10.2. Valutazzjoni tal-kapital tal-SREP u rekwiżiti prudenzjali speċifiċi għall-istituzzjoni

Id-determinazzjoni tal-adegwatezza tal-kapital, u r-rekwiżiti u l-gwida relatati f’konformità mal-proċess deskritt fit-Titolu 7 għall-gruppi transfruntiera hija parti mill-proċess tad-deċiżjoni konġunta tal-awtoritajiet kompetenti skont l-Artikolu 113 tad-Direttiva 2013/36/UE.

Għal istituzzjonijiet omm jew sussidjarji ta’ grupp transfruntier, l-applikazzjoni tal-P2R u tal-P2R-LR skont l-Artikolu 104(1)(a) tad-Direttiva 2013/36/UE għandha titwettaq f’konformità mal-proċess tad-deċiżjoni konġunta previst fl-Artikolu 113(1)(a) ta’ dik id-Direttiva.

Fil-kuntest tad-diskussjonijiet dwar l-adegwatezza tal-livell ta’ fondi proprji u d-determinazzjoni tal-P2R u tal-P2R-LR, l-awtoritajiet kompetenti għandhom jikkunsidraw:

• a. il-valutazzjoni tal-materjalità tar-riskji u n-nuqqasijiet identifikati kemm fil-livell ta’ entità konsolidata u ta’ entità individwali (jiġifieri liema riskji huma materjali għall-grupp kollu kemm hu u liema huma materjali għal entità waħda biss) u l-livell ta’ fondi proprji meħtieġa biex ikopru riskji bħal dawn;
• b. fejn in-nuqqasijiet identifikati huma komuni fl-entitajiet kollha (eż. l-istess nuqqasijiet ta’ governanza preżenti fl-entitajiet kollha, jew nuqqasijiet fil-mudelli użati f’diversi entitajiet), li jikkoordinaw il-valutazzjoni u r-rispons superviżorju, u b’mod partikolari, li jiddeċiedu jekk għandhomx ikunu imposti miżuri fuq livell konsolidat jew b’mod proporzjonali f’livell ta’ entità għall-entitajiet fejn ikun hemm nuqqasijiet komuni;
• c. l-eżiti ta’ valutazzjonijiet tal-ICAAP u perspettivi dwar l-affidabbiltà tal-kalkoli tal-ICAAP u l-użu possibbli tagħhom bħala input fid-determinazzjoni tal-P2R;
• d. l-eżiti tal-kalkoli tal-punti ta’ riferiment superviżorji użati biex jiddeterminaw il-P2R għall-entitajiet kollha fil-grupp u f’livell konsolidat;
• e. il-P2R li għandu jiġi impost fuq entitajiet u fuq livell konsolidat biex jiġi żgurat li jkun hemm konsistenza tar-rekwiżiti finali ta’ fondi proprji u jekk hemmx ħtieġa għal trasferiment ta’ fondi proprji minn livell konsolidat għal dak tal-entità.

Biex jiddeterminaw it-TSCR kif speċifikat fit-Titolu 7, l-awtoritajiet kompetenti għandhom jikkunsidraw l-istess livell ta’ applikazzjoni bħar-rekwiżiti ta’ deċiżjoni konġunta f’konformità mal-Artikolu 113(1)(a) tad-Direttiva 2013/36/UE. B’mod partikolari, it-TSCR u miżuri oħra kapitali, jekk applikabbli, għandhom jiġu stabbiliti f’livelli konsolidati u individwali għall-entitajiet li joperaw fi Stati Membri oħra. Għal-livell sottokonsolidat, it-TSCR u miżuri oħra kapitali għandhom ikopru biss l-impriża omm tal-grupp sottokonsolidat biex jevitaw għadd doppju tal-P2R ikkunsidrat mill-awtoritajiet kompetenti għal sussidjarji fi Stati Membri oħra.

Jekk l-eżitu tal-valutazzjoni superviżorja tar-riskju ta’ ingranaġġ eċċessiv għall-istituzzjonijiet omm jew sussidjarji ta’ grupp transfruntier ikun li għandhom jiġu stabbiliti rekwiżiti tal-Pilastru 2 biex jiġi indirizzat ir-riskju ta’ ingranaġġ eċċessiv (tal-P2R-LR), dan għandu jitwettaq f’konformità mal-proċess ta’ deċiżjoni konġunta previst fl-Artikolu 113(1)(a) tas-CRD u għandu jirrifletti l-istack separat ta’ rekwiżiti ta’ fondi proprji abbażi tal-proporzjon ta’ ingranaġġ.

Fil-kuntest tad-diskussjonijiet dwar l-adegwatezza tal-livell ta’ fondi proprji biex jiġi kopert ir-riskju ta’ ingranaġġ eċċessiv u d-determinazzjoni tal-P2R-LR, l-awtoritajiet kompetenti għandhom jikkunsidraw:

• a. aspetti inklużi fil-paragrafu 326;
• b. rekwiżiti tal-Pilastru 2 biex ikopru r-riskju ta’ ingranaġġ eċċessiv impost fuq entitajiet u fuq livell konsolidat biex jiżguraw li jkun hemm konsistenza tar-rekwiżiti finali ta’ fondi proprji u jekk hemmx ħtieġa għal trasferiment ta’ fondi proprji minn livell konsolidat għal dak tal-entità.

L-informazzjoni kollha rilevanti fir-rigward tad-determinazzjoni tal-P2G u tal-P2G-LR għal istituzzjonijiet omm jew sussidjarji ta’ grupp transfruntier għandha tiġi kondiviża bejn l-awtoritajiet kompetenti, u l-istabbiliment tagħha għandu jitwettaq f’konformità mal-proċess ta’ deċiżjoni konġunta skont l-Artikolu 113(1)(c), tad-Direttiva 2013/36/UE. B’mod partikolari, l-awtoritajiet kompetenti għandhom jiddiskutu l-approċċ biex jistabbilixxu l-P2G u l-P2G-LR fil-livell individwali meta ma tkun disponibbli l-ebda data mit-testijiet tal-istress superviżorji f’dak il-livell, jew, fejn rilevanti, jaqblu dwar l-applikazzjoni tal-P2G u tal-P2G-LR fil-livell konsolidat biss. Il-P2G u l-P2G-LR għandhom ikunu riflessi kif xieraq fid-dokument tad-deċiżjoni konġunta mħejji f’konformità mal-Artikolu 113 tad-Direttiva 2013/36/UE.