9.5. Freagairt mhaoirseachta ar chás nuair nach gcomhlíontar P2G

Ba cheart d'údaráis inniúla faireachán a dhéanamh ar cibé acu atá nó nach bhfuil méid na gcistí dílse a bhfuiltear ag súil leis de réir P2G bunaithe agus á gcoinneáil ag an institiúid le himeacht ama. Nuair a thitfidh cistí dílse na hinstitiúide, nó inar dócha go dtitfidh siad, faoi bhun an leibhéil arna chinneadh ag P2G, ba cheart don údarás inniúil a bheith ag súil go dtabharfaidh an institiúid fógra dó agus go n-ullmhófar plean caipitil athbhreithnithe. Ina fógra, ba cheart don institiúid a mhíniú cad iad na hiarmhairtí díobhálacha is dócha a thabharfadh uirthi déanamh amhlaidh agus cad iad na gníomhaíochtaí atá beartaithe chun comhlíonadh P2G a athbhunú mar chuid d'idirphlé feabhsaithe maoirseachta.

Go ginearálta, tá trí chás le breithniú ag údarás inniúil ina bhféadfadh go dteipfeadh ar institiúid a P2G a chomhlíonadh.

• a. I gcás ina dtiteann leibhéal na gcistí dílse faoi leibhéal P2G (agus fós os cionn OCR) i gcúinsí a bhaineann go sonrach leis an institiúid nó i gcúinsí seachtracha inar tháinig na rioscaí a raibh sé d’aidhm ag P2G iad a chlúdach chun cinn, féadfaidh an t-údarás inniúil ligean don institiúid oibriú go sealadach faoi bhun leibhéal an P2G, ar choinníoll go meastar an plean caipitil athbhreithnithe a bheith inchreidte de réir na gcritéar atá leagtha amach i Rannóg 7.7. Chomh maith leis sin, féadfaidh an t-údarás inniúil breithniú a dhéanamh ar an leibhéal P2G a choigeartú más cuí;
• b. I gcás ina dtiteann leibhéal na gcistí dílse faoi bhun leibhéal P2G (agus fós os cionn an OCR) i gcúinsí a bhaineann go sonrach leis an institiúid nó i gcúinsí seachtracha mar thoradh ar theacht chun cinn rioscaí nach raibh sé beartaithe don P2G iad a chlúdach, ba cheart d’údaráis inniúla a bheith ag súil go méadóidh an institiúid leibhéal na gcistí dílse go dtí leibhéal P2G laistigh d’amlíne iomchuí;
• c. I gcás ina ndéanann an institiúid neamhaird de P2G, ní ionchorpraíonn sí sa chreat bainistíochta riosca é nó mura mbunaíonn sí cistí dílse chun P2G a chomhlíonadh laistigh de na teorainneacha ama a leagann an t-údarás inniúil síos, féadfaidh na húdaráis inniúla bearta breise maoirseachta a chur i bhfeidhm mar a leagtar amach i dTábla 16.

I gcás nár deonaíodh an cead oibriú faoi bhun an leibhéil P2G dá dtagraítear i bpointe (a) agus go bhfuil cistí dílse na hinstitiúide faoi bhun leibhéal P2G arís agus arís eile, ba cheart don údarás inniúil ceanglais cistí dílse breise a fhorchur i gcomhréir le Teideal 7.

D’ainneoin freagairtí maoirseachta ar leith de réir na míre roimhe seo, féadfaidh údaráis inniúla breithniú a dhéanamh freisin ar chur i bhfeidhm na mbeart caipitil agus maoirseachta breise a leagtar amach i dTeideal 7, i gcás ina measfar iad a bheith níos iomchuí chun aghaidh a thabhairt ar na cúiseanna gur thit na cistí dílse faoin leibhéal arna chinneadh ag P2G.