5.1 Coistí a chur ar bun

I gcomhréir le hAirteagal 28 de IFD agus mura sonraítear a mhalairt sa dlí náisiúnta,¹² ní mór do ghnólachtaí infheistíochta, i gcás ina bhfuil luach a sócmhainní laistigh agus lasmuigh den chlár comhardaithe níos mó ná EUR 100 milliún ar an meán thar an tréimhse ceithre bliana díreach roimh an mbliain airgeadais áirithe sin, coistí riosca agus luacha saothair a bhunú chun comhairle a chur ar an gcomhlacht bainistíochta maidir lena fheidhm mhaoirseachta agus chun cinntí a bheidh le déanamh ag an gcomhlacht sin a ullmhú.

¹² Ceanglaíonn Airteagal 28 de Threoir (AE) 2019/2034 ar ghnólachtaí infheistíochta nach gcomhlíonann na critéir a leagtar amach i bpointe (a) d’Airteagal 32(4), coiste riosca a bhunú ina mbeidh comhaltaí den chomhlacht bainistíochta nach ndéanann aon fheidhm feidhmiúcháin sa ghnólacht infheistíochta lena mbaineann.

Sa chás nach mbunaítear aon choiste riosca, ba cheart na tagairtí sna treoirlínte seo don choiste sin a fhorléiriú mar thagairtí don chomhlacht bainistíochta ina fheidhm mhaoirseachta.

Féadfaidh gnólachtaí infheistíochta, agus na critéir a leagtar amach i dTeideal I de na treoirlínte sin á gcur san áireamh, coistí eile a bhunú (e.g. frithsciúradh airgid/cistiú frithsceimhlitheoireachta (AML/CTF), coistí eitice, iompair agus um chomhlíonadh).

Ba cheart do ghnólachtaí infheistíochta leithdháileadh soiléir na ndualgas agus na gcúraimí idir coistí speisialaithe an chomhlachta bainistíochta a áirithiú. Ba cheart go mbeadh sainordú doiciméadaithe ag gach coiste, lena n-áirítear raon feidhme a fhreagrachtaí, ón gcomhlacht bainistíochta ina fheidhm mhaoirseachta agus ba cheart nósanna imeachta oibre iomchuí a bhunú.

Ba cheart do na coistí tacú leis an bhfeidhm mhaoirseachta i réimsí sonracha agus forbairt agus cur chun feidhme creata rialachais inmheánaigh fhónta a éascú. Níor cheart, trí tharmligean a dhéanamh chuig coistí, an comhlacht bainistíochta a scaoileadh ina fheidhm mhaoirseachta óna dhualgais agus ón a fhreagrachtaí a chomhlíonadh go comhpháirteach.