6. Na sainiúlachtaí a bhaineann le hiasachtaí a thabhairt do thithíocht phoiblí nó d’eintitis neamhbhrabúis a chur san áireamh

Maidir le neamhchosaintí ADC ar eintitis tithíochta poiblí nó neamhbhrabúis ar fud an Aontais a rialaítear leis an dlí agus atá ann chun freastal ar chuspóirí sóisialta agus chun tithíocht fhadtéarmach a thairiscint do thionóntaí, ba cheart go mbeadh siad faoi réir na láimhseála dá dtagraítear i mír 23 agus 24 i gcás ina gcomhlíontar an dá cheann de na coinníollacha seo a leanas:

• a. Is le haghaidh léasa amháin atá an úsáid atá beartaithe don mhaoin;
• b. Tá an mhaoin atá á maoiniú faoi réir rialacháin lena sonraítear an incháilitheacht chun cáiliú do thithíocht shóisialta/phoiblí, lena n-áirítear critéir d’iarratasóirí i ndáil lena n-ioncam, le méid a dteaghlaigh, lena stádas cónaitheachta, agus le ceanglais maidir leis an tógáil, lena n-áirítear méid gach aonaid nó a bheith saor ó bhacainní.

Maidir leis na neamhchosaintí ADC a luaitear i mír 22, ba cheart a mheas go bhfuil an ceanglas maidir le cuid shuntasach d’iomlán na gconarthaí, mar atá leagtha amach in Airteagal 126a(2)(a) de CRR comhlíonta, más rud é, maidir leis an tionscadal atá á bhreithniú agus maidir le gach cineál aonad tithíochta sóisialta sa tionscadal, go sáraíonn líon na n-iarratasóirí líon na n-aonad tithíochta sóisialta atá ar fáil le ligean ar léas. I gcás nach bhfuil líon na n-iarratasóirí ar fáil le haghaidh tionscadal ar leith, ach go bhfuil sé ar fáil ar leibhéal an bhardais, is féidir an chomparáid idir líon na n-iarratasóirí ar gach cineál aonaid tithíochta sóisialta agus líon na n-aonad tithíochta sóisialta atá ar fáil le ligean ar léas a dhéanamh ar leibhéal an bhardais.

Maidir leis na neamhchosaintí ADC dá dtagraítear i mír 22, ba cheart méid iomchuí an chothromais arna ranníoc ag féichiúnaí chun críocha Airteagal 126a(2), pointe (b), de CRR a shocrú de réir cheanglais na míreanna 19 go 21 de na Treoirlínte seo, leis an gcoigeartú seo a leanas:

• a. [An tairseach chothromais a laghdú]: ba cheart go mbeadh an cóimheas idir méid an chothromais arna ranníoc ag an bhféichiúnaí agus luach na maoine cónaithe nuair a chuirfear i gcrích í dá dtagraítear i mír 19 cothrom le 20 % nó níos airde ná sin.
• b. [Fóirdheontais agus deontais a gealladh don fhéichiúnaí a cheadú]: Áirítear freisin leis na fóirdheontais agus na deontais dá dtagraítear i mír 20, pointe (b), na fóirdheontais agus na deontais a gealladh don fhéichiúnaí chun costais thabhaithe an tionscadail a chumhdach, lena n-áirítear fóirdheontais a gealladh i bhfoirm cistí a dhíorthaítear ó iasachtaí sóisearacha neamhurraithe, faoi thacaíocht an stáit le rátaí úis fabhracha, mar a thomhaistear in airgeadra an mhaoinithe don fhéichiúnaí tráth ríomha na gceanglas caipitil.