1. Ról agus freagrachtaí an chomhlachta bainistíochta

I gcomhréir le hAirteagal 34 de Rialachán (AE) 2023/1114, ní mór do chomhlacht bainistíochta eisitheora ARTanna cur chun feidhme socruithe rialachais fónta a shainiú, a mhaoirsiú agus a bheith cuntasach as a gcur chun feidhme, ar socruithe iad lena n-áirithítear bainistiú éifeachtach stuama an eisitheora agus leas shealbhóirí ART lena n-áirítear leithscaradh dualgas agus coinbhleachtaí leasa laistigh d’eisitheoir ARTanna a shainaithint, a chosc agus a bhainistiú i gcomhréir le hAirteagal 32 de Rialachán (AE) 2023/1114.

Ba cheart dualgais an chomhlachta bainistíochta a shainiú go soiléir, agus idirdhealú á dhéanamh, i gcás inarb infheidhme, idir dualgais na feidhme bainistíochta (feidhmiúcháin) agus dualgais na feidhme maoirseachta (neamhfheidhmiúcháin). Ba cheart cur síos a dhéanamh ar fhreagrachtaí agus ar dhualgais an chomhlachta bainistíochta i ndoiciméad scríofa agus ba cheart don chomhlacht bainistíochta an doiciméad sin a fhormheas go cuí. Ba cheart do chomhaltaí uile an chomhlachta bainistíochta a bheith go hiomlán ar an eolas faoi struchtúr agus freagrachtaí an chomhlachta bainistíochta agus, i gcás inarb infheidhme, faoi roinnt na gcúraimí idir feidhmeanna éagsúla an chomhlachta bainistíochta.

I gcás inarb infheidhme, ba cheart don chomhlacht bainistíochta idirghníomhú go héifeachtach dó ina fheidhm mhaoirseachta agus ina fheidhm bhainistíochta. Ba cheart go soláthródh an dá fheidhm dóthain faisnéise dá chéile chun cur ar a gcumas a róil faoi seach a chomhlíonadh. Chun go mbeidh srianta agus ceartúcháin iomchuí i bhfeidhm, níor cheart comhalta aonair ná fothacar beag dá chomhaltaí a bheith i gceannas ar chinnteoireacht laistigh den chomhlacht bainistíochta.

Ba cheart go n-áireofaí ar fhreagrachtaí an chomhlachta bainistíochta ar a laghad cur chun feidhme, socrú, formheas agus maoirsiú na nithe seo a leanas:

• a. an straitéis fhoriomlán ghnó agus príomhbheartais an eisitheora laistigh den chreat dlíthiúil agus rialála is infheidhme, agus leasanna airgeadais fadtéarmacha agus sócmhainneacht agus leas sealbhóirí ARTanna an eisitheora á gcur san áireamh.
• b. na beartais a cheanglaítear faoi Airteagal 34(5) de Rialachán (AE) 2023/1114; ba cheart na beartais sin a bheith comhsheasmhach le hinghlacthacht riosca agus lamháltas riosca an eisitheora agus leis na saintréithe, le riachtanais chliaint an eisitheora ARTanna a dtairgfear dóibh iad agus lena sealbhóirí ionchasacha;
• c. eagrúchán an eisitheora chun ARTanna a eisiúint ina sonraítear na scileanna, an t-eolas agus an saineolas a theastaíonn ón bhfoireann agus na hacmhainní is gá;
• d. an straitéis riosca fhoriomlán, fonn riosca an eisitheora agus a chreat bainistíochta riosca, lena n-áirítear beartais agus nósanna imeachta leordhóthanacha, agus an timpeallacht mhaicreacnamaíoch agus an timthriall gnó á gcur san áireamh, agus rannpháirtíocht an chomhlachta bainistíochta i saincheisteanna bainistíochta riosca á sonrú;
• e. creat rialaithe inmheánaigh atá leordhóthanach agus éifeachtach, lena n-áirítear creat bainistithe riosca agus sásraí rialaithe inmheánaigh atá ag feidhmiú go maith, chun a áirithiú go gcomhlíonfar na ceanglais rialála is infheidhme, lena n-áirítear maidir le cúlchistí sócmhainní a bhainistiú;
• f. beartas luacha saothair d’eisitheoirí ARTanna suntasacha atá i gcomhréir le hAirteagal 45(1) de Rialachán (AE) 2023/1114⁶ ;
• g. na beartais agus na nósanna imeachta chun coinbhleachtaí leasa a shainaithint, a chosc, a bhainistiú agus a nochtadh, i gcomhréir le hAirteagal 32 de Rialachán (AE) 2023/1114⁷ ;
• h. socruithe arb é is aidhm dóibh a áirithiú go ndéantar measúnuithe oiriúnachta aonair agus comhchoiteanna an chomhlachta bainistíochta go héifeachtach, go bhfuil comhdhéanamh an chomhlachta bainistíochta iomchuí, agus go gcomhlíonann an comhlacht bainistíochta a fheidhmeanna go héifeachtach;
• i. cultúr i leith riosca i gcomhréir le Teideal IV Roinn 7 lena dtugtar aghaidh ar fheasacht riosca agus iompraíocht glactha riosca eisitheoir ARTanna;
• j. cultúr corparáideach agus luachanna corparáideacha i gcomhréir le Teideal IV Roinn 8 lena gcothaítear iompar freagrach eiticiúil, lena n-áirítear cód iompair nó ionstraim chomhchosúil;
• k. socruithe a bhfuil sé mar aidhm leo sláine na gcóras cuntasaíochta agus tuairiscithe airgeadais a áirithiú, lena n-áirítear rialuithe airgeadais agus oibriúcháin agus comhlíonadh an dlí agus na gcaighdeán ábhartha.

⁶ Féach na caighdeáin theicniúla rialála maidir le hinneachar íosta na socruithe rialachais i dtaca leis an mbeartas luacha saothair d’eisitheoirí ARTanna suntasacha i gcomhréir le hAirteagal 45(7)(a) de Rialachán (AE) 2023/1114.

⁷ Féach na caighdeáin theicniúla rialála maidir le coinbhleacht leasa faoi Airteagal 32(5) de Rialachán (AE) 2023/1114.

Agus cur chun feidhme na ngnéithe a liostaítear i mír 20 á bhunú, á fhormheas agus á mhaoirsiú aige, ba cheart don chomhlacht bainistíochta a áirithiú go gcuirfear san áireamh sa tsamhail ghnó agus sna socruithe rialachais na rioscaí uile a bhfuil eisitheoir ARTanna neamhchosanta orthu nó a bhféadfadh eisitheoir ARTanna a bheith neamhchosanta orthu agus na rioscaí a bhaineann leo nó a d’fhéadfadh a bheith ag baint leo do dhaoine eile agus don chomhshaol. Chun na críche sin, ba cheart d’eisitheoirí ARTanna na tosca riosca ábhartha uile a chur san áireamh freisin, lena n-áirítear tosca riosca comhshaoil, sóisialta agus rialachais (ESG) agus breithniú a dhéanamh ar na tionchair ar an aeráid agus ar an gcomhshaol a eascraíonn as ídiú fuinnimh na sásraí comhthola agus bailíochtaithe a úsáidtear. I measc na bhfachtóirí riosca ESG eile ba cheart a mheas tá rioscaí dlíthiúla i réimse dhlí an chonartha nó dhlí an tsaothair, rioscaí a bhaineann le sáruithe féideartha ar chearta an duine nó tosca riosca ESG eile a d’fhéadfadh difear a dhéanamh don tír ina bhfuil soláthraí seirbhíse tríú páirtí lonnaithe agus a chumas na leibhéil seirbhíse chomhaontaithe a sholáthar.

Ba cheart don chomhlacht bainistíochta maoirseacht a dhéanamh ar an bpróiseas nochta, go háirithe mar a shainordaítear in Airteagal 30 de Rialachán (AE) 2023/1114, agus ar chumarsáid le páirtithe leasmhara seachtracha agus le húdaráis inniúla.

Ba cheart gach comhalta den chomhlacht bainistíochta a chur ar an eolas faoi ghníomhaíocht fhoriomlán, staid airgeadais agus riosca an eisitheora ARTanna, agus an timpeallacht eacnamaíoch agus an timthriall gnó á gcur san áireamh, agus freisin faoi aon chinntí a dhéantar a bhfuil tionchar mór acu ar eisiúint ARTanna nó ar ghníomhaíochtaí gnó ábhartha eile.

Féadfaidh comhalta den chomhlacht bainistíochta a bheith freagrach as feidhm rialaithe inmheánaigh dá dtagraítear i dTeideal V, ar choinníoll nach bhfuil sainorduithe eile ag an gcomhalta a chuirfeadh isteach ar ghníomhaíochtaí rialaithe inmheánaigh an chomhalta agus ar neamhspleáchas na feidhme rialaithe inmheánaigh.

Ba cheart don chomhlacht bainistíochta faireachán a dhéanamh, athbhreithniú tréimhsiúil a dhéanamh agus aghaidh a thabhairt ar aon laigí a shainaithnítear maidir le cur chun feidhme próiseas, straitéisí agus beartas a bhaineann leis na freagrachtaí a liostaítear sa roinn seo. Ba cheart an creat rialachais agus a chur chun feidhme a athbhreithniú agus a thabhairt cothrom le dáta ar bhonn tréimhsiúil, agus prionsabal na comhréireachta á chur san áireamh, mar a shonraítear tuilleadh i dTeideal I. Ba cheart athbhreithniú ní ba dhoimhne a dhéanamh i gcás ina ndéanfadh athruithe ábhartha difear d’eisitheoir ARTanna.

I gcás inar daoine dlítheanacha iad eisitheoirí ARTanna arna mbainistiú ag duine nádúrtha aonair i gcomhréir lena rialacha bunaitheacha agus lena ndlíthe náisiúnta, ba cheart na tagairtí sna treoirlínte seo do chomhlacht bainistíochta a fhorléiriú mar thagairtí a bhfuil feidhm acu maidir leis an duine aonair atá freagrach as socruithe malartacha a chur chun feidhme chun bainistiú fónta stuama eisitheora den sórt sin agus aird leordhóthanach ar shocruithe rialachais a áirithiú.