Artikolu 32 Stabbiliment tal-imposti

1.   L-utenti tal-ispazju tal-ajru għandhom iġarrbu imposti għall-forniment tas-servizzi tan-navigazzjoni bl-ajru, b’kundizzjonijiet nondiskriminatorji, li jkunu jqisu l-kapaċitajiet produttivi relattivi tat-tipi differenti ta’ inġenji tal-ajru kkonċernati. Meta utenti differenti tal-ispazju tal-ajru jġarrbu imposti għall-użu tal-istess servizzi, ma għandha ssir l-ebda distinzjoni minħabba n-nazzjonalità jew il-kategorija tal-utent.

2.   L-imposta en route għas-servizzi tan-navigazzjoni bl-ajru għal titjira partikolari f’żona ta’ imposti en route partikolari għandha tiġi kkalkulata abbażi tar-rata unitarja stabbilita għal dik iż-żona tal-imposti en route u l-unitajiet tas-servizzi en route għal dik it-titjira.

3.   L-imposta fit-terminal għas-servizzi tan-navigazzjoni bl-ajru għal titjira partikolari f’żona tal-imposti tat-terminal partikolari għandha tiġi kkalkulata abbażi tar-rata unitarja stabbilita għal dik iż-żona ta’ imposti fit-terminal u l-unitajiet tas-servizzi tat-terminal għal dik it-titjira. Għall-fini tal-kalkolu tal-imposta fit-terminal, l-avviċinament u t-tluq ta’ titjira għandhom jgħoddu bħala titjira waħda.

4.   Ċerti utenti tal-ispazju tal-ajru jew titjiriet, speċjalment dawk li jużaw jew isiru permezz ta’ inġenji tal-ajru ħfief u inġenji tal-ajru tal-Istat, jistgħu jiġi eżentati minn imposti fuq in-navigazzjoni bl-ajru, dment li l-kost ta’ dik l-eżenzjoni ma jkunx kopert minn riżorsi oħra u ma jgħaddix għand utenti oħra tal-ispazju tal-ajru.

5.   Il-Kummissjoni għandha twettaq, f’konsultazzjoni mal-Istati Membri, mal-fornituri tas-servizzi tat-traffiku tal-ajru u mal-utenti tal-ispazju tal-ajru, studju dwar il-kontribut tal-modulazzjoni tal-imposti għall-kisba tal-objettivi tal-Ajru Uniku Ewropew, definiti fl-Artikolu 1(1) ta’ dan ir-Regolament, u tar-Regolament (UE) 2021/1119. Dan l-istudju għandu jivvaluta wkoll il-fattibbiltà ta’ dik il-modulazzjoni u l-impatt tagħha fuq it-traffiku tal-ajru, il-forniment tas-servizzi, il-kostijiet amministrattivi u l-partijiet ikkonċernati.

6.   Ir-riżultat tal-istudju msemmi fil-paragrafu 5 ta’ dan l-Artikolu jipprovdi l-informazzjoni essenzjali għall-Kummissjoni biex tiddetermina jekk għandhiex tadotta att ta’ implimentazzjoni f’konformità mal-Artikolu 48(3), biex tiżgura l-applikazzjoni uniformi tal-modulazzjoni tal-imposti en route biex tħeġġeġ lill-utenti tal-ispazju tal-ajru jappoġġaw titjib fil-prestazzjoni klimatika u ambjentali, bħall-użu tal-aktar rotot effiċjenti fl-użu tal-fjuwil disponibbli, użu akbar ta’ teknoloġiji alternattivi ta’ propulsjoni nadifa, inkluż fjuwils alternattivi sostenibbli, filwaqt li jinżamm livell ottimali ta’ sikurezza.

7.   Il-modulazzjoni msemmija fil-paragrafu 6 għandha tikkonsisti f’vantaġġi jew żvantaġġi finanzjarji u għandha tkun newtrali fir-rigward tad-dħul għall-fornituri tas-servizzi tat-traffiku tal-ajru.

8.   Minbarra l-modulazzjoni tal-imposti msemmija fil-paragrafu 6, l-imposti jistgħu jiġu modulati mill-Istati Membri biex iħeġġu lill-fornituri tas-servizzi tat-traffiku tal-ajru u lill-utenti tal-ispazju tal-ajru jappoġġaw titjib fil-kwalità tas-servizz bħal żieda fil-kapaċità, tnaqqis fid-dewmien imnaqqas u żvilupp sostenibbli.