5.3 Próisis na gCoistí

Ba cheart do choistí tuairisciú go tráthrialta don chomhlacht bainistíochta ina fheidhm mhaoirseachta.

Ba cheart do choistí idirghníomhú lena chéile de réir mar is iomchuí. Gan dochar do mhír 51, d’fhéadfadh idirghníomhú den sórt sin tarlú i bhfoirm tras-rannpháirtíochta, ionas go bhféadfadh an cathaoirleach nó comhalta den choiste a bheith ina chomhalta nó ina comhalta de choiste eile freisin.

Ba cheart do chomhaltaí na gcoistí páirt a ghlacadh i bplé oscailte agus criticiúil, agus ba cheart tuairimí easaontacha a phlé ar bhealach cuiditheach.

Ba cheart do na coistí cláir oibre chruinnithe na gcoistí agus a bpríomhthorthaí agus conclúidí a dhoiciméadú.

Ba cheart go mbeadh an méid seo a leanas ar fáil don choiste riosca:

• a. rochtain ar an bhfaisnéis agus ar na sonraí ábhartha uile is gá chun a ról a chomhlíonadh, lena n-áirítear faisnéis agus sonraí ó fheidhmeanna ábhartha corparáideacha agus rialaithe (e.g. dlí, airgeadas, acmhainní daonna, TF, iniúchadh inmheánach, riosca agus comhlíonadh, lena n-áirítear faisnéis maidir le comhlíonadh AML/CTF agus faisnéis chomhiomlánaithe maidir le tuarascálacha ar idirbhearta amhrasacha, agus fachtóirí riosca ML/TF);
• b. tuarascálacha rialta, faisnéis, teachtaireachtaí agus tuairimí ad hoc a fháil ó chinn feidhmeanna rialaithe inmheánaigh maidir le próifíl riosca reatha an ghnólachta infheistíochta, a chultúr riosca agus a theorainneacha riosca, chomh maith le haon sáruithe ábhartha¹⁶ a tharla, agus faisnéis mhionsonraithe agus moltaí maidir le bearta ceartaitheacha a glacadh, a bheidh le déanamh nó le moladh chun déileáil leo; athbhreithniú agus cinneadh a dhéanamh go tráthrialta maidir le hábhar, formáid agus minicíocht na faisnéise maidir leis an riosca a bheidh le tuairisciú dó; agus
• c. más gá, rannpháirtíocht chuí na bhfeidhmeanna rialaithe inmheánaigh agus feidhmeanna ábhartha eile (acmhainní daonna, dlí agus airgeadas) a áirithiú ina réimsí saineolais faoi seach agus/nó comhairle ó shaineolaithe seachtracha a lorg.

¹⁶ Maidir le sáruithe tromchúiseacha i réimse AML/TF, féach freisin ar na treoirlínte atá le heisiúint faoi Airteagal 117 (6) de Threoir 2013/36/AE, ina sonraítear an modh comhair agus malartaithe faisnéise idir na húdaráis dá dtagraítear i mír 5 den Airteagal seo, go háirithe i ndáil le grúpaí trasteorann agus i gcomhthéacs sáruithe tromchúiseacha ar rialacha frithsciúrtha airgid a shainaithint.