a shainaithint; ní hé ainm na feidhme an príomhchritéar maidir le sainaithint ach an t-údarás agus an fhreagracht a thugtar don fheidhm.