Ittestjar tal-istress speċifiku għal-likwidità u l-finanzjament tal-istituzzjoni

L-awtoritajiet kompetenti għandhom jivvalutaw jekk istituzzjoni tkunx implimentat ittestjar tal-istress adegwat speċifiku għal-likwidità, f’konformità mal-Linji Gwida tal-EBA dwar l-ittestjar tal-istress tal-istituzzjonijiet⁴⁶ :

• a. biex tifhem l-impatt tal-avvenimenti negattivi fuq l-iskopertura għar-riskju tagħha u biex tkun kapaċi tivvaluta l-adegwatezza tal-assi likwidi, il-kapaċità ta’ kontrobilanċ u l-istruttura ta’ finanzjament tagħha;
• b. biex tkopri r-riskji li jistgħu jikkristallizzaw matul diversi tipi ta’ xenarji ta’ stress u/jew biex tindirizza r-riskji li jinħolqu min-nuqqasijiet fil-kontroll, fil-governanza jew nuqqasijiet oħra.

⁴⁶ EBA/GL/2018/04

L-awtoritajiet kompetenti għandhom jieħdu inkunsiderazzjoni jekk il-qafas jippermettix lill-istituzzjoni:

• a. tiddetermina l-perjodu ta’ żmien ta’ sopravivenza tal-istituzzjoni fid-dawl tal-bafer ta’ likwidità eżistenti u s-sorsi stabbli ta’ finanzjament tagħha, u filwaqt li jitqies l-aptit għar-riskju tal-istituzzjoni, matul perjodu ta’ stress fuq il-likwidità sever iżda plawżibbli;
• b. tanalizza l-impatt tax-xenarji ta’ stress fuq il-pożizzjoni konsolidata tagħha tal-likwidità fil-grupp kollu u fuq il-pożizzjoni tal-likwidità ta’ entitajiet u linji operatorji individwali;
• c. tifhem fejn jistgħu jinqalgħu r-riskji, irrispettivament mill-istruttura organizzazzjonali tagħha u l-grad tal-ġestjoni ċentralizzata tar-riskju tal-likwidità.

L-awtoritajiet kompetenti għandhom jiżguraw li l-istituzzjoni tipprovdi l-impatt immudellat ta’ tipi differenti ta’ xenarji ta’ stress (kif spjegat fil-Linji Gwida tal-EBA dwar l-ittestjar ta’ stress tal-istituzzjonijiet), kif ukoll numru ta’ testijiet tas-sensittività (fuq il-bażi tal-proporzjonalità). Ix-xenarji ta’ stress u x-xokkijiet simulati fihom ma għandhomx ikunu bbażati biss fuq il-passat, iżda għandhom jagħmlu użu wkoll minn xenarji ta’ stress ipotetiċi bbażati fuq ġudizzju espert. L-awtoritajiet kompetenti għandhom janalizzaw jekk ix-xenarji li ġejjin jitqisux bħala minimiu:

• a. fuq terminu qasir u fit-tul;
• b. speċifiċi għall-istituzzjoni u fis-suq kollu (iseħħu fl-istess ħin f’varjetà ta’ swieq);
• c. kombinazzjoni ta’ (a) u (b).

Aspett importanti li l-awtoritajiet kompetenti għandhom jikkunsidraw meta jivvalutaw il-qafas tal-ittestjar tal-istress tal-istituzzjoni huwa l-immudellar tal-impatt tax-xenarju/i ta’ stress ipotetiku/ipotetiċi fuq il-flussi tal-flus tal-istituzzjoni u fuq il-kapaċità ta’ kontrobilanċ u l-perjodu ta’ żmien ta’ sopravivenza tagħha, u jekk l-immudellar jirriflettix l-impatti differenti li l-istress ekonomiku jista’ jkollu kemm fuq l-assi tal-istituzzjoni kif ukoll fuq id-dħul u l-ħruġ tagħha.

L-awtoritajiet kompetenti għandhom jivvalutaw ukoll jekk l-istituzzjoni tiħux approċċ konservattiv għall-istabbiliment ta’ suppożizzjonijiet ta’ ttestjar tal-istress. Skont it-tip u s-severità tax-xenarju, l-awtoritajiet kompetenti għandhom jikkunsidraw, skont kif ikun rilevanti, l-adegwatezza ta’ għadd ta’ suppożizzjonijiet, b’mod partikolari:

• a. il-waqfien naturali tal-finanzjament fil-livell tal-konsumatur;
• b. it-tnaqqis tal-finanzjament bl-ingrossa garantit u mhux garantit;
• c. il-korrelazzjoni bejn is-swieq ta’ finanzjament u d-diversifikazzjoni fi swieq differenti;
• d. skoperturi kontinġenti addizzjonali li ma jidhrux fuq il-karta bilanċjali;
• e. tenuri ta’ finanzjament (eż. fejn il-fornitur ta’ finanzjament ikollu għażliet ta’ sejħa);
• f. l-impatt ta’ kwalunkwe deterjorament tal-klassifikazzjoni tal-kreditu tal-istituzzjoni;
• g. konvertibbiltà tal-FX u aċċess għal swieq ta’ muniti barranin u kontijiet bankarji korrispondenti;
• h. il-kapaċità li tiġi ttrasferita l-likwidità bejn entitajiet, setturi u pajjiżi;
• i. l-istimi ta’ tkabbir futur tal-karta bilanċjali;
• j. minħabba r-riskji reputazzjonali, rekwiżit impliċitu li l-istituzzjoni tirriporta l-assi u testendi jew tmantni forom oħra ta’ appoġġ ta’ likwidità.

L-awtoritajiet kompetenti għandhom jivvalutaw jekk il-qafas tal-ġestjoni tal-ittestjar tal-istress speċifiku għal-likwidità tal-istituzzjoni huwiex xieraq u jekk huwiex integrat sew fl-istrateġija globali tal-ġestjoni tar-riskju. Huma għandhom iqisu:

• a. jekk id-daqs u l-frekwenza tat-testijiet tal-istress humiex xierqa għan-natura u l-kumplessità tal-istituzzjoni, l-iskoperturi tar-riskju ta’ likwidità tagħha u l-importanza relattiva tagħha fis-sistema finanzjarja;
• b. jekk l-eżiti tal-ittestjar tal-istress humiex integrati fil-proċess ta’ ppjanar strateġiku tal-istituzzjoni għal-likwidità u l-finanzjament u jekk humiex użati sabiex tiżdied l-effettività tal-ġestjoni tal-likwidità f’każ ta’ kriżi, inkluż fil-pjan ta’ kontinġenza u rkupru tal-likwidità tal-istituzzjoni;
• c. jekk l-istituzzjoni għandhiex proċess adegwat għall-identifikazzjoni ta’ fatturi tar-riskju adattati għat-twettiq ta’ testijiet tal-istress, b’kunsiderazzjoni tal-vulnerabbiltajiet materjali kollha li jistgħu jimminaw il-pożizzjoni tal-likwidità tal-istituzzjoni partikolari;
• d. jekk is-suppożizzjonijiet u x-xenarji humiex riveduti u aġġornati b’mod frekwenti biżżejjed;
• e. meta l-ġestjoni tal-likwidità ta’ grupp tkun qiegħda tiġi vvalutata, jekk l-istituzzjoni tagħtix attenzjoni adegwata lil kwalunkwe ostaklu potenzjali għat-trasferiment tal-likwidità fi ħdan il-grupp.

Qafas ta’ kontroll intern tar-riskju ta’ likwidità u ta’ finanzjament

L-awtoritajiet kompetenti għandhom jivvalutaw jekk l-istituzzjoni għandhiex qafas intern ta’ limiti u kontrolli b’saħħtu u komprensiv, u salvagwardji sodi biex timmitiga r-riskji ta’ likwidità u ta’ finanzjament tagħha f’konformità mal-aptit tagħha għar-riskju u biex tiżgura d-disponibbiltà ta’ struttura ta’ finanzjament diversifikata. Għandhom jieħdu inkunsiderazzjoni jekk il-qafas tal-limiti u tal-kontrolli huwiex adegwat għall-kumplessità, id-daqs u l-mudell tan-negozju tal-istituzzjoni u jirriflettix il-motivaturi materjali differenti tar-riskju ta’ likwidità u l-eżiti tat-testijiet tal-istress fuq il-likwidità.

L-awtoritajiet kompetenti għandhom jikkunsidraw jekk l-istituzzjoni għandhiex limiti biex tiżgura konsistenza bejn id-denominazzjoni tal-munita tal-assi likwidi tagħha u d-distribuzzjoni skont il-munita tal-ħruġ nett tal-likwidità tagħha f’konformità mal-Artikolu 8(6) tar-Regolament Delegat tal-Kummissjoni (UE) 2015/61.

L-awtoritajiet kompetenti għandhom jivvalutaw jekk il-limiti humiex approvati u jiġux riveduti b’mod regolari mill-korpi kompetenti tal-istituzzjoni u jiġux ikkomunikati lil kull linja operatorja rilevanti. Dan il-proċess, flimkien ma’ kif l-istituzzjoni timmonitorja l-konformità mal-limiti u l-proċess ta’ eskalazzjoni għall-ksur, għandhom jiġu ddokumentati b’mod ċar fil-proċeduri tagħha.

L-awtoritajiet kompetenti għandhom jivvalutaw jekk l-istituzzjoni tkunx implimentat sistema adegwata ta’ pprezzar ta’ trasferiment bħala parti mill-qafas ta’ kontroll tar-riskju ta’ likwidità, li jinkorpora l-kostijiet, il-benefiċċji u r-riskji ta’ likwidità rilevanti kollha. L-awtoritajiet kompetenti għandhom iqisu jekk il-mekkaniżmu tal-ipprezzar ta’ trasferiment jippermettix lill-maniġment jagħti inċentivi xierqa għall-ġestjoni tar-riskju ta’ likwidità, u jekk is-sistema u l-kalibrazzjoni tagħha humiex riveduti u aġġornati kif xieraq minħabba d-daqs u l-kumplessità tal-istituzzjoni. Barra minn hekk, l-awtoritajiet kompetenti għandhom jivvalutaw jekk il-politika tal-istituzzjoni dwar l-inkorporazzjoni tal-metodoloġija tal-ipprezzar tat-trasferiment tal-fondi (FTP) fil-qafas tal-ipprezzar intern hijiex użata għall-valutazzjoni u d-deċiżjoni dwar tranżazzjonijiet mal-klijenti (dan jinkludi ż-żewġ naħat tal-karta bilanċjali, eż. l-għoti ta’ self u t-teħid ta’ depożiti).

L-awtoritajiet kompetenti għandhom jivvalutaw jekk l-istituzzjoni għandhiex kontrolli adegwati fir-rigward tal-bafer ta’ assi likwidi, inklużi limiti ta’ konċentrazzjoni u monitoraġġ kontinwu xieraq tal-adegwatezza tal-bafer u għal bidliet fil-kundizzjonijiet tas-suq li jistgħu jaffettwaw il-kapaċità tal-istituzzjoni li tillikwida l-assi tagħha malajr.

Pjanijiet ta’ kontinġenza tal-likwidità

L-awtoritajiet kompetenti għandhom jivvalutaw jekk il-pjan ta’ kontinġenza tal-likwidità tal-istituzzjoni (LCP) jispeċifikax b’mod adegwat il-politiki, il-proċeduri u l-pjanijiet ta’ azzjoni għar-rispons għal tfixkil potenzjali sever fil-kapaċità tal-istituzzjoni biex tissodisfa l-ħtiġijiet ta’ likwidità tagħha u tiffinanzja lilha nnifisha. Huma għandhom jikkunsidraw il-kontenut u l-kamp ta’ applikazzjoni tal-miżuri ta’ finanzjament ta’ kontinġenza inklużi fl-LCP, u b’mod partikolari fatturi bħal:

• a. jekk l-LCP jispjegax b’mod adegwat arranġamenti ta’ governanza għall-attivazzjoni u ż-żamma tiegħu;
• b. jekk l-LCP jirriflettix b’mod xieraq il-profil tar-riskju speċifiku għal-likwidità u għall-finanzjament, u dak usa’, tal-istituzzjoni;
• c. jekk l-istituzzjoni għandhiex qafas ta’ indikaturi ta’ twissija bikrija dwar il-likwidità, li jinkludu fost l-oħrajn dawk stabbiliti bħala indikaturi tal-likwidità fil-Linji Gwida tal-EBA dwar l-indikaturi tal-pjan ta’ rkupru li x’aktarx ikunu effettivi billi jippermettu lill-istituzzjoni tidentifika ċirkostanzi tas-suq li qegħdin jiddeterjoraw b’mod f’waqtu u tiddetermina malajr liema azzjonijiet għandhom jittieħdu;
• d. jekk l-LCP jiddeskrivix b’mod ċar li l-bafer ta’ likwidità tal-LCR huwiex imfassal biex jintuża f’każ ta’ stress, anki jekk dan iwassal għal valuri tal-LCR taħt il-100%, inkluż li huwa parti mill-ġestjoni mistennija tar-riskju ta’ likwidità taħt stress li jseħħu komunikazzjonijiet sussegwenti lill-maniġment superjuri jekk jintlaħqu valuri tal-LCR aktar baxxi stabbiliti. L-LCP għandu jirrifletti u jiddeskrivi b’mod ċar kif ir-riskju tal-likwidità għandu jiġi mmaniġġjat taħt stress biex jimxi viċin kemm jista’ jkun lejn il-livelli mmirati tal-LCR;
• e. jekk l-LCP jartikolax b’mod ċar is-sorsi ta’ finanzjament materjali (potenzjali) kollha, inklużi l-ammonti stmati disponibbli għas-sorsi differenti tal-likwidità u l-ħin stmat meħtieġ biex jinkisbu fondi minnhom;
• f. jekk il-miżuri humiex konformi mal-istrateġija tar-riskju globali u l-aptit għar-riskju tal-likwidità tal-istituzzjoni;
• g. l-adegwatezza tas-suppożizzjonijiet rigward ir-rwol tal-finanzjament tal-bank ċentrali f’LCP tal-istituzzjoni. Eżempji ta’ fatturi li l-awtoritajiet kompetenti jistgħu jikkunsidraw jistgħu jinkludu l-opinjonijiet tal-istituzzjoni dwar:

I. id-disponibbiltà kurrenti u futura ta’ sorsi potenzjali ta’ finanzjament alternattiv marbutin ma’ programmi ta’ self tal-bank ċentrali; II. it-tipi ta’ faċilitajiet ta’ self, il-kollateral aċċettabbli u l-proċeduri operazzjonali għall-aċċess għall-fondi tal-bank ċentrali; III. iċ-ċirkostanzi li fihom ikun meħtieġ finanzjament mill-bank ċentrali, l-ammont meħtieġ u l-perjodu li għalih probabbilment ikun meħtieġ tali użu ta’ finanzjament mill-bank ċentrali.

L-awtoritajiet kompetenti għandhom jivvalutaw jekk l-azzjonijiet deskritti fl-LCP humiex fattibbli b’rabta max-xenarji ta’ stress li fihom huma intiżi sabiex jittieħdu. Huma għandhom iqisu fatturi bħal:

• a. il-livell ta’ konsistenza u interazzjoni bejn it-testijiet tal-istress relatati mal-likwidità tal-istituzzjoni, l-LCP tagħha, l-indikaturi ta’ twissija bikrija tal-likwidità tagħha u, fejn applikabbli, il-pjan ta’ rkupru relatat mal-likwidità tagħha;
• b. jekk l-azzjonijiet iddefiniti fl-LCP jidhrux probabbli li jippermettu lill-istituzzjoni tirreaġixxi b’mod adegwat għal firxa ta’ xenarji possibbli ta’ stress sever fuq il-likwidità, inkluż stress speċifiku għall-istituzzjoni u stress fuq is-suq kollu, kif ukoll l-interazzjoni potenzjali bejniethom; u jekk l-azzjonijiet iddefiniti fl-LCP humiex kwantifikati b’mod prudenti f’termini ta’ kapaċità ta’ ġenerazzjoni ta’ likwidità taħt kundizzjonijiet ta’ stress u ż-żmien meħtieġ biex jiġu eżegwiti, filwaqt li jittieħdu inkunsiderazzjoni rekwiżiti operazzjonali bħall-għoti b’rahan ta’ kollateral ma’ bank ċentrali.

L-awtoritajiet kompetenti għandhom jivvalutaw l-adegwatezza tal-qafas ta’ governanza tal-istituzzjoni fir-rigward tal-LCP tagħha. Huma għandhom iqisu fatturi bħal:

• a. -l-adegwatezza tal-proċeduri ta’ eskalazzjoni u prijoritizzazzjoni li jipprovdu dettalji dwar meta u kif kull waħda mill-azzjonijiet tista’ u għandha tiġi attivata;
• b. jekk l-istituzzjoni għandhiex politiki u proċeduri adegwati fir-rigward tal-komunikazzjoni fi ħdan l-istituzzjoni u mal-partijiet esterni;
• c. il-grad ta’ konsistenza bejn l-LCP⁴⁷ u l-pjanijiet għall-kontinwità tal-operat tal-istituzzjoni.

Pjanijiet ta’ finanzjament

⁴⁷ F’każ li l-LCP ikun integrat b’mod sħiħ fil-pjan ta’ rkupru, dan se jiġi inkorporat fil-punteġġ tal-likwidità tal-ORC. F’każ li l-LCP ma jkunx inkorporat fil-pjan ta’ rkupru u ż-żewġ dokumenti jkunu separati, l-LCP għandu jiġi analizzat separatament.

L-awtoritajiet kompetenti għandhom jivvalutaw jekk il-pjan ta’ finanzjament ikunx fattibbli u xieraq fir-rigward tan-natura, l-iskala u l-kumplessità tal-istituzzjoni, l-attivitajiet kurrenti u pproġettati tagħha u l-profil tagħha tal-likwidità u l-finanzjament. Huma għandhom iqisu fatturi bħal:

• a. jekk il-pjan ta’ finanzjament jindirizzax xenarji alternattivi. L-awtoritajiet kompetenti għandhom jagħtu attenzjoni partikolari lir-robustezza tal-pjan għall-appoġġ tal-attivitajiet kummerċjali proġettati f’xenarji negattivi;
• b. il-bidla mistennija fil-profil ta’ finanzjament tal-istituzzjoni li tirriżulta mill-eżekuzzjoni tal-pjan ta’ finanzjament u jekk din hijiex xierqa fid-dawl tal-attivitajiet u l-mudell tan-negozju tal-istituzzjoni;
• c. jekk il-pjan ta’ finanzjament jappoġġax kwalunkwe titjib meħtieġ jew mixtieq fil-profil ta’ finanzjament tal-istituzzjoni;
• d. il-fehma tagħhom stess dwar l-attività tas-suq (jew il-bidliet fiha) ippjanata mill-istituzzjonijiet fil-ġuriżdizzjoni tagħhom fuq livell aggregat, u dak xi jfisser għall-fattibbiltà ta’ pjanijiet individwali ta’ finanzjament; u
• e. jekk il-pjan ta’ finanzjament huwiex:

I. integrat mal-pjan strateġiku globali tal-istituzzjoni;

II. konsistenti mal-mudell tan-negozju tagħha;

III. konsistenti mal-aptit għar-riskju tal-likwidità tagħha;

Barra minn hekk, l-awtoritajiet kompetenti jistgħu jikkunsidraw:

• a. jekk l-istituzzjoni tanalizzax b’mod adegwat u hijiex konxja tal-adegwatezza tal-pjan ta’ finanzjament fid-dawl tal-pożizzjonijiet kurrenti ta’ likwidità u ta’ finanzjament tal-istituzzjoni u l-iżvilupp ipproġettat tagħhom. Bħala parti minn dan, l-awtoritajiet kompetenti jistgħu jikkunsidraw jekk il-maniġment superjuri tal-istituzzjoni jistax jispjega għaliex il-pjan ta’ finanzjament huwa fattibbli u fejn jinsabu d-dgħufijiet tiegħu;
• b. il-politika tal-istituzzjoni għad-determinazzjoni ta’ liema dimensjonijiet ta’ finanzjament u liema swieq huma sinifikanti għall-istituzzjoni (u jekk hijiex adegwata);
• c. il-perjodu ta’ żmien previst mill-istituzzjoni għall-migrazzjoni lejn profil ta’ finanzjament differenti, jekk meħtieġ jew mixtieq, meta wieħed iżomm f’moħħu li jista’ jkun hemm riskji involuti jekk il-migrazzjoni lejn l-istat aħħari tkun wisq mgħaġġla jew bil-mod wisq; u
• d. jekk il-pjan ta’ finanzjament ikollux strateġiji differenti u proċeduri ta’ ġestjoni ċari għall-implimentazzjoni f’waqtha tal-bidliet fl-istrateġija.

L-awtoritajiet kompetenti għandhom jivvalutaw jekk il-pjan ta’ finanzjament tal-istituzzjoni huwiex implimentat b’mod xieraq. Bħala minimu, huma għandhom iqisu:

• a. jekk il-pjan ta’ finanzjament huwiex dokumentat u kkomunikat lill-persunal rilevanti kollu;
• b. jekk il-pjan ta’ finanzjament huwiex inkorporat fl-operazzjonijiet ta’ kuljum tal-istituzzjoni, speċjalment fil-proċess tat-teħid ta’ deċiżjonijiet relatati mal-finanzjament.

Barra minn hekk, l-awtoritajiet kompetenti jistgħu jikkunsidraw jekk l-istituzzjoni hijiex kapaċi tirrikonċilja l-pjan ta’ finanzjament mad-data pprovduta lill-awtoritajiet kompetenti fil-mudell tal-pjan ta’ finanzjament.

L-awtoritajiet kompetenti għandhom jikkunsidraw il-kwalità tal-proċessi tal-istituzzjoni għall-monitoraġġ tal-eżekuzzjoni tal-pjan ta’ finanzjament u l-kapaċità tagħha li tirreaġixxi għal devjazzjonijiet b’mod f’waqtu. Għal din il-valutazzjoni, l-awtoritajiet kompetenti għandhom jieħdu inkunsiderazzjoni fatturi bħal:

• a. il-kwalità tal-aġġornamenti għall-maniġment (superjuri) rigward l-istatus kurrenti tal-eżekuzzjoni tal-pjan ta’ finanzjament;
• b. jekk il-pjan ta’ finanzjament jipprevedix miżuri alternattivi ta’ riżerva biex jiġu implimentati jekk ikun hemm bidliet fil-kundizzjonijiet tas-suq; u
• c. il-politika u l-prattika tal-istituzzjoni rigward ir-reviżjoni regolari, l-ittestjar retrospettiv u l-aġġornament tal-pjan ta’ finanzjament meta l-finanzjament attwali miżjud b’mod sinifikanti jkun differenti mill-pjan ta’ finanzjament.