2.1. Ħarsa ġenerali lejn il-qafas tal-SREP

L-awtoritajiet kompetenti għandu jkollhom qafas komprensiv tal-SREP li jkopri l-komponenti li ġejjin, li għandhom jiġu vvalutati b’mod regolari, filwaqt li titqies il-lista ta’ atti legali ppubblikati separatament fuq is-sit web tal-EBA li magħhom għandha tiġi evalwata l-konformità tal-istituzzjoni. Il-mudell ta’ involviment tal-SREP fit-taqsima 2.4 jistabbilixxi kif dan il-qafas jista’ jiġi kkalibrat f’diversi istituzzjonijiet fl-applikazzjoni tal-prinċipju tal-proporzjonalità. Dawn il-komponenti huma:

• a. kategorizzazzjoni tal-istituzzjoni kif speċifikat fit-taqsima 2.1.1;
• b. monitoraġġ tal-indikaturi ewlenin kif speċifikat fit-Titolu 3;
• c. analiżi tal-mudell tan-negozju (BMA) kif speċifikat fit-Titolu 4;
• d. valutazzjoni tal-governanza interna u l-kontrolli fl-istituzzjoni kollha kif speċifikat fit-Titolu 5;
• e. valutazzjoni tar-riskji għall-kapital kif speċifikat fit-Titolu 6;
• f. valutazzjoni tal-adegwatezza tal-fondi proprji tal-istituzzjoni kif speċifikat fit-Titolu 7;
• g. valutazzjoni tar-riskji għal-likwidità u l-finanzjament u valutazzjoni tal-likwidità u l-finanzjament tal-SREP kif speċifikat fit-Titolu 8;
• h. valutazzjoni globali tal-SREP (inkluża l-applikazzjoni ta’ miżuri superviżorji – u miżuri ta’ intervent bikri, fejn meħtieġ) u komunikazzjoni kif speċifikat fit-Titolu 9 u fit-taqsima 2.1.2 rispettivament.

L-awtoritajiet kompetenti għandhom jikkunsidraw l-SREP bħala proċess kontinwu li jintegra l-eżitu tal-attivitajiet superviżorji kollha u s-sorsi kollha ta’ informazzjoni disponibbli f’ħarsa ġenerali superviżorja komprensiva ta’ istituzzjoni. L-SREP għandu jinkludi kunsiderazzjoni ta’ dan li ġej:

• a. l-eżitu tal-valutazzjonijiet tal-SREP preċedenti, l-analiżi tal-mudell tan-negozju u superviżjoni mhux fuq il-post kontinwa;
• b. ir-rapportar finanzjarju tal-istituzzjoni, il-pjan(ijiet) strateġiku(ċi), ir-rapportar regolatorju (ir-rapportar komuni – COREP, ir-rapportar finanzjarju – FINREP, u r-reġistru tal-kreditu, fejn disponibbli) u r-rapportar intern (eż. informazzjoni dwar il-ġestjoni, rapportar dwar il-kapital u l-likwidità, rapporti dwar ir-riskju intern);
• c. l-ICAAP/ILAAP tal-istituzzjoni u l-arranġamenti tal-ippjanar għall-irkupru;
• d. spezzjonijiet fuq il-post;
• e. valutazzjonijiet tal-mudell intern;
• f. analiżi fil-fond immirata;
• g. rieżamijiet tematiċi orizzontali;
• h. analiżi tal-ittestjar tal-istress;
• i. rapporti ta’ partijiet terzi (eż. rapporti tal-awditjar, rapporti minn analisti ta’ ekwità/kreditu);
• j. studji/stħarriġiet settorjali jew makroekonomiċi rilevanti oħra.

2.1.1. Kategorizzazzjoni tal-istituzzjonijiet

L-awtoritajiet kompetenti għandhom jikkategorizzaw l-istituzzjonijiet kollha taħt il-mandat ta’ superviżjoni tagħhom f’erba’ kategoriji differenti bbażati fuq id-daqs, l-importanza sistemika, in-natura, l-iskala u l-kumplessità tal-attivitajiet tal-istituzzjonijiet ikkonċernati u billi jikkunsidraw l-Artikolu 97(4) tad-Direttiva 2013/36/UE. Il-kategorizzazzjoni għandha tirrifletti l-valutazzjoni ta’ riskju sistemiku maħluq mill-istituzzjonijiet għas-sistema finanzjarja.

F’grupp ta’ entitajiet, jekk l-awtoritajiet kompetenti jiddeterminaw li r-rilevanza ta’ entitajiet differenti fi ħdan il-grupp, abbażi tal-elementi elenkati fil-paragrafu 17, tvarja, jistgħu japplikaw kategorizzazzjoni fil-livell individwali biex jirriflettu dawn id-differenzi (eż. billi jassenjaw kategoriji differenti lil diversi sussidjarji tal-grupp u/jew lill-entità konsolidata).

L-awtoritajiet kompetenti għandhom jirrevedu l-kategorizzazzjoni tal-istituzzjonijiet tagħhom perjodikament, u wara avvenimenti li jistgħu jaffettwaw ir-riskju tal-mudelli tan-negozju, jew operazzjonijiet korporattivi ewlenin bħal żvestiment kbir, fużjoni jew akkwiżizzjoni, azzjoni strateġika importanti.

Sabiex jiġi żgurat livell minimu ta’ komparabbiltà, l-awtoritajiet kompetenti għandhom jirreferu għall-kategoriji ta’ hawn taħt bħala punt tat-tluq:

► Kategorija 1 – L-istituzzjonijiet kollha definiti bħala “istituzzjonijiet kbar” fl-Artikolu 4(1), il-punt 146 tar-Regolament (UE) 575/2013. L-awtoritajiet kompetenti jistgħu jikklassifikaw “istituzzjonijiet kbar” bħala istituzzjonijiet tal-Kategorija 2 jew tal-Kategorija 3 għal raġunijiet ta’ proporzjonalità, sakemm ma humiex G-SIIs. Ir-riklassifikazzjoni ta’ “istituzzjonijiet kbar” li ma humiex G-SIIs għandha ssir f’konformità mal-kriterji kwalitattivi tal-Kategorija 2 u l-Kategorija 3 hawn taħt, meta jitqiesu d-daqs, l-importanza sistemika, in-natura, l-iskala u l-kumplessità tal-attivitajiet tal-istituzzjoni.

► Kategorija 2 – (i) Istituzzjonijiet medji sa kbar għajr dawk inklużi fil-Kategorija 1 li ma humiex “istituzzjonijiet żgħar u mhux kumplessi” kif definit fl-Artikolu 4(1), il-punt 145, tar-Regolament (UE) 575/2013 u li joperaw f’diversi linji operatorji, inklużi attivitajiet mhux bankarji, jew li għandhom attiitajiet transfruntiera mdaqqsa, u li joffru prodotti ta’ kreditu u finanzjarji lil klijenti bl-imnut u dawk korporattivi; (ii) istituzzjonijiet speċjalizzati mhux sistemikament importanti b’ishma mis-suq sinifikanti fil-linji operatorji jew fis-sistemi ta’ pagament tagħhom, jew pjattaformi/swieq tan-negozjar għal strumenti finanzjarji; (iii) istituzzjonijiet meqjusa importanti, minħabba d-daqs, l-attivitajiet, jew il-mudell tan-negozju tagħhom (eż. istituzzjonijiet ċentrali ta’ IPS, CCPs, CSDs, banek kooperattivi ċentrali jew banek ta’ tfaddil ċentrali), għall-ekonomija (eż. f’termini tal-assi totali fuq il-prodott domestiku gross – TA/GDP) jew għas-settur bankarju fi Stat Membru partikolari. ► Kategorija 3 – (i) Istituzzjonijiet żgħar sa medji għajr dawk inklużi fil-Kategoriji 1 u 2, li ma humiex “istituzzjonijiet żgħar u mhux kumplessi” kif definit fl-Artikolu 4(1), il-punt 145, tar-Regolament (UE) 575/2013 u li joperaw f’għadd limitat ta’ linji operatorji, jew għandhom attivitajiet transfruntiera mhux sinifikanti, u li joffru fil-biċċa l-kbira prodotti ta’ kreditu lil klijenti bl-imnut u dawk korporattivi u istituzzjonali b’offerta limitata ta’ prodotti finanzjarji;

• (ii) istituzzjonijiet speċjalizzati b’ishma mis-suq inqas sinifikanti fil-linji operatorji jew fis-sistemi ta’ pagament tagħhom, jew skambji finanzjarji.

► Kategorija 4 – L-istituzzjonijiet kollha definiti bħala “istituzzjonijiet żgħar u mhux kumplessi” fl-Artikolu 4(1), il-punt 145 tar-Regolament (UE) 575/2013 u l-istituzzjonijiet żgħar mhux kumplessi l-oħrajn kollha li ma jaqgħux fil-Kategoriji 1 sa 3 (eż. b’ambitu limitat tal-attivitajiet u ishma mis-suq mhux sinifikanti fil-linji operatorji tagħhom).

2.1.2. Valutazzjoni kontinwa tar-riskji, qafas ta’ eskalazzjoni u miżuri superviżorji

L-awtoritajiet kompetenti għandhom jivvalutaw kontinwament ir-riskji li l-istituzzjoni hi esposta jew tista’ tkun esposta għalihom permezz tal-attivitajiet superviżorji tagħhom f’konformità mal-mudell ta’ involviment tal-SREP stabbilit fit-taqsima 2.4.

L-awtoritajiet kompetenti għandhom jiżguraw li s-sejbiet tal-valutazzjonijiet tagħhom ikunu dokumentati b’mod ċar, b’fokus fuq il-kawżi fundamentali tan-nuqqasijiet identifikati. Dawn is-sejbiet għandhom jiġu riflessi fil-punteġġi tal-SREP mogħtija f’konformità ma’ dawn il-linji gwida u għandhom jinfurmaw il-miżuri superviżorji sussegwenti li l-awtoritajiet kompetenti jistgħu japplikaw kif speċifikat fl-Artikoli 102, 104 u 105 tad-Direttiva 2013/36/UE u fil-liġi nazzjonali, u, meta applikabbli, il-miżuri ta’ intervent bikri kif speċifikat fl-Artikolu 27 tad-Direttiva 2014/59/UE, jew kwalunkwe kombinazzjoni ta’ dawn ta’ hawn fuq.

Bħala parti mill-attivitajiet superviżorji kontinwi tagħhom, l-awtoritajiet kompetenti għandhom iwettqu attivitajiet ta’ segwitu xierqa u fil-ħin biex jiżguraw li istituzzjoni indirizzat b’mod effettiv in-nuqqasijiet identifikati. F’dan ir-rigward, l-awtoritajiet kompetenti għandhom jistabbilixxu qafas ta’ eskalazzjoni ta’ livell għoli għall-miżuri superviżorji, li jappoġġa l-għażla tal-aktar miżuri xierqa (kemm kwantitattivi kif ukoll kwalitattivi) biex jindirizzaw in-nuqqasijiet identifikati. Dan huwa mingħajr preġudizzju għall-poteri superviżorji pprovduti skont il-qafas legali applikabbli u d-diskrezzjoni tal-awtoritajiet kompetenti li jiddeterminaw l-aktar miżuri xierqa bbażati fuq iċ-ċirkostanzi u n-nuqqasijiet speċifiċi.

Il-qafas imsemmi fil-paragrafu preċedenti għandu jikkunsidra l-azzjonijiet li ġejjin, li ma għandhomx ikunu maħsuba sabiex ikunu strettament sekwenzjali u jistgħu jiġu eskalati jew deeskalati kif xieraq:

• a. l-involviment fi djalogu superviżorju msaħħaħ mal-istituzzjoni, bħall-organizzazzjoni ta’ laqgħa mal-korp maniġerjali jew il-ħtieġa ta’ awtovalutazzjoni mill-istituzzjoni;
• b. il-komunikazzjoni ta’ azzjonijiet korrettivi mistennija mill-istituzzjoni (miżuri mhux vinkolanti), bħal aspettattivi superviżorji jew rakkomandazzjonijiet;
• c. il-ħtieġa ta’ azzjoni(jiet) korrettiva/i speċifika/speċifiċi mill-istituzzjoni (miżuri vinkolanti), bħall-istabbiliment ta’ miżuri kwalitattivi li l-istituzzjoni trid tikkonforma magħhom u/jew l-istabbiliment/iż-żieda tar-rekwiżit tal-Pilastru 2 jew tar-rekwiżiti ta’ likwidità;
• d. l-infurzar ta’ miżuri superviżorji biex jissewwew in-nuqqasijiet identifikati, bħal penali amministrattivi, miżuri ta’ rimedju jew multi.

Meta jagħżlu miżuri superviżorji, l-awtoritajiet kompetenti għandhom jidentifikaw il-perkors kollu ta’ eskalazzjoni, filwaqt li jieħdu inkunsiderazzjoni l-informazzjoni disponibbli, in-natura, id-daqs u l-kumplessità tal-istituzzjoni, u l-bżonn li tiġi żgurata r-rimedjazzjoni fil-ħin tan-nuqqasijiet identifikati. L-għażla għandha tkun iggwidata mill-kunsiderazzjonijiet li ġejjin, kif applikabbli:

• a. l-eżitu maħsub li l-miżuri għandhom l-għan li jiksbu u, fejn fattibbli, l-iskedi ta’ żmien mistennija biex l-istituzzjoni tindirizza n-nuqqasijiet;
• b. is-severità tan-nuqqasijiet u l-impatt prudenzjali potenzjali jekk il-kwistjoni ma tiġix indirizzata (jiġifieri jekk huwiex meħtieġ li l-kwistjoni tiġi indirizzata b’miżura speċifika) u jekk in-nuqqasijiet diġà ġewx indirizzati/koperti b’miżuri oħra;
• c. il-kapaċità jew l-intenzjoni murija tal-istituzzjoni li tirrimedja n-nuqqasijiet;
• d. jekk miżuri oħra jiksbux l-istess objettiv b’anqas impatt amministrattiv u finanzjarju fuq l-istituzzjoni;
• e. il-possibbiltà li r-riskji u l-vulnerabbiltajiet identifikati jistgħu jkunu korrelatati jew isostnu lilhom infushom, jew it-tnejn, li jkun jistħoqq żieda fir-rigorożità tal-miżuri superviżorji;
• f. kwalunkwe fattur ieħor meqjus bħala rilevanti mill-awtoritajiet kompetenti.

Mingħajr preġudizzju għad-diskrezzjoni tal-awtoritajiet kompetenti fl-għażla tal-aktar miżuri xierqa, il-miżuri kwantitattivi u kwalitattivi kollha disponibbli għandhom jintużaw b’mod li jippermetti li jiġi indirizzat bl-aħjar mod il-livell ta’ riskju u/jew in-nuqqasijiet. Dan għandu jqis in-natura tar-riskju (kwantitattiva u/jew kwalitattiva), il-proċess ta’ eskalazzjoni, u l-fatt li miżuri kwantitattivi għandhom jiġu applikati biex jindirizzaw nuqqasijiet fil-governanza interna, inklużi l-arranġamenti ta’ kontroll intern, u kwistjonijiet oħra, fejn miżuri superviżorji oħra ma kinux effettivi jew huma meqjusa insuffiċjenti biex jindirizzaw in-nuqqasijiet identifikati fi żmien xieraq⁷ .

⁷ F’konformità mal-Artikolu 104a(1)(b) tad-Direttiva 2013/36 tal-Parlament Ewropew u tal-Kunsill dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, p. 338, ELI: http://data.europa.eu/eli/dir/2013/36/2026-01-11).

Id-dispożizzjonijiet ta’ dan it-titolu huma mingħajr preġudizzju għall-possibbiltà li l-awtoritajiet kompetenti jistgħu jieħdu miżuri superviżorji marbutin direttament mal-eżiti ta’ kwalunkwe attività superviżorja (eż. eżamijiet fuq il-post jew valutazzjonijiet tal-adegwatezza tal-membri tal-korp maniġerjali u funzjonijiet ewlenin) fejn l-eżiti ta’ tali attivitajiet jeħtieġu applikazzjoni immedjata tal-miżuri superviżorji biex jindirizzaw nuqqasijiet materjali. 2.1.3. Djalogu mal-istituzzjonijiet

L-awtoritajiet kompetenti għandhom jidħlu fi djalogu mal-istituzzjonijiet waqt li jwettqu l-attivitajiet superviżorji tagħhom.

L-awtoritajiet kompetenti għandhom jikkomunikaw l-eżiti tal-valutazzjoni tal-SREP lill-istituzzjoni f’konformità mat-Titolu 9 u jinfurmaw lill-istituzzjoni dwar kwalunkwe azzjoni meħtieġa biex tikkonforma mal-miżuri superviżorji applikati abbażi ta’ dawk is-sejbiet.