7. Catagóirí an luach saothair

Faoi Threoir (AE) 2019/2034, is ionann luach saothair agus luach saothair seasta nó luach saothair athraithe; níl aon tríú catagóir luach saothair ann. Gan dochar do chur chun feidhme náisiúnta um tharscaoileadh faoi mhíreanna (4) go (7) d’Airteagal 32 de Threoir (AE) 2019/2034, i gcás go bhfuil luach saothair inathraithe agus go n-íoctar leis na baill foirne shainaitheanta é, ní mór ceanglais uile Airteagal 32 de Threoir (AE) 2019/2034 a chomhlíonadh freisin i dteannta leis na ceanglais ghinearálta in Airteagal 26 agus in Airteagal 30 de. Chun na críche sin, ba cheart do ghnólachtaí infheistíochta comhpháirteanna an luach saothair a leithdháileadh ar luach saothair seasta nó ar luach saothair inathraithe agus ba cheart go leagfaí amach ina mbeartais luach saothair critéir atá soiléir, oibiachtúil, réamhchinnte agus trédhearcach chun na comhpháirteanna uile luach saothair a shannadh do na catagóirí seasta nó na catagóirí inathraithe i gcomhréir leis na treoirlínte seo.

I gcás nach féidir comhpháirt a leithdháileadh go soiléir ar an luach saothair seasta bunaithe ar na critéir dá bhforáiltear sna treoirlínte seo, ba cheart é a mheas mar luach saothair inathraithe.

Bíonn luach saothair seasta i gcás go mbaineann an méid seo a leanas lena choinníollacha maidir lena dhámhachtain agus lena mhéid:

• a. tá siad bunaithe ar chritéir réamhchinntithe;
• b. tá siad neamhroghnach, ag teacht le leibhéal na taithí gairmiúla agus sinsearacht na foirne;
• c. tá siad trédhearcach maidir leis an méid aonair a dhámhtar ar an mball foirne aonair;
• d. tá siad buan, i.e. coinnítear ar bun iad thar thréimhse atá ceangailte leis an ról sonrach agus leis na freagrachtaí eagraíochtúla;
• e. tá siad neamh-inchúlghairthe; ní athraítear an méid buan ach trí chómhargáil nó i ndiaidh athchaibidlíochta i gcomhréir leis na critéir náisiúnta maidir le pá a shocrú;
• f. ní féidir leis an ngnólacht infheistíochta iad a laghdú, a chur ar fionraí ná a chur ar ceal;
• g. ní sholáthraítear dreasachtaí le haghaidh glacadh riosca leo; agus
• h. ní bhraitheann siad ar fheidhmíocht. EBA Public

Measfar gur luach saothair seasta iad comhpháirteanna luach saothair atá ina gcuid de bheartas ginearálta gnólachta infheistíochta i gcás go gcomhlíonann siad na coinníollacha a liostaítear i mír 128 nó íocaíochtaí atá éigeantach faoin dlí náisiúnta. Áirítear leis sin íocaíochtaí atá ina gcuid de ghnáthphacáistí fostaíochta mar atá sainmhínithe sna treoirlínte seo.

Ba cheart na comhpháirteanna luach saothair seo a leanas a mheas mar chomhpháirteanna seasta chomh maith, i gcás ina ndéileáiltear ar bhealach comhsheasmhach le gach cás comhchosúil:

• a. luach saothair a íoctar le baill foirne easaoránacha i bhfianaise na gcostas maireachtála agus na rátaí cánach i dtír eile;
• b. liúntais a úsáidtear chun an bunphá seasta a mhéadú i gcásanna ina n-oibríonn baill foirne thar lear agus ina bhfaigheann siad níos lú luach saothair ná mar a d’íocfaí ar an margadh fostaíochta áitiúil i gcomhair post inchomparáide i gcás go gcomhlíontar gach ceann de na coinníollacha sonracha seo a leanas:
• i. íoctar an liúntas ar bhonn neamh-idirdhealaitheach leis na baill foirne ar fad atá i gcás comhchosúil;
• ii. déantar an liúntas a dhámhachtain toisc go n-oibríonn baill foirne go sealadach thar lear nó i bpost difriúil lena mbaineann leibhéal luach saothair a chaithfear a choigeartú chun teacht leis na leibhéil phá sa mhargadh ábhartha;
• iii. tá leibhéal na n-íocaíochtaí breise bunaithe ar chritéir réamhchinntithe;
• iv. tá fad an liúntais ceangailte le fad an staid dá dtagraítear thuas.