14.1.3 Critéir shonracha maidir le feidhmeanna rialaithe

I gcás go bhfaigheann baill foirne feidhmeanna rialaithe luach saothair inathraithe, ba cheart é a mheas agus an chuid inathraithe den luach saothair a chinneadh ar leithligh ó na haonaid ghnó a rialaíonn siad, lena n-áirítear an fheidhmíocht a thagann as cinntí gnó (e.g. faomhadh táirgí nua) i gcás go bhfuil an fheidhm rialaithe bainteach leis.

Ba cheart go mbeadh na critéir a úsáidtear chun feidhmíocht agus rioscaí a mheasúnú bunaithe go príomha ar chuspóirí na bhfeidhmeanna rialaithe inmheánaigh. Ba cheart go leanfadh luach saothair inathraithe le haghaidh feidhmeanna rialaithe cuspóirí rialaithe go príomha. D’fhéadfadh sé go mbeadh a luach saothair inathraithe bunaithe go pointe áirithe ar fheidhmíocht an ghnólachta infheistíochta ina iomláine. Ba cheart don ghnólacht infheistíochta breathnú ar chóimheas suntasach níos ísle a shocrú idir comhpháirteanna inathraithe an luach saothair agus comhpháirteanna seasta an luach saothair le haghaidh feidhmeanna rialaithe i gcomparáid leis na haonaid ghnó a rialaíonn siad.

Má tá ceann na feidhme bainistíochta riosca (Príomhoifigeach Riosca nó CRO), i gcás go bhfuil sé curtha ar bun, ina chomhalta den chomhlacht bainistíochta chomh maith, ba cheart go mbeadh feidhm ag na prionsabail atá leagtha amach i míreanna 226 agus 227 maidir le luach saothair an CRO freisin.

I gcás nach mbunaíonn agus nach gcoimeádann gnólacht infheistíochta feidhm iniúchóireachta nó bainistithe riosca, ba cheart go mbeadh sé ábalta a léiriú arna iarraidh sin air nach ndéantar foráil sna critéir feidhmíochta do bhaill foirne atá i gceannas ar na próisis ghaolmhara i leith dreasachtaí chun na próisis rialaithe a fheidhmiú go míchuí.