8.1. Kunsiderazzjonijiet ġenerali

L-awtoritajiet kompetenti għandhom jivvalutaw ir-riskji materjali ta’ likwidità u finanzjament tal-istituzzjoni u jekk il-likwidità u l-finanzjament tal-istituzzjoni jipprovdux kopertura xierqa tar-riskji vvalutati. L-iskop ta’ dan it-titolu huwa li jipprovdi metodoloġiji li għandhom jiġu kkunsidrati meta jiġu vvalutati r-riskji individwali, u l-ġestjoni u l-kontrolli tar-riskju. Ma huwiex maħsub biex ikun eżawrjenti, u jagħti lok lill-awtoritajiet kompetenti biex jikkunsidraw kriterji addizzjonali oħrajn li jistgħu jitqiesu rilevanti fuq il-bażi tal-esperjenza tagħhom u l-karatteristiċi speċifiċi tal-istituzzjoni fil-valutazzjoni tagħhom tal-likwidità u l-finanzjament tal-istituzzjoni.

Meta jivvalutaw ir-riskju inerenti ta’ likwidità u ta’ finanzjament, u l-adegwatezza tal-qafas ta’ kontroll intern tar-riskju ta’ likwidità u ta’ finanzjament, l-awtoritajiet kompetenti għandhom jevalwaw inter alia l-konformità globali tal-istituzzjoni mal-atti legali ppubblikati separatament fuq is-sit web tal-EBA kif imsemmi fil-paragrafu 12.

Il-metodoloġija tinkludi sitt komponenti prinċipali:

• a. valutazzjoni tar-riskju ta’ likwidità inerenti (taqsima 8.2);
• b. valutazzjoni tar-riskju ta’ finanzjament inerenti (taqsima 8.3);
• c. valutazzjoni tal-qafas ta’ ġestjoni u kontroll tar-riskju ta’ likwidità u ta’ finanzjament (taqsima 8.4);
• d. sommarju tas-sejbiet u punteġġ għall-adegwatezza tal-likwidità u tal-finanzjament (taqsima 8.5);
• e. determinazzjoni ta’ miżuri tar-riskju potenzjali ta’ likwidità u finanzjament tal-SREP (taqsima 8.6);
• f. valutazzjoni komparattiva u stabbiliment ta’ rekwiżiti kwantitattivi ta’ likwidità u ta’ finanzjament (taqsima 8.7).

Il-fluss tal-valutazzjoni huwa ddokumentat grafikament fl-Illustrazzjoni 3. Illustrazzjoni 3. Elementi tal-valutazzjoni tar-riskji għal-likwidità u l-finanzjament

Valutazzjoni tar- adegwatezza riskji għal- tal-likwidità u likwidità tal-finanzjament

Fil-valutazzjoni tar-riskji għal-likwidità u l-finanzjament, l-awtoritajiet kompetenti għandhom jirrevedu, fost l-oħrajn, il-proporzjon tal-kopertura tal-likwidità (LCR) tal-istituzzjoni, kif speċifikat fir-Regolament Delegat tal-Kummissjoni (UE) 2015/61⁴⁴ u l-proporzjon ta’ finanzjament stabbli nett (NSFR), kif stabbilit fit-Titolu IV tal-Parti Sitta tar-Regolament (UE) 575/2013, u l-ILAAP tal-istituzzjoni. Huma għandhom jikkunsidraw ukoll ir-rakkomandazzjonijiet, linji gwida u gwida inklużi fir-rapporti ta’ implimentazzjoni tal-LCR u tal-NSFR maħruġa mill-EBA, kif ukoll it-twissijiet u r-rakkomandazzjonijiet maħruġa minn awtoritajiet makroprudenzjali jew mill-BERS. Madankollu, dawn il-linji gwida jestendu l-kamp ta’ applikazzjoni tal-valutazzjoni lil hinn minn dawk ir-rekwiżiti minimi, bil-għan li jippermettu lill-awtoritajiet kompetenti jiffurmaw fehma komprensiva tar-riskji.

L-awtoritajiet kompetenti għandhom jiżguraw li l-valutazzjoni tagħti attenzjoni lil kif il-mudell tan-negozju tal-istituzzjoni jimpatta l-profil tar-riskju ta’ likwidità u ta’ finanzjament tagħha, filwaqt li jitqies l-eżitu tal-analiżi tal-mudell tan-negozju mwettqa taħt it-Titolu 4. Fil-proċess, għandhom joqgħodu attenti għal kif il-mudell tan-negozju tal-istituzzjoni nbidel maż-żmien u jekk dan wassalx għal xi riskji miżjuda. L-awtoritajiet kompetenti għandhom jimmonitorjaw l-indikaturi kwantitattivi ewlenin biex jaqbdu x-xejriet u jinfurmaw din l-analiżi.

Sabiex jassistu fil-valutazzjoni kwantitattiva tar-riskji u tal-adegwatezza tal-likwidità u tal-finanzjament tal-istituzzjoni, l-awtoritajiet kompetenti għandhom jirreferu għall-gwida addizzjonali disponibbli fit-taqsima 8.7 dwar il-valutazzjoni komparattiva u l-istabbiliment ta’ rekwiżiti kwantitattivi għal-likwidità u l-finanzjament.

L-awtoritajiet kompetenti għandhom jevalwaw ukoll kwalunkwe informazzjoni b’impatt potenzjali fuq il-pożizzjoni ta’ likwidità u finanzjament (eż. mill-awtoritajiet kompetenti fil-qasam tal-AML/CFT).

Meta jirrevedu l-kwalità tal-arranġamenti organizzazzjonali u ta’ ġestjoni tar-riskju tal-istituzzjoni għall-ġestjoni tar-riskju ta’ likwidità u ta’ finanzjament, l-awtoritajiet kompetenti għandhom jiżguraw li dawn ikopru l-entitajiet legali materjali, il-fergħat u s-sussidjarji kollha tagħha.

L-awtoritajiet kompetenti għandhom iqisu l-impatt tar-riskji tal-ESG fuq ir-riskji inerenti ta’ likwidità u ta’ finanzjament kif ukoll l-adegwatezza tal-qafas ta’ ġestjoni u kontroll tar-riskji ta’ likwidità u ta’ finanzjament relatat mar-riskji tal-ESG, filwaqt li jagħtu prijorità lir-riskji ambjentali.

L-eżitu tal-valutazzjoni ta’ kull riskju individwali għandu jiġi rifless f’sommarju tas-sejbiet u spjegazzjoni tal-motivaturi ewlenin tar-riskju u punteġġ, kif spjegat fit-taqsimiet li ġejjin.