7.1 Informazzjoni dwar il-qafas tal-ġestjoni tar-riskju tal-iffinanzjar u l-likwidità

Dwar l-evidenzjar tal-istabbiliment ta' proċess li jiżgura li l-istituzzjoni għandha qafas robust u speċifiku għall-ġestjoni tar-riskju tal-iffinanzjar u l-likwidità, inkluż proċess għall-identifikazzjoni, il-kejl u l-ikkontrollar tar-riskji tal-iffinanzjar u l-likwidità, l-awtoritajiet kompetenti għandhom jiżguraw li mill-istituzzjonijiet jirċievu dan li ġej:

• a. deskrizzjoni tal-kamp ta' applikazzjoni tal-ILAAP, inkluż ħarsa ġenerali u r-raġunament għal xi devjazzjonijiet mill-kamp ta' applikazzjoni prudenzjali tar-rekwiżiti tal-likwidità li jirrikonoxxu eżenzjonijiet possibbli;
• b. deskrizzjoni tal-istabbiliment tal-ILAAP fejn tiġi spjegata r-relazzjoni bejn il-komponenti kollha tiegħu u jiġi pprovdut raġunament dwar kif dak l-istabbiliment jiżgura li l-istituzzjoni għandha aċċess għal likwidità suffiċjenti;
• c. il-kriterji applikati mill-istituzzjoni għall-għażla ta' xprunaturi tar-riskji sinifikanti għar-riskju tal-iffinanzjar u l-likwidità, inkluż l-għażla ta' muniti sinifikanti għall-monitoraġġ tal-likwidità u l-pożizzjoni tal-iffinanzjar;
• d. il-kriterji applikati mill-istituzzjoni għall-għażla tas-suppożizzjonijiet u l-għodod adegwati għall-ILAAP, bħall-metodu tal-kejl u l-ipproġettar tal-flussi tal-flus ta' assi, passivi u oġġetti barra l-karta tal-bilanċ attwali u futuri tul orizzonti ta' żmien adegwati.

7.1.2 Dokumentazzjoni operazzjonali

Dwar l-evidenzjar tal-istabbiliment sħiħ ta' proċess li jiżgura li l-istituzzjoni għandha qafas robust u speċifiku għall-ġestjoni tar-riskju tal-iffinanzjar u l-likwidità, inkluż proċess għall-identifikazzjoni, il-kejl u l-ikkontrollar tar-riskji tal-iffinanzjar u l-likwidità, l-awtoritajiet kompetenti għandhom jiżguraw li mill-istituzzjonijiet jirċievu dan li ġej:

• a. valutazzjoni tal-flussi ta' likwidità intragrupp u pożizzjonijiet tal-iffinanzjar, inkluż xi impedimenti regolatorji jew legali possibbli għat-trasferiment tal-likwidità (fis-sub-)grupp;
• b. raġunament għall-għażla tal-ixprunaturi tar-riskji sinifikanti u ħarsa ġenerali kwantitattiva ta' dawn l-ixprunaturi tar-riskji, aġġornata bi frekwenza adegwata;
• c. ħarsa ġenerali kwantitattiva tal-profil tal-finanzjament u l-istabbiltà perċeputa tiegħu fil-muniti sinifikanti kollha;
• d. evidenza tal-monitoraġġ tal-konformità mar-rekwiżiti prudenzjali minimi u addizzjonali relatati mal-likwidità u r-riskju tal-finanzjament, b'mod konformi mal-Artikolu 105 tad-Direttiva 2013/36/UE, inkluż it-tbassir tal-konformità ma' dawn ir-rekwiżiti f'xenarji differenti tul orizzont ta' żmien adegwat fil-kamp ta' applikazzjoni tal-kopertura tal-ILAAP.