6.3 Measúnú oiriúnachta ar chomhaltaí an chomhlachta bainistíochta agus ar shealbhóirí príomhfheidhme

Nuair a bhíonn measúnú nó athmheasúnú á dhéanamh ar oiriúnacht chomhaltaí an chomhlachta bainistíochta agus sealbhóirí príomhfheidhme, ba cheart do mhaoirseoirí stuamachta, i gcás ina meastar gur gá sin, comhoibriú agus faisnéis a mhalartú leis na maoirseoirí AML/CFT ábhartha chun críche a measúnaithe, go háirithe, maidir le measúnú a dhéanamh i dtaobh cibé acu an bhfuil nó nach bhfuil forais réasúnacha ann chun a bheith in amhras go bhfuil sciúradh airgid nó maoiniú sceimhlitheoireachta á dhéanamh nó go ndearnadh iarracht a leithéid a dhéanamh, nó go bhfuil baol méadaithe ann ina leith i dtaca leis an institiúid sin. Ba cheart do mhaoirseoirí stuamachta, i gcás ina meastar gur gá sin, faisnéis a iarraidh ó mhaoirseoirí ábhartha AML/CFT chun críche a measúnaithe i gcomhréir le Treoirlínte Comhpháirteacha ESMA agus ÚBE maidir leis an measúnú ar oiriúnacht chomhaltaí an chomhlachta bainistíochta agus sealbhóirí príomhfheidhme faoi Threoir 2013/36/AE agus faoi Threoir 2014/65/AE¹¹ .

¹¹ Treoirlínte Comhpháirteacha ESMA agus ÚBE maidir leis an measúnú ar oiriúnacht chomhaltaí an chomhlachta bainistíochta agus sealbhóirí príomhfheidhme faoi Threoir 2013/36/AE agus Treoir 2014/65/AE (EBA/GL/2021/06).

I gcás ina gcinnfidh maoirseoir stuamachta nach bhfuil comhalta den chomhlacht bainistíochta nó sealbhóir príomhfheidhme oiriúnach bunaithe ar na fíricí ábhartha i gcomhthéacs rioscaí nó teagmhais ML/TF, ba cheart don mhaoirseoir stuamachta a t(h)átail agus cinntí a roinnt leis an maoirseoir ábhartha AML/CFT agus leis an aonad um fhaisnéis airgeadais.

Maoirseoirí AML/CFT

Ba cheart do mhaoirseoirí AML/CFT, arna iarraidh sin don mhaoirseoir stuamachta, an fhaisnéis ábhartha uile atá ar fáil a roinnt chun eolas a sholáthar don mheasúnú agus don athmheasúnú ar oiriúnacht chomhaltaí an chomhlachta bainistíochta agus sealbhóirí príomhfheidhme. I gcás inarb iomchuí, ba cheart don mhaoirseoir AML/CFT faisnéis a lorg freisin ón aonad um fhaisnéis airgeadais mar chuid dá m(h)easúnú ar an iarratas, mura bhfuil a leithéid d’fhaisnéis ar fáil cheana féin don mhaoirseoir stuamachta nó murar lorg an maoirseoir stuamachta an fhaisnéis sin ón aonad um fhaisnéis airgeadais.

Ba cheart do mhaoirseoirí AML/CFT ar a dtionscnamh féin faisnéis a roinnt le maoirseoirí stuamachta, ar faisnéis í a mheastar a bheith ábhartha chun measúnú nó athmheasúnú a dhéanamh ar oiriúnacht chomhaltaí an chomhlachta bainistíochta agus sealbhóirí príomhfheidhme i gcás ina dtagann fíricí nua nó fíricí nach raibh ar eolas roimhe sin chun solais a bhaineann le ML/TF.

Ba cheart faisnéis a iarrtar i gcomhthéacs measúnuithe oiriúnachta a chur ar fáil gan aon mhoill mhíchuí i bhfianaise na tréimhse ghearr dlí a bheidh ag an maoirseoir stuamachta le haghaidh measúnuithe den sórt sin.