Treoirlínte Comhpháirteacha maidir leis an gcóras arna bhunú ag na hÚdaráis Mhaoirseachta Eorpacha chun faisnéis a mhalartú atá ábhartha maidir le measúnú ar oiriúnacht agus cuibheas sealbhóirí sealúchas cáilitheach, stiúrthóirí agus sealbhóirí príomhfheidhme institiúidí airgeadais agus rannpháirtithe sa mhargadh airgeadais ag údaráis inniúla

Sa doiciméad seo tá Treoirlínte comhpháirteacha atá le heisiúint de bhun Airteagal 16 de Rialachán (AE) Uimh. 1093/2010 ó Pharlaimint na hEorpa agus ón gComhairle an 24 Samhain 2010 lena mbunaítear Údarás Maoirseachta Eorpach (an tÚdarás Baincéireachta Eorpach); de Rialachán (AE) Uimh. 1094/2010 lena mbunaítear Údarás Maoirseachta Eorpach (an tÚdarás Eorpach um Árachas agus Pinsin Cheirde); agus de Rialachán (AE) Uimh. 1095/2010 lena mbunaítear Údarás Maoirseachta Eorpach (an tÚdarás Eorpach um Urrúis agus Margaí) (dá ngairtear le chéile na ‘Rialacháin Bhunaidh’).

Tá glacadh na dTreoirlínte le déanamh i gcomhréir le hAirteagal 56, an dara fomhír, de na Rialacháin Bhunaidh.

I gcomhréir le hAirteagal 16(3) de na Rialacháin Bunaidh, ní mór do na húdaráis inniúla gach iarracht a dhéanamh chun na Treoirlínte a chomhlíonadh.

Is é is aidhm do na Treoirlínte comhpháirteacha cleachtais mhaoirseachta atá comhsheasmhach, éifeachtúil agus éifeachtach a bhunú laistigh den Chóras Eorpach um Maoirseacht Airgeadais (CEMA), agus cur i bhfeidhm coiteann, aonfhoirmeach agus comhsheasmhach dhlí an Aontais a áirithiú maidir le húsáid an chórais arna bhunú ag ÚMEnna chun faisnéis atá ábhartha don mheasúnú ar oiriúnacht agus cuibheas sealbhóirí sealúchas cáilitheach, stiúrthóirí agus sealbhóirí príomhfheidhme institiúidí airgeadais agus rannpháirtithe sa mhargadh airgeadais a mhalartú ag údaráis inniúla i gcomhréir leis na gníomhartha dlí dá dtagraítear in Airteagal 1(2) de na Rialacháin Bhunaidh. Ba cheart d’údaráis inniúla lena mbaineann na Treoirlínte comhpháirteacha a chomhlíonadh trí na treoirlínte a ionchorprú ina gcleachtais mhaoirseachta nó ina gcreat rialála de réir mar is iomchuí (e.g. trína gcreat dlíthiúil nó a bpróisis mhaoirseachta a leasú).

Is é an dáta a mheastar a chuirfear na Treoirlínte comhpháirteacha seo i bhfeidhm lá foilsithe na n-aistriúchán i dteangacha oifigiúla uile an Aontais Eorpaigh an 17.02.2025. Ina theannta sin, táthar ag súil go gcomhlíonfaidh údaráis inniúla codanna de na Treoirlínte comhpháirteacha ag céim níos déanaí (tráth difriúil nuair a bhaineann forálacha le daoine dlítheanacha nó nádúrtha), agus an t-am is gá chun sonraí stairiúla a chur isteach i gcóras Faisnéise ÚMEnna sula n-úsáidfear córas Faisnéise ÚMEnna á chur san áireamh.

I gcomhréir le hAirteagal 16(3) de na Rialacháin Bhunaidh, ní mór d’údaráis inniúla fógra a thabhairt don ÚME lena mbaineann maidir le cé acu an gcomhlíonann siad na Treoirlínte comhpháirteacha nó an bhfuil sé beartaithe acu iad a chomhlíonadh, nó cúiseanna a thabhairt le neamhchomhlíonadh ar bhealach eile, faoin 22.04.2025. In éagmais aon fhógra faoin spriocdháta sin, measfaidh an ÚME faoi seach go bhfuil na húdaráis inniúla neamhchomhlíontach. Ba cheart fógraí a sheoladh chuig [compliance@eba.europa.eu, compliance@eiopa.europa.eu agus compliance.fpsguidelines@esma.europa.eu] leis an tagairt ‘JC/GL/2024 88’. Tá teimpléad le haghaidh fógraí ar fáil ar shuíomhanna gréasáin na ÚMEnna. Ba cheart go mbeadh fógraí curtha isteach thar ceann a n-údarás inniúil ag daoine a bhfuil an t-údarás cuí acu chun comhlíonadh a thuairisciú.

Foilseofar fógraí ar shuíomhanna gréasáin na ÚMEnna, i gcomhréir le hAirteagal 16(3) de na Rialacháin Bhunaidh.

Beidh feidhm ag na Treoirlínte comhpháirteacha le linn an nós imeachta maidir le comhlíonadh agus míniú, tar éis comhairle forleathan ina leith leis na húdaráis inniúla cheana féin. Ina theannta sin, reáchtáladh dhá chomhairliúchán phoiblí, dar críoch an 2 Bealtaine 2023 agus an 15 Eanáir 2024, faoi seach. Rinne ÚMEnna idirchaidreamh freisin leis an Maoirseoir Eorpach ar Chosaint Sonraí, agus cuireadh a thuairim neamhfhoirmiúil san áireamh. Tá gá leis na Treoirlínte comhpháirteacha sin chun Airteagal 31a de Rialacháin ÚMEnna a chur chun feidhme agus is chuig údaráis inniúla amháin a dhírítear iad.

Ábhar

An Córas Faisnéise ÚMEnna a úsáid

Iarrataí ar fhaisnéis a sheoladh

Teideal IV – Forálacha críochnaitheacha agus cur chun feidhme