4. Modhanna éagsúlaithe miondíola comhréireacha

Chun críche Airteagal 123(1), pointe (c) de Rialachán (AE) Uimh. 575/2013, ba cheart a mheas gurb ionann neamhchosaint agus ceann amháin de líon suntasach neamhchosaintí a bhfuil saintréithe comhchosúla acu, sa chaoi is go laghdaítear go suntasach na rioscaí a bhaineann le neamhchosaint den sórt sin, i gcás ina mbaineann sí le punann atá éagsúlaithe go leordhóthanach i gcomhréir le mír 11.

Ba cheart a mheas go bhfuil punann éagsúlaithe go leordhóthanach i gcás nach mó ná 10% an cóimheas idir suim luachanna neamhchosanta na neamhchosaintí miondíola móra incháilithe, mar a shainmhínítear i mír 12, thar shuim luachanna neamhchosanta neamhchosaintí miondíola incháilithe uile na hinstitiúide.

Ba cheart neamhchosaint mhiondíola incháilithe a mheas mar neamhchosaint mhór mhiondíola incháilithe nuair a sháraíonn an cóimheas idir a luach neamhchosanta agus suim luachanna neamhchosanta neamhchosaintí miondíola uile na hinstitiúide an tairseach 0.2 %. Chun neamhchosaintí móra miondíola incháilithe a shainaithint, ba cheart don institiúid na neamhchosaintí miondíola incháilithe ar chliant nó ar ghrúpa cliant nasctha a láimhseáil, de réir mar is infheidhme, mar neamhchosaint aonair, ina ndéantar iomlán dá luachanna neamhchosanta.

Ba cheart don institiúid a mheas ar dtús an gcomhlíonann an phunann atá comhdhéanta de neamhchosaintí miondíola incháilithe uile na hinstitiúide an coinníoll a leagtar amach i mír 11.

I gcás nach gcomhlíonann an phunann atá comhdhéanta de neamhchosaintí miondíola incháilithe uile na hinstitiúide an coinníoll a leagtar amach i mír 11, féadfaidh an institiúid neamhchosaint mhór mhiondíola incháilithe amháin nó níos mó a eisiamh uaithi mar a shainmhínítear i mír 12.

Maidir leis an bpunann a eascraíonn as eisiamh na neamhchosaintí arna ndéanamh i gcomhréir le mír 14, ba cheart a mheas go bhfuil sí éagsúlaithe go leordhóthanach má chomhlíonann sí an coinníoll a leagtar amach i mír 11.

Níor cheart na neamhchosaintí arna n-eisiamh i gcomhréir le mír 14 a mheas mar neamhchosaintí a léiríonn ceann amháin de líon suntasach neamhchosaintí a bhfuil saintréithe comhchosúla acu chun críche Airteagal 123(1), pointe (c) de Rialachán (AE) Uimh. 575/2013.

I gcás punainne ina bhfuil neamhchosaintí urrúsaithe, ba cheart an measúnú ar chomhlíonadh choinníoll an éagsúlaithe dá dtagraítear i mír 11 a dhéanamh maidir leis na neamhchosaintí miondíola atá mar bhunús leis an urrúsú amhail is nach ndearnadh na neamhchosaintí foluiteacha sin a urrúsú, i gcomhréir le hAirteagal 255(6) de Rialachán (AE) Uimh. 575/2013. Dá bhrí sin, níor cheart ríomh na gcóimheas dá dtagraítear i míreanna 11 agus 12 a dhéanamh le haghaidh phunann iomlán neamhchosaintí miondíola incháilithe na hinstitiúide, ach ba cheart é a dhéanamh ar leithligh le haghaidh trí fhophunann. Go sonrach:

• a) Maidir leis an bhfophunann atá comhdhéanta de neamhchosaintí neamhurrúsaithe, níor cheart ach neamhchosaintí neamhurrúsaithe a áireamh san uimhreoir agus san ainmneoir.
• b) Maidir leis an bhfophunann atá comhdhéanta de neamhchosaintí urrúsaithe ina ngníomhaíonn an institiúid mar thionscnóir, ba cheart na neamhchosaintí urrúsaithe sin agus na neamhchosaintí neamhurrúsaithe uile araon a áireamh san uimhreoir agus san ainmneoir .
• c) Maidir leis an bhfophunann atá comhdhéanta de neamhchosaintí urrúsaithe ina ngníomhaíonn an institiúid mar infheisteoir, níor cheart ach na neamhchosaintí urrúsaithe foluiteacha a áireamh san uimhreoir agus san ainmneoir.

D’ainneoin mhír 17, maidir le neamhchosaintí urrúsaithe i ina ngníomhaíonn institiúidí mar infheisteoirí, féadfaidh institiúidí an treoir seo a leanas a úsáid mar mhalairt air sin: ba cheart a mheas go gcomhlíontar go huathoibríoch an measúnú thuasluaite ar éagsúlú i gcás suíomh infheisteora institiúide in urrúsú, a mhéid atá an t-urrúsú sin comhdhéanta de neamhchosaintí foluiteacha, nach n-iarrtar faisnéis ina leith sna teimpléid dá dtagraítear in Airteagal 7 den Rialachán sin, i gcomhréir leis na ceanglais díchill chuí agus trédhearcachta a leagtar amach in Airteagail 5 agus 7 de Rialachán (AE) 2017/2402, maidir leis an bhféichiúnaí agus le luach neamhchosanta neamhchosaintí foluiteacha an tsuímh urrúsaithe sin. Níor cheart feidhm a bheith ag an maolú seo ach amháin sna cásanna sin nach ndéantar foráil sna teimpléid a shainordaítear faoi Airteagal 7(4) de Rialachán (AE) 2017/2402 maidir leis an bhfaisnéis ar fhéichiúnaí agus ar mhéid an fhéichiúnaí.