11.3. Arranġamenti organizzazzjonali u ta’ governanza fi ħdan l-awtoritajiet kompetenti

L-awtoritajiet kompetenti għandhom jistabbilixxu programm effettiv għall-ittestjar tal-istress superviżorju. Dan il-programm għandu jiġi appoġġat b’arranġamenti tal-organizzazzjoni, ta’ governanza u tal-IT xierqa li jiżguraw li t-testijiet tal-istress superviżorji jkunu jistgħu jitwettqu bi frekwenza xierqa. Il-programm tal-ittestjar tal-istress superviżorju għandu jappoġġa l-implimentazzjoni effettiva tal-programm ta’ eżami superviżorju għal istituzzjonijiet individwali. Il-programm għandu jirrifletti wkoll kif l-awtorità kompetenti tieħu deċiżjonijiet dwar l-għażla ta’ forom ta’ ttestjar tal-istress superviżorju b’rabta mill-qrib mal-objettivi ta’ kull eżerċizzju.

L-arranġamenti ta’ governanza, tal-organizzazzjoni u tal-IT li jappoġġaw il-programm tal-ittestjar tal-istress superviżorju għandhom jinkludu mill-inqas dan li ġej:

• a. riżorsi umani u materjali, data u infrastruttura tal-IT suffiċjenti għat-tfassil u t-twettiq ta’ testijiet tal-istress superviżorji. B’mod partikolari, il-programm tal-ittestjar tal-istress superviżorju għandu jiġi appoġġat b’data xierqa u b’approċċ metodoloġiku xieraq li jkopru l-aspetti kollha, inklużi xenarji u suppożizzjonijiet (eż. mudelli, gwida, dokumentazzjoni), u jiżgura kemm flessibbiltà kif ukoll livelli xierqa ta’ kwalità u kontrolli;
• b. proċess tal-assigurazzjoni tal-kwalità li jkopri t-tfassil tal-ittestjar tal-istress, l-iżvilupp u t-twettiq, u l-komparabbiltà tar-riżultati bejn l-istituzzjonijiet;
• c. l-integrazzjoni tal-ittestjar tal-istress superviżorju fi proċessi superviżorji oħra rilevanti. Għalhekk, meta jkun meħtieġ u soġġett għal kwalunkwe restrizzjoni legali, l-organizzazzjoni għandha tappoġġa l-kondiviżjoni interna tal-informazzjoni u l-utilizzazzjoni tal-aspetti kollha tal-programm tal-ittestjar tal-istress.

Bħala parti mill-arranġamenti ta’ governanza, l-awtoritajiet kompetenti għandhom jiżguraw li l-programm tal-ittestjar tal-istress superviżorju jiġi rivedut b’mod regolari, kemm b’mod kwalitattiv kif ukoll kwantitattiv, biex tiġi żgurata l-adegwatezza kontinwa tiegħu.

L-awtoritajiet kompetenti għandhom jiżguraw li jkollhom fis-seħħ proċessi u arranġamenti għal djalogu effettiv mal-istituzzjonijiet fir-rigward tat-testijiet tal-istress superviżorji u l-eżiti tagħhom. Dan id-djalogu għandu jirrifletti l-objettivi maħsuba, jiġi stabbilit b’mod partikolari iżda mhux esklussivament meta jitwettqu testijiet tal-istress superviżorji għall-finijiet tal-valutazzjoni tal-adegwatezza globali tal-kapital tal-istituzzjonijiet, u jiġi organizzat fi ħdan il-kuntest aktar globali tal-valutazzjonijiet tal-SREP kif stabbilit f’dawn il-linji gwida. Għall-finijiet ta’ tali djalogu kemm fil-livell tekniku kif ukoll maniġerjali, fejn rilevanti, l-awtoritajiet kompetenti għandhom jiżguraw li:

• a. l-istituzzjonijiet jingħataw spjegazzjoni u gwida adegwati, iddettaljati biżżejjed u preċiżi dwar l-applikazzjoni tal-metodoloġiji u s-suppożizzjonijiet użati f’test tal-istress minn isfel għal fuq;
• b. l-istituzzjonijiet jingħataw struzzjonijiet adegwati, iddettaljati biżżejjed u preċiżi fir-rigward tal-informazzjoni ta’ sostenn meħtieġa minnhom li għandha tiġi sottomessa lill-awtoritajiet kompetenti flimkien mar-riżultati tat-testijiet tal-istress;
• c. l-istituzzjonijiet jingħataw spjegazzjoni wara diskussjonijiet, fejn rilevanti, tal-eżiti tat-testijiet tal-istress superviżorji li jwasslu għall-applikazzjoni ta’ miżuri superviżorji. Dan għandu jiġi kkunsidrat mill-awtoritajiet kompetenti b’mod partikolari fi-kuntest tat-testijiet tal-istress fis-sistema kollha li jiskattaw miżuri superviżorji.

Meta japplikaw l-ittestjar tal-istress superviżorju għal gruppi transfruntiera, l-awtoritajiet kompetenti għandhom jiskambjaw informazzjoni u, fejn fattibbli, jiddiskutu kif xieraq il-proċess fi ħdan il-kulleġġi tas-superviżuri. B’mod partikolari, l-awtoritajiet kompetenti għandhom jiżguraw li d-dettalji rilevanti dwar il-metodoloġiji, ix-xenarji u s-suppożizzjonijiet ewlenin, kif ukoll ir-riżultati tat-testijiet tal-istress superviżorji, speċjalment dawk li għandhom l-għan li jivvalutaw l-adegwatezza tal-kapital jew tal-likwidità, jiġu magħmula disponibbli u jiġu diskussi.

L-awtoritajiet kompetenti għandhom jidentifikaw ukoll liema informazzjoni fir-rigward tat-testijiet tal-istress superviżorji u l-eżiti tagħhom tista’ tiġi żvelata lill-pubbliku, filwaqt li jqisu l-finijiet maħsuba tat-testijiet tal-istress superviżorji. Meta jiddeċiedu dwar l-iżvelar pubbliku tar-riżultati jew tal-metodoloġiji tat-testijiet tal-istress superviżorji, l-awtoritajiet kompetenti għandhom jikkunsidraw ir-rwol tagħhom stess fl-eżerċizzju u l-approċċ magħżul u jikkunsidraw ukoll l-estent tal-analiżi tagħhom stess li se takkumpanja r-riżultati ppubblikati.