Rialachas samhla

Ba cheart d'institiúidí a áirithiú go bhfuil bailíochtú mhodhanna tomhais IRRBB — ar cheart iad a athbhreithniú agus a bhailíochtú neamhspleách ar a bhforbairt — agus measúnú an riosca chomhfhreagraigh de bharr samhaltaithe san áireamh i bpróiseas beartais fhoirmiúil ar cheart don chomhlacht bainistíochta nó dá thoscairí é a athbhreithniú agus a fhormheas. Ba cheart an beartas seo a chomhtháthú laistigh de na próisis rialachais do bhainistíocht riosca na samhla agus ba cheart an méid seo a leanas a shonrú:

• (a) na róil bhainistíochta agus an duine atá freagrach as forbairt, bailíochtú, doiciméadú, cur chun feidhme agus úsáid samhlacha a ainmniú; agus
• (b) freagrachtaí maoirseachta na samhla agus beartais lena n-áirítear forbairt nósanna imeachta bailíochtaithe tosaigh agus leanúnacha, meastóireacht ar thorthaí, na próisis atá mar bhonn le faomhadh, rialú leagain, eisceacht, géarú, modhnú agus díchoimisiúnú.

D'fhéadfaí na cúig bhunghné seo a leanas a áireamh sa chreat bailíochtaithe:

• (a) meastóireacht ar fhóntacht choincheapúil agus mhodheolaíoch, lena n-áirítear fianaise fhorbarthach;
• (b) faireachán samhla leanúnach lena n-áirítear fíorú agus tagarmharcáil próisis;
• (c) anailís ar thorthaí, lena n-áirítear cúltástáil príomhpharaiméadar inmheánach (e.g., cobhsaíocht taiscí, rátaí réamhíocaíochta iasachta, fuascailtí luatha taiscí, praghsáil ionstraimí);
• (d) measúnú críochnúil ar aon tuairimí agus breithiúnais shaineolacha a úsáidtear i samhlacha inmheánacha; agus
• (e) Bailíochtú toimhdí éagsúlaithe.

Nuair a bhíothas ag déileáil leis na gníomhaíochtaí bailíochtaithe tosaigh agus leanúnacha ionchasacha, ba cheart go mbunódh an beartas próiseas ordlathach chun cinneadh a dhéanamh maidir le fóntacht an riosca de bharr samhaltaithe bunaithe ar ghnéithe cainníochtúla agus cáilíochtúla cosúil le méid, tionchar, feidhmíocht roimhe seo agus saineolas ball foirne ar an teicníc samhaltaithe a úsáideadh.

Ba cheart do bhainistíocht riosca na samhla do bhearta IRRBB cloí le cur chuige iomlánaíoch a thosaíonn le spreagadh, forbairt agus cur chun feidhme i measc úinéirí agus úsáideoirí na samhla. Sula bhfaightear cead ag leibhéal inmheánach úsáid a bhaint as an bpróiseas, ba cheart an próiseas atá in úsáid chun cinneadh a dhéanamh maidir le hionchuir shamhla, toimhdí, modheolaíochtaí samhaltaithe agus aschuir a athbhreithniú agus a bhailíochtú neamhspleách ar fhorbairt shamhlacha IRRBB.

Ba cheart an t-athbhreithniú agus na torthaí bailíochtaithe agus aon mholtaí maidir le húsáid na samhla a chur i láthair an chomhlachta bainistíochta nó a thoscairí agus ba cheart dóibh an tsamhail a fhaomhadh. Nuair a bheidh an tsamhail faofa, ba cheart athbhreithniú leanúnach a dhéanamh ar an tsamhail, an próiseas a fhíorú agus a bhailíochtú ag minicíocht atá comhsheasmhach le leibhéal an riosca de bharr samhaltaithe arna chinneadh agus arna fhaomhadh ag an institiúid.

Ba cheart don phróiseas athbhreithnithe leanúnach tacar de theagmhais spreagtha eisceachta a bhunú a chuireann dualgas ar athbhreithneoirí na samhla fógra a chur chuig an gcomhlacht bainistíochta nó a thoscairí ar bhonn tráthúil, chun cinneadh a dhéanamh maidir le gníomhaíochtaí ceartaitheacha agus srianta maidir le húsáid na samhla. Ba cheart údaruithe rialaithe soiléire maidir le leagan a tharmligean, más cuí, d'úinéirí samhla.

Bunaithe ar bhreathnóireachtaí agus ar eolas nua bailithe le himeacht ama, féadfar samhail faofa a mhodhnú nó a aistarraingt. Ba cheart d'institiúidí beartais maidir le haistriú samhla a shoiléiriú, lena n-áirítear údaruithe agus doiciméid maidir le rialú athraithe agus leagain.

Féadfaidh institiúidí brath ar shamhlacha IRRBB tríú páirtí chun IRRBB a bhainistiú agus a rialú, ar an gcoinníoll go bhfuil na samhlacha seo saincheaptha go cuí chun léargas ceart a thabhairt ar shaintréithe sonracha na hinstitiúide ábhartha. Bítear ag súil go mbeidh tuiscint iomlán ag institiúidí ar anailísíocht, toimhdí agus modheolaíochtaí foluiteacha na samhlacha tríú páirtí agus go n-áiritheoidh siad go bhfuil siad comhtháite go cuí i gcórais agus i bpróisis fhoriomlána bainistíochta riosca na hinstitiúide. Sa chás go soláthraíonn tríú páirtithe ionchur le haghaidh sonraí margaidh, toimhdí iompair nó suíomhanna samhla, ba cheart go mbeadh próiseas bunaithe ag an institiúid chun cinneadh a dhéanamh maidir le cibé acu atá nó nach bhfuil an t-ionchur sin réasúnach dá ghnó agus do shaintréithe riosca a ghníomhaíochtaí. Ba cheart d'institiúidí a áirithiú go bhfuil dóthain doiciméad ar fáil maidir leis an úsáid atá á baint acu as samhlacha tríú páirtí, lena n-áirítear aon saincheapadh sonrach.

Ba cheart ionchur nó toimhdí samhla, ag eascairt as próisis samhla inmheánacha nó tríú páirtithe, a chur san áireamh sa phróiseas bailíochtaithe. Ba cheart don institiúid na roghanna sonraíochta samhla a dhoiciméadú agus a mhíniú mar chuid den phróiseas bailíochtaithe.