2.2. Punteġġ fl-SREP

L-awtoritajiet kompetenti għandhom japplikaw sistema ta’ punteġġ konsistenti biex jgħinu jiffaċilitaw il-komunikazzjoni bejn l-awtoritajiet kompetenti u l-kulleġġi tas-superviżuri, jippromwovu l-komparabbiltà u l-kundizzjonijiet ekwi bejn l-istituzzjonijiet, u jagħtu prijorità lir-riżorsi u l-miżuri superviżorji fil-valutazzjoni tal-elementi tal-SREP. Dawn għandhom jiġbru fil-qosor l-eżiti tal-valutazzjonijiet tagħhom billi jassenjaw punteġġi tar-riskju, punteġġi tal-elementi tal-SREP u punteġġ globali tal-SREP.

Meta jassenaw punteġġi tar-riskju, punteġġi tal-elementi tal-SREP u l-punteġġ globali tal-SREP, l-awtoritajiet kompetenti għandhom jirreferu għall-kunsiderazzjonijiet imsemmija fit-tabelli fl-aħħar parti ta’ kull taqsima u titolu rilevanti ta’ dawn il-linji gwida, flimkien mal-applikazzjoni tal-ġudizzju superviżorju. Filwaqt li dawn il-kunsiderazzjonijiet iservu bħala linja bażi għall-assenjazzjoni tal-punteġġi, ma għandhomx jiġu interpretati bħala lista ta’ kontroll mekkanika li għandha timtela għal kull element, u lanqas ma għandhom jitqiesu bħala li jistabbilixxu ġerarkija ta’ importanza fost l-elementi. Minflok, huma maħsuba biex jiggwidaw lill-awtoritajiet kompetenti fl-assenjazzjoni tal-punteġġi billi jikkunsidraw l-interazzjoni u r-rilevanza tal-elementi differenti fi ħdan id-dimensjoni speċifika tal-istituzzjoni li qed tiġi vvalutata.

Il-punteġġi tar-riskju għandhom l-għan li jindirizzaw il-probabbiltà li r-riskji għall-kapital, il-likwidità u l-finanzjament se jkollhom impatt sinifikanti fuq l-istituzzjoni. Il-punteġġi tal-elementi tal-SREP u l-punteġġ globali tal-SREP jindikaw il-kobor tar-riskji għall-vijabbiltà tal-istituzzjoni; b’mod partikolari, il-punteġġ globali tal-SREP għandu jirrifletti l-perspettiva superviżorja tal-vijabbiltà globali tal-istituzzjoni kif speċifikat fit-Titolu 9. Illustrazzjoni 1. Ħarsa ġenerali lejn il-qafas tal-punteġġ

Punteġġ tal-SREP globali

Punteġġ Punteġġ interna u tal-governanza tal-kontroll fl- adegwatezza Punteġġ tal- tal- adegwatezza Punteġġ tal- tal-

tal-BMA istituzzjoni kollha kapital likwidità u tal-

Il-punteġġi huma: 1 (riskju baxx), 2 (riskju medju-baxx), 3 (riskju medju-għoli), u 4 (riskju għoli – dan jirrappreżenta l-agħar valutazzjoni possibbli). Il-punteġġ addizzjonali ta’ “F” huwa disponibbli biss għall-punteġġ globali tal-SREP, kif spjegat fil-paragrafu 38. L-awtoritajiet kompetenti jistgħu jintroduċu punteġġi aktar granulari għall-finijiet interni tagħhom, bħall-ippjanar tar-riżorsi, dment li l-qafas ġenerali tal-punteġġi stabbilit f’dawn il-linji gwida jiġi rispettat.

L-awtoritajiet kompetenti għandhom jirrevedu l-punteġġi malli jitlestew il-valutazzjonijiet tal-SREP bil-frekwenza minima stabbilita fil-mudell ta’ involviment tal-SREP fit-taqsima 2.4. Il-punteġġi għandhom jiġu riveduti wkoll mingħajr dewmien żejjed fuq il-bażi ta’ sejbiet jew żviluppi ġodda materjali.

2.2.1. Punteġġi tar-riskju

Il-punteġġi tar-riskju huma assenjati biex jiġbru fil-qosor ir-riskji għall-kapital (kif speċifikat fit-Titolu 6). Dawn il-punteġġi jirrappreżentaw il-probabbiltà li riskju se jkollu impatt prudenzjali sinifikanti fuq l-istituzzjoni (eż. telf potenzjali), wara li titqies il-kwalità tal-kontrolli tar-riskju biex jiġi mmitigat dan l-impatt (jiġifieri r-riskju residwu), iżda qabel ma titqies il-kapaċità tal-istituzzjoni li timmitiga r-riskju permezz tar-riżorsi tal-kapital jew tal-likwidità disponibbli.

L-awtoritajiet kompetenti għandhom jiddeterminaw il-punteġġ tar-riskju permezz ta’ valutazzjoni tal-livell ta’ riskju inerenti ta’ istituzzjoni, filwaqt li jqisu kif xieraq l-adegwatezza tal-qafas ta’ ġestjoni u ta’ kontrolli tar-riskju tal-istituzzjoni. B’mod partikolari, qafas adegwat ta’ ġestjoni u ta’ kontrolli tar-riskju jista’ jimmitiga l-impatt prudenzjali ta’ riskju speċifiku, filwaqt li qafas dgħajjef jista’ jżid l-impatt prudenzjali. Il-valutazzjoni tar-riskju inerenti u l-adegwatezza tal-ġestjoni u l-kontrolli għandhom isiru b’referenza għall-kunsiderazzjonijiet speċifikati fit-tabella 6 għar-riskju tal-kreditu u tal-kontroparti, fit-tabella 8 għar-riskju tas-suq, fit-tabella 10 għar-riskju operazzjonali, fit-tabella 12 għar-riskju taċ-ċaqliq fir-rata tal-imgħax u ta’ firxiet tal-kreditu fil-portafoll bankarju (IRRBB u CSRBB), fit-tabella 17 għal-likwidità u l-finanzjament.

Meta jivvalutaw ir-riskji għall-kapital, l-awtoritajiet kompetenti għandhom jikkunsidraw ukoll is-sottokategoriji rilevanti (eż. ir-riskju ta’ konċentrazzjoni jew ir-riskju tal-pajjiż bħala parti mill-valutazzjoni tar-riskju tal-kreditu u tal-kontraparti, kif stabbilit fit-Titolu 6). Skont il-materjalità ta’ kwalunkwe waħda minn dawn is-sottokategoriji għal istituzzjoni partikolari, l-awtoritajiet kompetenti jistgħu jiddeċiedu li jivvalutawhom u jagħtuhom punteġġ b’mod individwali.

L-awtoritajiet kompetenti jistgħu jużaw metodi differenti biex japplikaw il-punteġġi tar-riskju, jistgħu jagħtu punteġġi għal “riskju” u għal “ġestjoni u kontrolli tar-riskju” separatament (li jirriżultaw f’punteġġ intermedju u finali) jew jagħtuhom punteġġ flimkien. L-awtoritajiet kompetenti jistgħu wkoll jaggregaw ir-riskji kollha għall-kapital f’punteġġ aggregat.

2.2.2. Punteġġi tal-elementi tal-SREP u punteġġ globali tal-SREP

Fi tmiem il-valutazzjoni globali tal-SREP, l-awtoritajiet kompetenti għandhom jiffurmaw ħarsa ġenerali komprensiva tal-profil tar-riskju u l-vijabbiltà tal-istituzzjoni abbażi tal-erba’ elementi tal-SREP:

• a. mudell u strateġija tan-negozju kif speċifikat fit-Titolu 4;
• b. governanza interna u kontrolli fl-istituzzjoni kollha kif speċifikat fit-Titolu 5;
• c. adegwatezza tal-kapital, kif speċifikat fit-Titolu 7;
• d. adegwatezza tal-likwidità u tal-finanzjament, kif speċifikat fit-Titolu 8.

L-adegwatezza tal-kapital u l-adegwatezza tal-likwidità u tal-finanzjament jirrappreżentaw il-perspettiva superviżorja tal-kapaċità tar-riżorsi tal-kapital u tal-likwidità tal-istituzzjoni biex jimmitigaw/ikopru r-riskji għall-kapital u l-likwidità u l-finanzjament, kif stabbilit fit-Titoli 6 u 8, u/jew elementi oħrajn li għalihom ikunu ġew iddeterminati fondi proprji addizzjonali kif stabbilit fit-Titolu 7.

Il-punteġġ finali huwa punteġġ globali tal-SREP. Dan jinkludi l-punteġġi tal-erba’ elementi tal-SREP imsemmija hawn fuq u l-ġudizzju superviżorju. L-awtoritajiet kompetenti għandhom jiżguraw li l-punteġġ globali tal-SREP jipprovdi indikazzjoni tal-vijabbiltà globali tal-istituzzjoni, inkluż jekk l-istituzzjoni hijiex “qed tfalli jew probabbli tfalli” fis-sens tal-Artikolu 32 tad-Direttiva 2014/59/UE, u wara li jikkunsidraw il-Linji Gwida tal-EBA dwar “qed tfalli jew probabbli tfalli”⁸ . Meta l-eżitu tal-valutazzjoni globali tal-SREP jissuġġerixxi li istituzzjoni tista’ titqies bħala li “qed tfalli jew probabbli tfalli”, l-awtoritajiet kompetenti għandhom japplikaw punteġġ ta’ “F” u jsegwu l-proċess ta’ involviment mal-awtoritajiet ta’ riżoluzzjoni kif speċifikat fl-Artikolu 32 tad-Direttiva 2014/59/UE.

⁸ Linji gwida tal-EBA dwar l-interpretazzjoni taċ-ċirkostanzi differenti meta istituzzjoni għandha titqies bħala li qed tfalli jew probabbli tfalli skont l-Artikolu 32(6) tad-Direttiva 2014/59/UE (EBA/GL/2015/07)

L-awtoritajiet kompetenti għandhom jiżguraw li l-punteġġi tal-elementi tal-SREP u l-punteġġ globali tal-SREP:

• a. jirriflettu l-probabbiltà li l-miżuri superviżorji huma meħtieġa biex jindirizzaw it-tħassib;
• b. jitqiesu fost l-iskattaturi għad-deċiżjoni dwar jekk għandhomx jiġu applikati miżuri ta’ intervent bikri f’konformità mal-Linji Gwida tal-EBA dwar skattaturi għall-użu ta’ miżuri ta’ intervent bikri⁹ ;
• c. jinformaw il-prijoritizzazzjoni u l-ippjanar ta’ riżorsi superviżorji u l-istabbiliment ta’ prijoritajiet fil-programm ta’ eżaminazzjoni superviżorja (SEP).

⁹ Linji Gwida tal-EBA dwar skattaturi għall-użu ta’ miżuri ta’ intervent bikri (EBA/GL/2015/03).