4.8 Inbhuanaitheacht straitéis an ghnólachta infheistíochta a mheas

I ndiaidh na n-anailísí a chlúdaítear i Rannóg 4.4 go Rannóg 4.6 a reáchtáil, ba cheart d'údaráis inniúla a dtuairim maidir le hinbhuanaitheacht straitéis an ghnólachta infheistíochta thar thréimhse réamhbhreathnaitheach a bhunú nó a nuashonrú, agus cuntas a dhéanamh dá phleananna straitéiseacha agus réamhaisnéisí airgeadais agus an measúnú maoirseachta ar an timpeallacht ghnó. Ba cheart go gcumhdófaí i dtréimhse réamhbhreathnaitheach dá leithéid tréimhsí trí bliana ach d'fhéadfaí tréimhse níos faide a chur san áireamh ionas go mbeidh sé ag teacht leis an gcéad mheasúnú iomlán SREP a bhfuil súil leis, de réir na samhla rannpháirtíochta íosta atá sonraithe i dTeideal 2.

Go háirithe, féadfaidh údaráis inniúla measúnú a dhéanamh ar inbhuanaitheacht straitéis an ghnólachta infheistíochta bunaithe ar:

• a. inchreidteacht bhoinn tuisceana an ghnólachta infheistíochta agus na feidhmíochta airgeadais réamh-mheasta i gcomparáid leis an tuairim mhaoirseachta ar an timpeallacht ghnó reatha agus thodhchaíoch;
• b. an tionchar ar fheidhmíocht airgeadais réamh-mheasta na tuairime maoirseachta maidir leis an timpeallacht ghnó (sa chás nach ionann é seo agus boinn tuisceana an ghnólachta infheistíochta); agus
• c. leibhéal riosca na straitéise (i.e. castacht agus uaillmhian na straitéise i gcomparáid leis an tsamhail ghnó reatha) agus an dóchúlacht iarmhartach go n-éireoidh leis bunaithe ar inniúlachtaí forghníomhaithe dóchúla an ghnólachta infheistíochta (arna thomhas bunaithe ar rath an ghnólachta infheistíochta i ndáil le straitéisí ag scála comhchosúil a fhorfheidhmiú nó ar an bhfeidhmíocht i gcomparáid leis an bplean straitéiseach go dtí seo).

Maidir le gnólachtaí infheistíochta neamhchasta agus sa chás nach bhfuil réamh-mheastacháin airgeadais ar fáil nó iontaofa, féadfaidh údaráis inniúla measúnú a dhéanamh ar inbhuanaitheacht straitéis an ghnólachta infheistíochta ar bhealach cáilíochtúil trí dhíriú ar an méid seo a leanas:

• a. an fás beartaithe ag leibhéal foriomlán bunaithe ar ghníomhaíochtaí gnó suntasacha agus an tionchar a d'fhéadfadh a bheith ag an timpeallacht ghnó ar an gcumas an straitéis a chomhlíonadh;
• b. an mí-ailíniú a d'fhéadfadh a bheith idir dreasacht bhrabúis fhadtéarmach an ghnólachta infheistíochta agus leasa tomhaltóirí agus margaí airgeadais;
• c. comhsheasmhacht straitéis an ghnólachta infheistíochta lena inghlacthacht riosca.

27