5.6. Qafas ta’ ġestjoni tar-riskju

Fil-valutazzjoni tal-qafas ta’ ġestjoni tar-riskju tal-istituzzjoni, l-awtoritajiet kompetenti għandhom jivvalutaw il-konformità tal-istituzzjoni mal-Linji Gwida tal-EBA dwar il-Governanza Interna, mad-DORA u ma’ Linji Gwida oħra tal-EBA maħruġa skont l-Artikolu 74(3) tad-Direttiva 2013/36/UE dwar l-arranġamenti, il-proċessi u l-mekkaniżmi ta’ governanza interna. F’dan il-kuntest, l-awtoritajiet kompetenti għandhom jikkunsidraw inter alia jekk:

• a. l-istituzzjoni stabbilietx qafas xieraq għall-ġestjoni tar-riskju u proċessi ta’ ġestjoni tar-riskju, li jinkludu strateġija tar-riskju xierqa u implimentata, aptit għar-riskju, inkluża politika ta’ ġestjoni tar-riskju minn partijiet terzi, oqfsa tal-ICAAP u tal-ILAAP u kapaċitajiet u riżultati tal-ittestjar tal-istress;
• b. fejn applikabbli, il-qafas ta’ ġestjoni tar-riskju fil-livell tal-grupp ikoprix ir-riskji materjali kollha irrispettivament minn jekk ir-riskju joriġinax minn entitajiet li ma humiex soġġetti għall-konsolidazzjoni u jistabbilixxix perspettiva komprensiva tar-riskji kollha li l-istituzzjoni hi esposta jew tista’ tkun esposta għalihom;
• c. il-korp maniġerjali għandux ir-responsabbiltà finali għall-istrateġija tar-riskju, l-aptit għar-riskju u l-qafas ta’ ġestjoni tar-riskju u jipprovdix direzzjoni u sorveljanza xierqa;
• d. l-istituzzjoni, u fejn applikabbli l-istituzzjoni konsolidanti, iddokumentawx u implimentawx strateġija xierqa tar-riskju u tal-aptit għar-riskju, li jkopru r-riskji materjali kollha tal-istituzzjoni, li jinkludu limiti u tolleranzi tar-riskju, u li jirriflettu r-riżorsi finanzjarji tal-istituzzjoni;
• e. il-qafas ta’ ġestjoni tar-riskju jistabbilixxix proċeduri adegwati għall-identifikazzjoni, il-kejl, il-mitigazzjoni u l-monitoraġġ tar-riskju u l-punt sa fejn huwa inkorporat, u kif jinfluwenza, l-istrateġija globali tal-istituzzjoni;
• f. il-proċessi tat-teħid ta’ deċiżjonijiet humiex ċari, trasparenti u dokumentati b’mod adegwat, u jiħdux inkunsiderazzjoni l-kunsiderazzjonijiet xierqa tar-riskju, u jekk il-politiki u l-emendi għall-politiki humiex ikkomunikati b’mod xieraq u fil-ħin;
• g. hemmx rabtiet xierqa u konsistenti bejn l-istrateġija tan-negozju, l-istrateġija tar-riskju, l-istrateġija tar-reżiljenza operazzjonali diġitali, l-aptit għar-riskju u l-qafas ta’ ġestjoni tar-riskju, u l-oqfsa ta’ ġestjoni tal-kapital u tal-likwidità, kif ukoll il-pjan tal-istituzzjoni biex tindirizza r-riskji tal-ESG f’konformità mal-Artikolu 76(2) tad-Direttiva 2013/36/UE.

L-awtoritajiet kompetenti għandhom jivvalutaw jekk l-istituzzjoni għandhiex fis-seħħ politika dwar l-approvazzjoni ta’ prodotti ġodda ddokumentata tajjeb, approvata mill-korp maniġerjali, li tindirizza l-iżvilupp ta’ swieq, prodotti u servizzi ġodda, u bidliet sinifikanti f’dawk eżistenti, inklużi tranżazzjonijiet eċċezzjonali. L-awtoritajiet kompetenti għandhom jikkunsidraw ukoll jekk il-funzjonijiet tal-ġestjoni tar-riskju u tal-konformità humiex involuti b’mod xieraq fil-valutazzjoni u fl-approvazzjoni ta’ prodotti ġodda jew bidliet sinifikanti f’dawk eżistenti, b’approvazzjonijiet marbuta mal-adegwatezza tal-kontrolli rispettivi.

Oqfsa tal-ICAAP u tal-ILAAP

Fil-valutazzjoni tal-oqfsa tal-ICAAP u tal-ILAAP tal-istituzzjoni, l-awtoritajiet kompetenti għandhom jivvalutaw il-konformità tal-istituzzjoni mal-Linji Gwida tal-EBA dwar l-informazzjoni tal-ICAAP u tal-ILAAP²² . Il-valutazzjoni tal-oqfsa tal-ICAAP u tal-ILAAP tal-istituzzjoni għandha tinkludi reviżjoni perjodika tal-ICAAP u tal-ILAAP u tiddetermina s-solidità, l-effettività u l-komprensività tagħhom. F’dan ir-rigward, l-awtoritajiet kompetenti għandhom:

• a. jivvalutaw kif l-ICAAP u l-ILAAP huma integrati fil-prattiki ġenerali tal-ġestjoni tar-riskjui u l-ġestjoni strateġika tal-istituzzjoni, inkluż l-ippjanar tal-kapital u l-likwidità, kif ukoll il-firxa tan-natura prospettiva tagħhom;
• b. jikkunsidraw l-adegwatezza tal-ICAAP u tal-ILAAP biex jivvalutaw u jżommu livell adegwat ta’ kapital intern u likwidità biex ikopru r-riskji tal-istituzzjoni u jieħdu deċiżjonijiet tan-negozju sodi (eż. fir-rigward tal-allokazzjoni tal-kapital skont il-pjan ta’ direzzjoni tan-negozju), inkluż taħt kundizzjonijiet ta’ stress;
• c. jivvalutaw jekk l-ICAAP u l-ILAAP humiex integrati fil-proċessi ta’ teħid ta’ deċiżjonijiet u ta’ ġestjoni fil-livelli kollha fl-istituzzjoni (eż. l-istabbiliment ta’ limiti, il-kejl tal-prestazzjoni);
• d. jivverifikaw jekk l-oqfsa tal-ICAAP u tal-ILAAP humiex soġġetti għal sorveljanza regolari mill-korp maniġerjali, inkluża l-approvazzjoni ta’ dawn l-oqfsa u l-eżiti tagħhom;
• e. jivvalutaw jekk l-ICAAP u l-ILAAP humiex implimentati b’mod konsistenti u proporzjonat fil-linji operatorji u fl-entitajiet legali kollha tal-istituzzjoni u jkoprux ir-riskji materjali kollha li l-istituzzjoni hi esposta jew tista’ tkun esposta għalihom;
• f. jivvalutaw il-konformità mar-rekwiżiti legali u regolatorji relatati u jikkunsidraw ukoll jekk l-ICAAP tal-istituzzjoni jidentifikax riskji emerġenti u/jew riskji ta’ probabbiltà baxxa u impatt għoli, inklużi riskji tal-ICT, riskji ambjentali u inċertezzi ġeopolitiċi;
• g. jivvalutaw jekk kwalunkwe devjazzjoni mill-ICAAP jew l-ILAAP standard tal-istituzzjoni għal waħda jew aktar mill-entitajiet legali jew il-linji operatorji tagħha hijiex iġġustifikata.

²² Linji Gwida tal-EBA dwar l-informazzjoni tal-ICAAP u tal-ILAAP miġbura għall-finijiet tal-SREP (EBA/GL/2016/10).

Dawn il-valutazzjonijiet għandhom jikkontribwixxu għad-determinazzjoni tal-P2R u għall-valutazzjoni tal-adegwatezza tal-kapital kif deskritt fit-Titolu 7, kif ukoll għall-evalwazzjoni tal-adegwatezza tal-likwidità u tal-finanzjament kif deskritt fit-Titolu 8.

Valutazzjoni tal-ittestjar tal-istress tal-istituzzjoni

Fil-valutazzjoni tal-ittestjar tal-istress tal-istituzzjoni, l-awtoritajiet kompetenti għandhom jivvalutaw il-konformità tal-istituzzjoni mal-Linji Gwida tal-EBA dwar l-ittestjar tal-istress²³ u mal-Linji Gwida tal-EBA dwar l-analiżi tax-xenarji ambjentali għall-integrazzjoni tar-riskji ambjentali. Din il-valutazzjoni tinkludi r-reviżjoni tal-programm tal-ittestjar tal-istress tal-istituzzjoni, filwaqt li jitqiesu d-daqs u l-organizzazzjoni interna, u n-natura, l-iskala u l-kumplessità tal-attivitajiet tal-istituzzjoni.

²³ Linji Gwida tal-EBA dwar l-ittestajr tal-istress (EBA/GL/2018/04).

L-awtoritajiet kompetenti għandhom iwettqu valutazzjoni kwalitattiva tal-programm tal-ittestjar tal-istress tal-istituzzjoni, kif ukoll valutazzjoni kwantitattiva tar-riżultati tat-testijiet tal-istress. L-awtoritajiet kompetenti għandhom jikkunsidraw l-eżiti tal-valutazzjonijiet kwalitattivi u kwantitattivi flimkien mar-riżultati tat-testijiet tal-istress superviżorji (ara t-Titolu 11) għall-finijiet tal-valutazzjoni tal-adegwatezza tal-kapital u tal-likwidità u d-determinazzjoni tar-rispons superviżorju xieraq għan-nuqqasijiet identifikati. Jekk ir-reviżjoni tal-ittestjar tal-istress tidentifika nuqqasijiet fil-governanza tal-istituzzjoni u fil-kontrolli fil-livell tal-istituzzjoni kollha, dawn għandhom jiġu kkunsidrati mill-awtoritajiet kompetenti fil-valutazzjoni ta’ dawn l-oqsma. Barra minn hekk, ir-riżultati tat-testijiet tal-istress ta’ istituzzjoni jistgħu jintużaw għall-valutazzjoni tal-ippjanar tal-kapital tal-istituzzjoni, u fil-kwantifikazzjoni tar-rekwiżiti ta’ likwidità għall-valutazzjoni tal-adegwatezza tal-likwidità.

L-awtoritajiet kompetenti għandhom jivvalutaw sa liema punt l-ittestjar tal-istress huwa integrat fil-qafas ta’ ġestjoni tar-riskju tal-istituzzjoni, inkluż kif l-ittestjar tal-istress jiġi kkunsidrat fil-proċessi ta’ stabbiliment tal-aptit għar-riskju u tal-limiti tar-riskju tal-istituzzjoni. Barra minn hekk, l-awtoritajiet kompetenti għandhom jivvalutaw l-involviment tal-maniġment superjuri u tal-korp maniġerjali tal-istituzzjoni fil-programm tal-ittestjar tal-istress, inkluż ir-rapportar intern relatat, u l-grad ta’ integrazzjoni tal-ittestjar tal-istress u l-eżiti tiegħu fil-proċessi ta’ teħid ta’ deċiżjonijiet.

Meta jivvalutaw il-programm tal-ittestjar tal-istress, ir-riżultati tat-testijiet tal-istress u l-azzjonijiet maniġerjali proposti, l-awtoritajiet kompetenti għandhom jikkunsidraw kemm perspettivi idjosinkratiċi kif ukoll dawk tas-sistema kollha. L-awtoritajiet kompetenti għandhom jikkunsidraw il-fattibilità ta’ azzjonijiet maniġerjali f’sitwazzjonijiet ta’ stress, inkluż jekk il-perjodi ta’ żmien għall-implimentazzjoni tal-azzjonijiet humiex realistiċi u jikkunsidraw l-idjosinkraziji tal-istituzzjoni. Għar-reviżjoni tal-programmi tal-ittestjar tal-istress ta’ gruppi transfruntieri, l-awtoritajiet kompetenti għandhom jieħdu inkunsiderazzjoni l-ostakli potenzjali għat-trasferibbiltà tal-kapital u l-likwidità fil-gruppi u l-funzjonament ta’ kwalunkwe arranġament ta’ appoġġ finanzjarju intragrupp, li jistgħu jinħolqu f’kundizzjonijiet ta’ stress.

L-awtoritajiet kompetenti għandhom jivvalutaw ir-riżultati tat-testijiet tal-istress²⁴ u jekk l-istituzzjoni hijiex kapaċi żżomm it-TSCR applikabbli, il-ħin kollu, f’xenarju negattiv u jekk identifikatx sett ta’ azzjonijiet maniġerjali biex tindirizza kwalunkwe ksur potenzjali tat-TSCR. L-awtoritajiet kompetenti għandhom jikkunsidraw ukoll l-impatt tat-testijiet tal-istress fuq il-proporzjon ta’ ingranaġġ tal-istituzzjoni, kif ukoll l-obbligazzjonijiet eliġibbli tagħha miżmuma għall-finijiet ta’ rekwiżiti minimi għal obbligazzjonijiet eliġibbli (MREL) kif imsemmi fid-Direttiva 2014/59/UE.

²⁴ Għall-finijiet ta’ dan il-paragrafu, it-testijiet tal-istress ma jestendux għal reverse stress tests.

Fil-valutazzjoni tar-riżultati tat-testijiet tal-istress, l-awtoritajiet kompetenti għandhom jikkunsidraw ukoll il-bidliet regolatorji futuri kollha magħrufa li jaffettwaw lill-istituzzjoni fl-ambitu u fil-perjodu ta’ żmien tal-eżerċizzju tat-test tal-istress.