4.3. Valutazzjoni tar-robustezza tal-BMA u identifikazzjoni tal-vulnerabbiltajiet

L-awtoritajiet kompetenti għandhom iwettqu analiżi tal-karatteristiċi kwantitattivi tal-mudell tan-negozju kurrenti tal-istituzzjoni biex jivvalutaw il-kapaċità tagħha li tiġġenera profitti aċċettabbli fuq perjodu ta’ żmien qasir, medju u twil, fid-dawl tal-apptit għar-riskju tal-istituzzjoni u l-istrutturi tagħha ta’ finanzjament u kapital. L-oqsma għal analiżi mill-awtoritajiet kompetenti għandhom jinkludu:

• a. fatturi ewlenin tal-profittabbiltà, inklużi x-xejriet, billi jiġu vvalutati l-elementi sottostanti tal-kapaċità tal-istituzzjoni li tiġġenera dħul, wara elementi ta’ eċċezzjoni u avvenimenti ta’ darba, id-diżaggregazzjoni tal-flussi tal-introjtu, id-diżaggregazzjoni u l-allokazzjoni tal-kostijiet, il-provvedimenti għall-indeboliment u l-proporzjonijiet ewlenin (eż. marġni tal-imgħax nett, kost/introjtu, indeboliment tas-self, u l-kost tar-riskju). Din il-valutazzjoni tista’ tiġi kkomplementata mill-analiżi tal-metriċi rilevanti ta’ profittabbiltà aġġustati għar-riskju (eż. Redditu fuq il-Kapital Allokat – ROAC, jew ir-Redditu Aġġustat għar-Riskju fuq ir-Redditu tal-Kapital - RAROC), fejn dawn ikunu disponibbli u meqjusa affidabbli;
• b. il-karta bilanċjali, inklużi x-xejriet, billi jiġu vvalutati t-taħlita ta’ assi u obbligazzjonijiet, l-istruttura tal-finanzjament, il-bidla fit-TREA u fil-fondi proprji, u l-proporzjonijiet ewlenin (eż. redditu fuq l-ekwità/assi, kapital tal-Grad 1, diskrepanza fil-finanzjament), kif ukoll il-konċentrazzjonijiet fil-P&L u fil-karta bilanċjali relatati mal-klijenti, is-setturi u l-ġeografiji;
• c. l-aptit u l-livelli ta’ tolleranza għar-riskju, billi jiġu vvalutati l-limiti formali stabbiliti mill-istituzzjoni skont it-tip ta’ riskju u l-konformità magħhom biex jifhmu r-riskji li l-istituzzjoni hi lesta tieħu biex tmexxi l-prestazzjoni finanzjarja tagħha u tiżgura r-reżiljenza operazzjonali. Dan għandu jkopri wkoll it-tolleranza tal-impatt għat-tfixkil tal-ICT.

L-awtoritajiet kompetenti għandhom iwettqu analiżi tal-karatteristiċi kwalitattivi tal-mudell tan-negozju kurrenti tal-istituzzjoni biex jifhmu l-fatturi ewlenin ta’ suċċess u d-dipendenzi ewlenin tagħha. L-oqsma għal analiżi mill-awtoritajiet kompetenti għandhom jinkludu:

• a. l-ambjent tan-negozju, billi jivvalutaw l-ambjent prospettiv li fih topera l-istituzzjoni bbażat fuq l-iskoperturi ġeografiċi u tan-negozju prinċipali jew materjali tagħha. Bħala parti minn din il-valutazzjoni, l-awtoritajiet kompetenti għandhom jiżviluppaw fehim tal-varjabbli makroekonomiċi ewlenin, ix-xejriet tas-suq, il-pajsaġġ kompetittiv u żviluppi rilevanti oħra (bħal bidliet regolatorji u legali);
• b. dipendenzi interni u esterni ewlenin, billi jiġu vvalutati l-fatturi prinċipali eżoġeni u endoġeni li jistgħu jinfluwenzaw is-suċċess tal-mudell tan-negozju, filwaqt li jitqiesu l-arranġamenti assoċjati ta’ governanza u ta’ kontroll intern;
• c. franchise u oqsma ta’ vantaġġ kompetittiv, billi jiġu vvalutati r-reputazzjoni tal-istituzzjoni u s-saħħa tar-relazzjonijiet mal-klijenti, il-fornituri u s-sħab, kif ukoll jekk hemmx oqsma fejn l-istituzzjoni għandha vantaġġ kompetittiv fuq il-pari tagħha;
• d. appoġġ tal-ICT, billi jiġi vvalutat il-livell u l-adegwatezza tal-allinjament bejn l-ICT u n-negozju f’termini ta’ strateġija, objettivi, attivitajiet, riżorsi u funzjonijiet, u billi jiġi kkunsidrat jekk kwalunkwe tħassib relatat mal-ICT jistax ikollu impatt fuq l-istrateġija u l-objettivi tan-negozju tal-istituzzjoni.

L-awtoritajiet kompetenti għandhom jikkomplementaw l-analiżi billi jwettqu analiżi prospettiva (kemm kwantitattiva kif ukoll kwalitattiva) tal-projezzjonijiet finanzjarji u tal-pjan strateġiku tal-istituzzjoni biex jifhmu s-suppożizzjonijiet u d-dipendenzi sottostanti, il-plawżibbiltà u r-riskju tal-istrateġija tan-negozju tagħha. L-oqsma għal analiżi mill-awtoritajiet kompetenti għandhom jinkludu:

• a. l-istrateġija globali u l-fatturi ewlenin ta’ suċċess, billi jiġu vvalutati l-objettivi ta’ ġestjoni kwantitattivi u kwalitattivi prinċipali u d-diskrepanza bejn il-mudell tan-negozju previst – wara l-eżekuzzjoni – u l-mudell kurrenti;
• b. il-prestazzjoni finanzjarja pproġettata, billi jiġu vvalutati l-plawżibbiltà u l-konsistenza tas-suppożizzjonijiet magħmula mill-istituzzjoni li jixprunaw l-istrateġija u l-previżjonijiet tagħha;
• c. il-kapaċitajiet ta’ eżekuzzjoni, billi jiġu vvalutati r-rekord tal-maniġment fit-twettiq ta’ strateġiji u previżjonijiet preċedenti, kif ukoll il-kapaċità globali tal-istituzzjoni li tuża vantaġġi kompetittivi u fatturi ewlenin ta’ suċċess biex twettaq in-negozju tagħha u tiġġenera redditi b’mod effettiv. Bħala parti minn din il-valutazzjoni, l-awtoritajiet kompetenti għandhom jikkunsidraw:
• i. l-adegwatezza tal-qafas ta’ allokazzjoni tal-kostijiet - f’termini ta’ adegwatezza biex jirrifletti l-profittabbiltà tal-linji/unitajiet operatorji;
• ii. il-qafas tal-ipprezzar tat-trasferiment tal-fondi – f’termini ta’ determinazzjoni adegwata tal-komponent tal-introjtu nett għal kull linja/unità operatorja, prodott u klijent;
• iii. il-qafas tal-ipprezzar tas-self – f’termini ta’ governanza adegwata tal-proċess tal-ipprezzar tas-self, il-metodoloġija tal-ipprezzar, kunsiderazzjoni xierqa tal-komponenti kollha tal-ipprezzar tas-self, u l-monitoraġġ ex post tal-profittabbiltà u r-rapportar tad-deċiżjonijiet dwar l-ipprezzar tal-prodotti;
• iv. il-qafas ta’ kondiviżjoni tad-dħul bejn istituzzjonijiet stabbiliti fl-Unjoni li huma parti minn gruppi ta’ pajjiżi terzi u entitajiet oħra ta’ dak il-grupp stabbiliti barra mill-Unjoni u li ma humiex ikkonsolidati mill-impriża omm tal-UE – f’termini ta’ kondiviżjoni ġusta tal-P&L bejn l-entitajiet jew il-linji operatorji li jipparteċipaw fiċ-ċiklu tal-ħajja tat-tranżazzjonijiet u tal-governanza adegwata.

Fl-analiżi, l-awtoritajiet kompetenti għandhom jikkunsidraw kwalunkwe indikazzjoni li l-mudell u l-attivitajiet tan-negozju jwasslu għal riskji akbar tal-ML/TF, inklużi attivitajiet relatati ma’ kriptoassi jew it-teħid ta’ depożiti jew l-istabbiliment jew l-użu ta’ entitajiet ġuridiċi f’pajjiżi terzi b’riskju għoli, kif identifikati f’konformità mal-Artikolu 9 tad-Direttiva (UE) 2015/849. Fejn preżenti, dawn l-indikazzjonijiet għandhom jiġu kkomplementati b’analiżi kwantitattiva, kif xieraq, b’fokus partikolari fuq il-materjalità tad-dħul u l-introjtu minn operazzjonijiet immexxija f’tali pajjiżi terzi b’riskju għoli, il-konċentrazzjonijiet ta’ skoperturi għall-klijenti li għalihom l-istituzzjoni tapplika diliġenza dovuta msaħħa tal-klijenti kif stabbilit fil-Kapitolu II, it-Taqsima 3 tad-Direttiva 2015/849. L-awtoritajiet kompetenti għandhom jiskambjaw informazzjoni mas-superviżur fil-qasam tal-AML/CFT dwar dawn l-indikazzjonijiet kif stabbilit fil-paragrafu 59.