7.1. Kunsiderazzjonijiet ġenerali

L-awtoritajiet kompetenti għandhom jiddeterminaw permezz tal-valutazzjoni tal-kapital tal-SREP jekk il-fondi proprji miżmuma mill-istituzzjoni jipprovdux kopertura soda tar-riskji għall-kapital li l-istituzzjoni tkun jew tista’ tkun esposta għalihom, jekk tali riskji huma vvalutati bħala materjali għall-istituzzjoni.

L-awtoritajiet kompetenti għandhom jagħmlu dan billi jiddeterminaw u jistabbilixxu l-kwantità (l-ammont) u l-kwalità (il-kompożizzjoni) tal-fondi proprji addizzjonali li l-istituzzjoni hija meħtieġa li jkollha biex tkopri r-riskji speċifiċi għall-istituzzjoni u l-elementi tar-riskji li ma humiex koperti jew li ma humiex koperti biżżejjed minn P1R, u, fejn meħtieġ, ir-rekwiżiti ta’ fondi proprji biex jindirizzaw in-nuqqasijiet fil-mudelli, il-kontrolli, il-governanza jew nuqqasijiet oħra, kif ukoll ir-riskju li jirriżulta mill-mudell tan-negozju tal-istituzzjoni (P2R għal riskji għajr ir-riskju ta’ ingranaġġ eċċessiv u P2R-LR għar-riskju ta’ ingranaġġ eċċessiv).

Meta huwa mistenni jew jista’ jkun mistenni impatt materjali fuq il-profil tal-kapital tal-istituzzjoni minħabba t-tibdil rilevanti fil-qafas regolatorju għad-determinazzjoni tal-P1R (eż. żieda jew tnaqqis fit-TREA) jew fl-implimentazzjoni tiegħu għall-istituzzjoni speċifika (bħall-minimu tal-output), l-awtoritajiet kompetenti għandhom jivvalutaw dan l-impatt f’termini tal-interazzjoni tiegħu mal-P2R. Tali valutazzjoni tista’ twassal għal determinazzjoni mill-ġdid (jew ’il fuq jew ’l isfel) tal-livell jew il-kompożizzjoni tal-P2R biex jiġi żgurat li r-rekwiżiti globali ta’ fondi proprji tal-istituzzjoni jkunu konformi mal-Artikolu 104a(1) tad-Direttiva 2013/36/UE, b’mod partikolari li l-P2R ikopri riskji jew elementi ta’ riskji li ma humiex koperti jew li ma humiex koperti biżżejjed mill-P1R. Biex iwettqu valutazzjoni bħal din, l-awtoritajiet kompetenti jistgħu jżidu l-frekwenza tal-valutazzjoni tal-SREP kif stabbilit fil-mudell ta’ involviment tal-SREP fit-taqsima 2.4 jew ta’ elementi speċifiċi tiegħu.

Sabiex jindirizzaw l-inadegwatezzi potenzjali tal-kapital, inkluż f’kundizzjonijiet ta’ stress, l-awtoritajiet kompetenti għandhom jieħdu miżuri superviżorji xierqa, inkluż, fejn rilevanti, billi jistabbilixxu u jikkomunikaw il-P2G u l-P2G-LR li hija l-kwantità (ammont) u l-kwalità (kompożizzjoni) tal-fondi proprji li l-istituzzjoni hija mistennija li żżomm lil hinn mill-OCR jew l-OLRR tagħha.

Meta jistabbilixxu l-P2R u, fejn rilevanti, il-P2G, l-awtoritajiet kompetenti għandhom:

• a. jieħdu inkunsiderazzjoni kwalunkwe miżura superviżjorja li jkunu applikaw jew li qed jippjanaw li japplikaw għal istituzzjoni;
• b. jiġġustifikaw b’mod ċar l-elementi kollha tar-rekwiżiti ta’ fondi proprji addizzjonali għall-P2R u l-P2R-LR kif ukoll għall-P2G u l-P2G-LR;
• c. japplikaw il-P2R u l-P2R-LR kif ukoll il-P2G u l-P2G-LR b’mod konsistenti biex tiġi żgurata konsistenza ġenerali tal-eżiti prudenzjali fost l-istituzzjonijiet.

L-awtoritajiet kompetenti għandhom jivvalutaw l-adegwatezza tal-fondi proprji tal-istituzzjoni u l-impatt tal-istress ekonomiku fuqhom, kif ukoll ir-riskji maħluqa minn ingranaġġ eċċessiv, bħala element determinanti ewlieni tal-vijabbiltà tal-istituzzjoni. Din id-determinazzjoni għandha tiġi miġbura fil-qosor f’punteġġ li jieħu inkunsiderazzjoni l-kunsiderazzjonijiet speċifikati fl-aħħar ta’ dan it-Titolu.