4. Linji Gwida dwar il-politiki u l-prattiki ta’ remunerazzjoni

1.1. L-istituzzjonijiet għandhom ifasslu u jimplimentaw politiki u prattiki ta’ remunerazzjoni li jqisu d-drittijiet u l-interessi tal-konsumaturi. B’mod partikolari, l-istituzzjonijiet għandhom jiżguraw li forom fi flus u/jew mhux fi flus ta’ remunerazzjoni ma jintroduċux inċentivi li bihom il-persuni rilevanti jiffavorixxu l-interessi tagħhom stess, jew l-interessi tal-istituzzjoni għad-detriment tal-konsumaturi.

1.2. Meta jfasslu l-politiki u l-prattiki tar-remunerazzjoni, l-istituzzjonijiet għandhom jikkunsidraw jekk dawn il-politiki u l-prattiki jintroduċux kwalunkwe riskju ta’ detriment għall-konsumaturi u għandhom inaqqsu tali riskji milli jirriżultaw.

1.3. Il-funzjoni tar-riżorsi umani tal-istituzzjonijiet għandha tipparteċipa u tinforma t-tfassil tal-politiki u l-prattiki ta’ remunerazzjoni. Barra minn hekk, fejn huma stabbiliti l-funzjonijiet tal-immaniġġjar tar-riskju u ta’ konformità, dawn għandhom jipprovdu kontribut effettiv għat-tfassil tal-politiki u l-prattiki ta' remunerazzjoni.

1.4. Għall-finijiet ta’ evalwazzjoni tal-prestazzjoni ta' persuna rilevanti, l-istituzzjonijiet għandhom jiddefinixxu fil-politika u l-prattiki ta’ remunerazzjoni, il-kriterji xierqa li għandhom jintużaw biex tiġi vvalutata l-prestazzjoni, filwaqt li jitqiesu d-drittijiet u l-interessi tal-konsumaturi.

1.5. Meta jfasslu l-politiki u l-prattiki tar-remunerazzjoni, l-istituzzjonijiet għandhom jikkunsidraw kemm il-kriterji kwalitattivi kif ukoll dawk kwantitattivi għad-determinazzjoni tal-livell ta’ remunerazzjoni varjabbli biex jiżguraw li d-drittijiet u l-interessi tal-konsumaturi huma kkunsidrati b'mod xieraq.

1.6. L-istituzzjonijiet ma għandhomx ifasslu politiki u prattiki ta’ remunerazzjoni li:

• a. jorbtu unikament ir-remunerazzjoni ma’ mira kwantitattiva għall-offerta jew il-provvista ta’ prodotti u servizzi bankarji; jew
• b. jippromwovu l-offerta jew il-provvista ta’ prodott speċifiku jew kategorija ta' prodotti fuq prodotti oħra, bħall-prodotti li huma aktar profittabbli għall-istituzzjonijiet jew għal persuna rilevanti, għad-detriment tal-konsumatur.

1.7. Fejn il-politiki u l-prattiki ta’ remunerazzjoni jippermettu remunerazzjoni varjabbli, l-istituzzjonijiet għandhom jiżguraw li l-proporzjon bejn il-komponenti fissi u varjabbli tar-remunerazzjoni huwa bbilanċjat b'mod xieraq u jqis id-drittijiet u l-interessi tal-konsumaturi. Barra minn hekk, il-politiki u l-prattiki ta’ remunerazzjoni li huma fis-seħħ, għandhom jippermettu l-operat ta' politika flessibbli dwar ir-remunerazzjoni varjabbli, inkluż il-possibbiltà li ma titħallas l-ebda remunerazzjoni varjabbli fejn ikun xieraq.

1.8. L-istituzzjonijiet għandhom jevitaw politiki u prattiki kumplessi bla bżonn u kombinazzjonijiet mhux ċari ta’ politiki u prattiki differenti.

2.1. L-istituzzjonijiet għandhom jiddokumentaw politiki u prattiki ta’ remunerazzjoni u jżommuhom għal skopijiet ta' verifika għal mill-inqas ħames snin mill-aħħar data li applikaw u jagħmluhom disponibbli għall-awtoritajiet kompetenti fuq talba. Din id-dokumentazzjoni għandha tinkludi, iżda mhijiex limitata għal:

• a) l-objettivi tal-politiki u l-prattiki tar-remunerazzjoni tal-istituzzjonijiet;
• b) il-persuni rilevanti li jaqgħu taħt il-kamp ta’ applikazzjoni ta’ dawn il-politiki u l-prattiki;
• c) kif il-politiki ta’ remunerazzjoni ġew implimentati fil-prattika, inkluż b’mod partikolari l-kriterji għall-remunerazzjoni varjabbli fejn tingħata r-remunerazzjoni varjabbli.

2.2. Qabel ma jitħallew joffru prodotti jew servizzi bankarji lill-konsumaturi, il-persuni rilevanti għandhom ikunu infurmati b’mod ċar, b'mod sempliċi u trasparenti dwar il-politiki u l-prattiki ta’ remunerazzjoni li huma applikabbli għalihom.

2.3. Il-politiki u l-prattiki ta’ remunerazzjoni għandhom ikunu aċċessibbli b'mod faċli għall-persuni rilevanti kollha tal-istituzzjoni.

3.1. Il-korp maniġerjali japprova u jżomm ir-responsabbiltà aħħarija għall-politiki u l-prattiki ta' remunerazzjoni tal-istituzzjoni.

3.2. Il-korp maniġerjali għandu jfittex parir mill-kumitat tar-remunerazzjoni fejn stabbilit dwar il-politiki u l-prattiki tar-remunerazzjoni tal-istituzzjoni fir-rigward tal-issodisfar ta' dawn il-Linji Gwida. 3.3. Fejn stabbilita, il-funzjoni ta’ konformità għandha tikkonferma li l-politiki u l-prattiki ta’ remunerazzjoni huma konformi ma’ dawn il-Linji Gwida.

3.4. Il-bidliet għall-politiki u l-prattiki ta’ remunerazzjoni għandhom isiru biss bl-approvazzjoni tal-korp maniġerjali.

4.1 L-istituzzjonijiet għandhom jirrevedu, mill-inqas darba f'sena, il-politiki u l-prattiki ta’ remunerazzjoni tagħhom biex jiżguraw konformità ma’ dawn il-Linji Gwida. B’mod partikolari, fejn istituzzjoni tidentifika li riskju residwu ta’ detriment tal-konsumaturi jista’ jinqala’ bħala riżultat tat-tfassil tal-politiki u l-prattiki ta’ remunerazzjoni kif imsemmija fil-paragrafu 1.2 ta’ dawn il-Linji Gwida, l-istituzzjoni għandha tevalwa skont ir-reviżjoni jekk xi wieħed minn dawn ir-riskji residwi huwiex jikkristalizza u jikkawża detriment għall-konsumaturi.

4.2 Fejn ir-reviżjoni tiżvela li l-politiki u l-prattiki tar-remunerazzjoni ta’ istituzzjoni ma jaħdmux kif maħsub jew stipulat, l-istituzzjoni għandha temenda l-politiki u l-prattiki tar-remunerazzjoni tagħha skont dawn il-Linji Gwida.

4.3 L-istituzzjonijiet għandhom jistabbilixxu kontrolli effettivi biex jivverifikaw li l-politiki u l-prattiki ta’ remunerazzjoni tagħhom qegħdin jiġu osservati u biex jidentifikaw u jindirizzaw inċidenti ta’ nuqqas ta’ konformità ma’ dawn il-Linji Gwida.