11.2. Elementi ewlenin tal-ittestjar tal-istress superviżorju

Meta jiddeċiedu dwar l-elementi ewlenin tal-ittestjar tal-istress superviżorju, l-awtoritajiet kompetenti għandhom iqisu, inter alia , dan li ġej:

• a. il-kopertura, f’termini ta’ kopertura ta’ ċerti fatturi ta’ riskju jew fatturi ta’ riskju multiplu, ċerti portafolli individwali jew attivitajiet jew setturi/ġeografiji, il-portafolli kollha jew diversi;
• b. id-disinn, f’termini ta’ dan li ġej: analiżi tas-sensittività b’fattur wieħed jew sempliċi b’ħafna fatturi, ittestjar tal-istress tas-solvenza jew fuq il-likwidità, reverse stress testing jew analiżi ta’ xenarji fuq żmien medju sa twil. L-awtoritajiet kompetenti għandhom jagħżlu d-disinn li huwa l-aktar xieraq għall-objettiv segwit mit-test tal-istress;
• c. ambitu, f’termini ta’ kopertura tal-perimetru tal-gruppi transfruntieri, billi jiġi żgurat li jiġu kkunsidrati l-entitajiet kollha rilevanti tal-grupp;
• d. kampjun ta’ istituzzjonijiet koperti mit-testijiet tal-istress: meta jippjanaw l-ittestjar tal-istress superviżorju, l-awtoritajiet kompetenti għandhom iqisu l-kampjun xieraq għall-finijiet tal-eżerċizzju, b’mod partikolari meta jużaw l-ittestjar tal-istress superviżorju għal valutazzjonijiet tematiċi ta’ ċerti linji operatorji/mudelli jew studji tal-impatt/valutazzjonijiet.
• e. approċċ, jiġifieri test tal-istress minn fuq għal isfel, test tal-istress minn isfel għal fuq, kombinazzjoni tat-tnejn, il-preskrizzjoni ta’ xenarji ankra speċifiċi għall-istituzzjonijiet.

Meta jfasslu u jwettqu testijiet tal-istress superviżorji għall-finijiet tal-SREP, l-awtoritajiet kompetenti għandhom jikkunsidraw l-eżiti ta’ analiżijiet tal-kwalità tal-assi (AQR), fejn disponibbli, xierqa u mhux diġà inkorporati fid-dikjarazzjonijiet finanzjarji tal-istituzzjonijiet. Il-kombinazzjoni tal-ittestjar tal-istress superviżorju mal-AQRs tista’ titqies utli sabiex jiġi żgurat li l-pożizzjonijiet fuq il-karta bilanċjali tal-istituzzjonijiet koperti mit-testijiet tal-istress superviżorji jiġu rrapportati b’mod preċiż b’punti ta’ tluq imtejba u komparabbli fl-istituzzjonijiet parteċipanti kollha.