6.1. Kunsiderazzjonijiet ġenerali

L-awtoritajiet kompetenti għandhom jivvalutaw u jagħtu punteġġ lir-riskji għall-kapital li ġew identifikati bħala materjali għall-istituzzjoni.

L-iskop ta’ dan it-titolu huwa li jipprovdi metodoloġiji komuni li għandhom jiġu kkunsidrati għall-valutazzjoni tar-riskji individwali u l-ġestjoni u l-kontrolli tar-riskju. Ma huwiex maħsub biex ikun eżawrjenti u jagħti lok lill-awtoritajiet kompetenti biex jikkunsidraw kriterji addizzjonali oħrajn li jistgħu jitqiesu rilevanti fuq il-bażi tal-esperjenza tagħhom u l-karatteristiċi speċifiċi tal-istituzzjoni.

Dan it-titolu jipprovdi lill-awtoritajiet kompetenti bi gwida għall-valutazzjoni u l-punteġġ tar-riskji għall-kapital li ġejjin:

• a. riskju ta’ kreditu u tal-kontroparti;
• b. riskju tas-suq;
• c. riskju operazzjonali;
• d. riskju taċ-ċaqliq fir-rata tal-imgħax minn attivitajiet mhux kummerċjali (IRRBB).

It-titolu jidentifika wkoll sett ta’ sottokategoriji fi ħdan kull kategorija ta’ riskju ta’ hawn fuq, li għandhom jitqiesu meta jiġu vvalutati r-riskji għall-kapital. Skont il-materjalità ta’ kwalunkwe waħda minn dawn is-sottokategoriji għal istituzzjoni partikolari, dawn jistgħu jiġu vvalutati u mogħtija punteġġ b’mod individwali. L-Annessi I-IV jippreżentaw listi mhux eżawrjenti ta’ sottokategoriji għar-riskju ta’ kreditu, ir-riskju tas-suq, ir-riskju operazzjonali u l-IRRBB li l-awtoritajiet kompetenti għandhom jikkunsidraw, meta jkunu rilevanti.

Id-deċiżjoni dwar il-materjalità tiddependi fuq il-ġudizzju superviżorju. Madankollu, għar-riskju ta’ self FX, fid-dawl tar-Rakkomandazzjoni tal-ESRB dwar self f’muniti barranin²⁷ , il-materjalità għandha tiġi ddeterminata billi jittieħed inkunsiderazzjoni l-livell limitu li ġej: self f’munita barranija mogħti lil mutwatarji mhux iħħeġġjati li jammonta għal mill-inqas 10% tal-portafoll ta’ self totali ta’ istituzzjoni (is-self totali mogħti lil korporazzjonijiet mhux finanzjarji u lil unitajiet domestiċi), fejn dan il-portafoll ta’ self totali jammonta għal mill-inqas 25% tal-assi totali tal-istituzzjoni.

²⁷ Rakkomandazzjoni tal-Bord Ewropew dwar ir-Riskju Sistemiku tal-21 ta’ Settembru 2011 dwar is-self f’muniti barranin (ESRB/2011/1) (ĠU C 342, 22.11.2011, p. 1).

L-awtoritajiet kompetenti għandhom jivvalutaw ukoll riskji oħrajn li huma identifikati bħala materjali għal istituzzjoni speċifika iżda li ma humiex elenkati hawn fuq (eż. riskju ta’ pensjoni, riskju strateġiku u tan-negozju, riskju step-in, konċentrazzjoni intra u interriskju). Dawn li ġejjin jistgħu jgħinu l-proċess ta’ identifikazzjoni:

• a. fatturi ewlenin tat-TREA;
• b. riskji identifikati fl-ICAAP tal-istituzzjoni;
• c. riskji li jirriżultaw mill-mudell tan-negozju tal-istituzzjoni (inklużi dawk identifikati minn istituzzjonijiet oħra li joperaw mudell tan-negozju simili);
• d. informazzjoni li toħroġ mill-monitoraġġ tal-indikaturi ewlenin;
• e. sejbiet u osservazzjonijiet minn rapporti ta’ awditjar intern jew estern;
• f. rakkomandazzjonijiet u linji gwida maħruġa mill-EBA, kif ukoll twissijiet u rakkomandazzjonijiet maħruġa mill-awtoritajiet makroprudenzjali jew il-BERS.

L-elementi ta’ hawn fuq għandhom jitqiesu wkoll mill-awtoritajiet kompetenti meta jkunu qegħdin jippjanaw l-intensità tal-attività superviżorja tagħhom fir-rigward tal-valutazzjoni ta’ riskju speċifiku.

Għar-riskju ta’ kreditu, tas-suq u dak operazzjonali, l-awtoritajiet kompetenti għandhom jevalwaw inter alia l-konformità tal-istituzzjoni mal-atti legali ppubblikati separatament fuq is-sit web tal-EBA kif imsemmi fil-paragrafu 12. Madankollu, dawn il-linji gwida jestendu l-kamp ta’ applikazzjoni tal-valutazzjoni lil hinn minn dawk ir-rekwiżiti minimi biex jippermettu lill-awtoritajiet kompetenti jiffurmaw perspettiva komprensiva dwar ir-riskji għall-kapital.

Meta jevalwaw ir-riskji għall-kapital, l-awtoritajiet kompetenti għandhom jikkunsidraw ukoll l-impatt potenzjali tar-riskju tal-kostijiet tal-ksib tal-fondi skont il-metodoloġija inkluża fit-Titolu 8 u jistgħu jiddeċiedu dwar il-ħtieġa ta’ miżuri li jimmitigaw dan ir-riskju.

Fl-implimentazzjoni tagħhom tal-metodoloġiji speċifikati f’dan it-titolu, l-awtoritajiet kompetenti għandhom jidentifikaw indikaturi kwantitattivi rilevanti u metriċi oħrajn, li jistgħu jintużaw ukoll għall-monitoraġġ tal-indikaturi ewlenin, kif speċifikat fit-Titolu 3, u għandhom iqisu wkoll, fejn xieraq, il-miżuri tar-riskju intern tal-istituzzjonijiet.

Għal kull riskju materjali, l-awtoritajiet kompetenti għandhom jivvalutaw u jirriflettu fil-punteġġ tar-riskju:

• a. ir-riskju inerenti (skoperturi għar-riskju);
• b. il-kwalità u l-effettività tal-ġestjoni u tal-kontrolli tar-riskju.

Dan il-fluss tal-valutazzjoni huwa rappreżentat fl-Illustrazzjoni 2 ta’ hawn taħt. Illustrazzjoni 2. Fluss tax-xogħol tal-valutazzjoni tar-riskji għall-kapital

kontrolli individwali Punteġġ tar-riskju

Meta jwettqu l-valutazzjonijiet tagħhom, l-awtoritajiet kompetenti għandhom jużaw is-sorsi ta’ informazzjoni disponibbli, inkluż rapportar regolatorju, il-metriċi u r-rapporti interni tal-istituzzjoni (eż. rapport tal-awditjar intern, rapporti ta’ ġestjoni tar-riskju, informazzjoni mill-ICAAP), rapporti ta’ spezzjoni fuq il-post u rapporti esterni (eż. il-komunikazzjonijiet tal-istituzzjoni lill-investituri, l-aġenziji ta’ klassifikazzjoni). L-awtoritajiet kompetenti għandhom jirrikorru għal rapportar ad hoc fejn ikun strettament meħtieġ u proporzjonat biex iwettqu l-kompiti superviżorjii tagħhom, u fejn l-informazzjoni ma tkunx duplikattiva jew disponibbli b’mod ieħor, f’konformità mat-tieni subparagrafu tal-Artikolu 104(2) tas-CRD. Filwaqt li l-valutazzjoni hija maħsuba li tkun speċifika għal istituzzjoni, il-paragun mal-pari għandu jiġi kkunsidrat biex tiġi identifikata skopertura potenzjali għar-riskji għall-kapital. Għal tali finijiet, il-pari għandhom jiġu ddefiniti fuq bażi ta’ riskju b’riskju u jistgħu jvarjaw minn dawk identifikati għall-BMA jew analiżijiet oħrajn.

Fil-valutazzjoni tar-riskji għall-kapital, l-awtoritajiet kompetenti għandhom jevalwaw ukoll il-preċiżjoni u l-prudenza tal-kalkolu tar-rekwiżiti minimi tal-fondi proprji biex jidentifikaw sitwazzjonijiet fejn il-kalkoli minimi tal-fondi proprji jistgħu jissottovalutaw il-livell attwali tar-riskju. Din il-valutazzjoni tinforma d-determinazzjoni tal-P2R kif previst fit-taqsima 7.2.3.

L-eżitu tal-valutazzjoni ta’ kull riskju materjali għandu jiġi rifless f’sommarju tas-sejbiet li jipprovdi spjegazzjoni tal-motivaturitar-riskju prinċipali, u punteġġ tar-riskju, kif speċifikat fit-taqsimiet li ġejjin.