9.5. Reazzjoni superviżorja għal sitwazzjoni li fiha ma jiġix issodisfat il-P2G

L-awtoritajiet kompetenti għandhom jimmonitorjaw jekk l-ammont ta’ fondi proprja mistenni f’konformità mal-P2G huwiex stabbilit u miżmum mill-istituzzjoni maż-żmien. Meta l-fondi proprji tal-istituzzjoni jonqsu, jew aktarx li se jonqsu, taħt il-livell iddeterminat mill-P2G, l-awtorità kompetenti għandha tistenna li l-istituzzjoni tinnotifikaha u tħejji pjan ta’ kapital rivedut. Fin-notifika tagħha, l-istituzzjoni għandha tispjega liema konsegwenzi negattivi aktarx se jisfurzawha biex tagħmel dan u liema azzjonijiet huma previsti għar-restawr eventwali ta’ konformità mal-P2G bħala parti minn djalogu superviżorju mtejjeb.

B’mod ġenerali hemm tliet sitwazzjonijiet li għandhom jiġu kkunsidrati minn awtorità kompetenti li fihom istituzzjoni tista’ tonqos milli tissodisfa l-P2G tagħha:

• a. Meta l-livell ta’ fondi proprji jaqa’ taħt il-livell tal-P2G (filwaqt li jibqa’ ogħla mill-OCR) f’ċirkostanzi speċifiċi għall-istituzzjoni jew esterni li fihom ir-riskji li l-P2G kellu l-għan li jkopri jkunu ġew materjalizzati, l-awtorità kompetenti tista’ tippermetti lill-istituzzjoni biex temporanjament topera taħt il-livell tal-P2G, dment li l-pjan ta’ kapital rivedut ikun meqjus kredibbli f’konformità mal-kriterji stabbiliti fit-taqsima 7.7. L-awtorità kompetenti tista’ tikkunsidra wkoll li taġġusta l-livell tal-P2G meta jkun xieraq;
• b. Meta l-livell ta’ fondi proprji jaqa’ taħt il-livell tal-P2G (filwaqt li jibqa’ ogħla mill-OCR) f’ċirkostanzi speċifiċi għall-istituzzjoni jew esterni b’riżultat tal-materjalizzazzjoni tar-riskji li l-P2G ma kellhiex l-għan li tkopri, l-awtoritajiet kompetenti jistgħu jistennew li l-istituzzjoni żżid il-livell tal-fondi proprji għal-livell tal-P2G f’perjodu ta’ żmien xieraq;
• c. Meta l-istituzzjoni tinjora l-P2G, ma tinkorporahx fil-qafas tal-ġestjoni tar-riskji tagħha jew ma tistabbilixxix fondi proprji biex tissodisfa l-P2G fil-limiti ta’ żmien rilevanti stabbiliti mill-awtorità kompetenti, dan jista’ jwassal biex l-awtoritajiet kompetenti japplikaw miżuri superviżorji addizzjonali kif stabbilit fit-tabella 16.

Meta l-permess biex topera taħt il-livell tal-P2G kif imsemmi fil-punt (a) ma jkunx ingħata u l-fondi proprji tal-istituzzjoni jkunu ripetutament taħt il-livell tal-P2G, l-awtorità kompetenti għandha timponi l-P2R f’konformità mat-Titolu 7.

Minkejja rispons superviżorju partikolari f’konformità mal-paragrafu preċedenti, l-awtoritajiet kompetenti jistgħu jikkunsidraw ukoll l-applikazzjoni tal-miżuri ta’ kapital u dawk superviżorji addizzjonali stabbiliti fit-Titolu 7, meta dawn jitqiesu aktar xierqa biex jindirizzaw ir-raġunijiet li wasslu biex il-fondi proprji jaqgħu taħt il-livell iddeterminat mill-P2G.