4. Kunsiderazzjonijiet ġenerali għall-ġbir tal-informazzjoni li għandha x'taqsam mal-ICAAP u l-ILAAP

L-awtoritajiet kompetenti għandhom jiġbru l-informazzjoni mill-istituzzjonijiet dwar l-ICAAP u l-ILAAP speċifikati f'dawn il-Linji gwida, sabiex iwettqu l-valutazzjonijiet superviżorji li ġejjin, kif speċifikat fil-Linji gwida tas-SREP:

• a. valutazzjoni tas-solidità, l-effettività, u l-komprensività tal-oqfsa tal-ICAAP u l-ILAAP, f'konformità mat-Taqsima 5.6.2 tal-Linji gwida tas-SREP;
• b. valutazzjoni tal-granularità, kredibilità, leġibilità u l-komparabbiltà tal-kalkoli tal-ICAAP, kif speċifikat fit-Taqsima 7.2.1 tal-Linji gwida tas-SREP; u
• c. bħala sors ta' informazzjoni addizzjonali għall-valutazzjoni ta' elementi oħra tas-SREP, inkluż l-analiżi tal-mudelli tan-negozju, f'konformità mat-Taqsima 4 tal-Linji gwida tas-SREP, il-valutazzjoni tal-kontrolli tal-governanza interna u l-istituzzjoni kollha, f'konformità mat-Taqsima 5 tal-Linji gwida tas-SREP u l-valutazzjoni tar-riskji tal-likwidità u l-iffinanzjar u l-adegwatezza tal-likwidità, f'konformità mat-Taqsima 8 tal-Linji gwida tas-SREP.

L-awtoritajiet kompetenti għandhom jiżguraw li l-informazzjoni miġbura mill-istituzzjonijiet għandha tinkludi dan li ġej:

• a. "il-manwal tal-qarrej" ippreparat f'konformità mal-paragrafu 11;
• b. informazzjoni ġenerali dwar l-oqfsa, l-istrateġija u l-mudelli tan-negozju tal-ICAAP u l-ILAAP, kif ukoll it-tmexxija kif speċifikata fit-Taqsima 5 ta' dawn il-Linji gwida;
• c. Informazzjoni speċifika għall-ICAAP, kif speċifikat fit-Taqsima 6 ta' dawn il-Linji gwida;
• d. Informazzjoni speċifika għall-ILAAP, kif speċifikat fit-Taqsima 7 ta' dawn il-Linji gwida;
• e. sommarju tal-konklużjonijiet prinċipali tal-ICAAP u l-ILAAP u l-informazzjoni tal-assigurazzjoni tal-kwalità, kif speċifikat fit-Taqsima 8 ta' dawn il-Linji gwida.

L-awtoritajiet kompetenti għandhom jiżguraw li l-istituzzjoni tipprovdihom "bil-manwal tal-qarrej" li jiġi ppreparat bħala dokument komprensiv li jiffaċilita l-valutazzjoni tad-dokumenti tal-ICAAP u l-ILAAP. Għal dan il-għan, "il-manwal tal-qarrej" għandu jipprovdi ħarsa ġenerali għad-dokumenti kollha relatati mal-ICAAP u l-ILAAP mibgħuta lill-awtoritajiet kompetenti u l-istatus tagħhom (ġdid, mhux mibdul, mibdul b'bidliet żgħar, eċċ.). "Il-manwal tal-qarrej" essenzjalment għandu jaħdem bħala indiċi billi jgħaqqad l-oġġetti tal-informazzjoni speċifika msemmija f'dawn il-Linji gwida, mad-dokumenti pprovduti mill-istituzzjoni tal-awtorità kompetenti (speċjalment fil-każ fejn il-format tas-sottomissjoni tal-informazzjoni jippermetti lill-istituzzjonijiet jissottomettu dokumenti interni multipli, kif speċifikat fil-paragrafu 12(d)). "Il-manwal tal-qarrej" għandu jipprovdi wkoll informazzjoni dwar il-bidliet materjali fl-oġġetti tal-informazzjoni, meta mqabbla mas-sottomissjoni preċedenti tal-informazzjoni u kwalunkwe esklużjoni mis-sottomissjoni (ara wkoll il-paragrafi 21-22), kif ukoll kwalunkwe informazzjoni oħra li tista' tkun rilevanti għall-awtorità kompetenti għall-valutazzjoni. Barra minn hekk, "il-manwal tal-qarrej" għandu jinkludi referenzi għall-informazzjoni kollha tal-ICAAP u l-ILAAP żvelata pubblikament mill-istituzzjoni (inkluż l-informazzjoni żvelata f'konformità mal-Artikolu 438(a) tar-Regolament (UE) Nru 575/2013³ ).

³ ĠU L 176/1

Rigward il-ġbir tal-informazzjoni speċifikata f'dawn il-Linji gwida, l-awtoritajiet kompetenti għandhom jistabbilixxu l-proċeduri tat-tħaddim u javżaw lill-istituzzjonijiet soġġetti għad-dispożizzjoni tal-informazzjoni tal-ICAAP u l-ILAAP dwar dan li ġej:

• a. id-dati sa meta l-informazzjoni għandha tiġi pprovduta mill-istituzzjonijiet lill-awtoritajiet kompetenti (dati ta' rimessa). Meta jistabbilixxu d-dati ta' ħlas għall-ewwel darba jew meta materjalment ibiddlu dawn id-dati, l-awtoritajiet kompetenti għandhom jippermettu lill-istituzzjonijiet żmien biżżejjed biex jippreparaw is-sottomissjonijiet tagħhom;
• b. id-data ta' referenza u jispeċifikaw jekk jistgħux jintużaw dati ta' referenza differenti għall-oġġetti ta' informazzjoni individwali;
• c. il-frekwenza li biha għandha tingħata l-informazzjoni;
• d. il-format u l-mezz tekniku għas-sottomissjoni tal-informazzjoni u b'mod partikolari jekk l-informazzjoni għandiex tiġi pprovduta bħala dokument wieħed (rapport) jew fi kwalunkwe forma oħra (eż. dokumenti multipli), jew jekk l-istituzzjonijiet jistgħux jissottomettu d-dokumenti interni tagħhom.

Il-proċeduri operattivi speċifikati fil-paragrafu preċedenti għandhom ikunu proporzjonali għall-kategorija li għaliha istituzzjoni tiġi assenjata, skont it-Taqsima 2.4 tal-Linji gwida tas-SREP, kif speċifikat iktar fil-paragrafi li ġejjin.

L-awtoritajiet kompetenti għandhom jeħtieġu istituzzjoni, li taqa' taħt il-Kategorija 1 tas-SREP biex tipprovdihom għallinqas bl-oġġetti tal-informazzjoni kollha msemmija f'dawn il-Linji gwida fuq bażi annwali. L-awtoritajiet kompetenti għandhom jippruvaw jistabbilixxu data ta' pagament waħda u data ta' referenza unika għall-istituzzjonijiet tal-Kategorija 1 tas-SREP kollha, madankollu, jiddependi fuq l-organizzazzjoni tal-proċessi tas-SREP, jistgħu jiġu stabbiliti dati speċifiċi għall-istituzzjoni, fejn dan ikun iktar adegwat.

Għall-istituzzjonijiet li mhumiex tal-Kategorija 1 imsemmija fit-Taqsima 2.4 tal-Linji gwida tas-SREP, l-awtoritajiet kompetenti jistgħu:

• a. jiddeterminaw frekwenza oħra tas-sottomissjoni tal-informazzjoni milli annwalment, u jistabbilixxu dati ta' rimessa u ta' referenza u għal diversi oġġetti tal-informazzjoni, dejjem f'konformità mal-mudell ta' impenn superviżorju minimu applikat għal kull waħda mill-istituzzjonijiet, skont it-Taqsima 2.4 tal-Linji gwida tas-SREP u l-programm ta' eżaminazzjoni superviżorju pertinenti għall-istituzzjoni msemmija fl-Artikolu 99 tad-Direttiva 2013/36/UE;
• b. jiddeterminaw livelli differenti ta' dettall jew jirrinunzjaw ċerti oġġetti ta' informazzjoni speċifiċi msemmija f'dawn il-Linji gwida. Meta jirrinunzjaw oġġetti ta' informazzjoni, l-awtoritajiet kompetenti għandhom jiżguraw li jkunu kisbu informazzjoni biżżejjed biex jivvalutaw l-oqfsa tal-ICAAP u l-ILAAP u l-affidabbiltà tal-istimi tal-likwidità u l-kapital tal-ICAAP u l-ILAAP, f'konformità mal Linji gwida tas-SREP tal-EBA.

Skont il-kwalità tal-informazzjoni pprovduta u l-valutazzjoni ta' jekk id-dokument/i sottomessi jkoprux l-oqsma kollha speċifikati f'dawn il-Linji gwida, l-awtoritajiet kompetenti jistgħu jitolbu lill-istituzzjonijiet biex jipprovdu informazzjoni addizzjonali meħtieġa għall-valutazzjoni tal-ICAAP u l-ILAAP fis-SREP. L-awtoritajiet kompetenti għandhom jiddeterminaw il-livell adegwat ta' granularità u kwantità ta' informazzjoni li għandha tiġi pprovduta għall-iskopijiet tal-valutazzjoni tal-ICAAP u l-ILAAP, permezz ta' djalogu superviżorju kontinwu ma' istituzzjoni fis-SREP.

L-awtoritajiet kompetenti għandhom jiżguraw li jirċievu l-informazzjoni rilevanti kollha u li din l-informazzjoni tibqa' valida u applikabbli fid-data tal-pagament, anke f'każijiet fejn id-data (tal-produzzjoni) tad-dokument tkun differenti mid-data ta' referenza pertinenti. Id-dokumenti relatati ma' kwalunkwe oġġett ta' informazzjoni speċifikat f'dawn il-Linji gwida prodotti bejn id-data ta' referenza u d-data ta' pagament għandhom jiġu inklużi meta jkun rilevanti għall-iskopijiet ta' valutazzjoni tal-ICAAP u l-ILAAP (billi jqisu l-materjalità kif speċifikata f'dawn il-Linji gwida).

L-awtoritajiet kompetenti, bil-ħsieb li jiffaċilitaw il-valutazzjoni tal-elementi tas-SREP individwali wara l-programm ta' eżaminazzjoni superviżorju u l-mudell ta' impenn applikat, jistgħu jitolbu mill-istituzzjonijiet xi informazzjoni speċifika msemmija f'dawn il-Linji gwida jew informazzjoni addizzjonali barra miċ-ċiklu ta' sottomissjoni regolari tal-ICAAP u l-ILAAP stabbilit f'konformità mal-paragrafi 14 u 15 (eż. xi informazzjoni speċifika għall-ILAAP tista' tintalab għall-valutazzjoni tal-likwidità u r-riskji tal-iffinanzjar tas-SREP u mhux bilfors għall-valutazzjoni tal-ILAAP innifisha).

Fejn dawn il-Linji gwida jiġu applikati fir-rigward ta' gruppi bankarji transkonfinali u l-entitajiet tagħhom u l-kulleġġ tas-superviżuri jkun ġie stabbilit, l-awtoritajiet kompetenti involuti, fil-kuntest tal-kooperazzjoni tagħhom għall-valutazzjoni tas-SREP, f'konformità mat-Taqsima 11.1 tal-Linji gwida tas-SREP, għandhom jikkoordinaw sal-limitu massimu possibbli d-dati, il-mezzi u l-format imsemmija fil-paragrafu 12, kif ukoll il-kamp ta' applikazzjoni eżatt u ddettaljat ta' kull oġġett ta' informazzjoni b'mod konsistenti għall-entitajiet tal-gruppi kollha.

Fejn l-informazzjoni msemmija f'dawn il-Linji gwida tintalab mill-istituzzjonijiet fil-forma tad-dokumenti interni stess tal-istituzzjonijiet li ma jsegwux l-istruttura jew il-format stabbilit f'dawn il-Linji gwida, l-awtoritajiet kompetenti għandhom jagħmlu ħilithom biex jiżguraw il-komparabbiltà u l-konsistenza strutturali, inkluż billi jitolbu lill-istituzzjonijiet biex jispjegaw permezz "tal-manwal tal-qarrej" kif u meta l-oġġetti tal-informazzjoni kollha speċifikati f'dawn il-Linji gwida huma koperti fid-dokumentazzjoni pprovduta.

Għall-iskopijiet tal-valutazzjoni tal-oqfsa tal-ICAAP u l-ILAAP u l-kalkoli skont is-SREP, l-awtoritajiet kompetenti għandhom jiżguraw li huma rċevew l-oġġetti tal-informazzjoni rilevanti kollha kif speċifikat f'dawn il-Linji gwida, billi jqisu l-proporzjonalità. Fejn l-oġġetti ta' informazzjoni jkunu diġà disponibbli għall-awtoritajiet kompetenti bħala parti minn attivitajiet oħra, l-awtoritajiet kompetenti għandhom jeħtieġu lill-istituzzjonijiet biex jikkonfermaw "fil-manwal tal-qarrej" li din l-informazzjoni tibqa' aġġornata u li ma kien hemm l-ebda tibdil fid-dokumenti pertinenti jew biex tiġi pprvduta informazzjoni aġġornata dwar il-bidliet li saru fid-dokumenti wara l-aħħar sottomissjoni. Fuq il-bażi ta' dawn il-kunsiderazzjonijiet, l-awtoritajiet kompetenti jistgħu jiddeċiedu li jħallu barra oġġetti tal-informazzjoni li jippossjedu minn attivitajiet superviżorji oħrajn u li jibqgħu validi u aġġornati mit-talbiet għall-informazzjoni tal-ICAAP u l-ILAAP imwettqa f'konformità mal-paragrafi 14 u 15.

Fejn l-oġġetti tal-informazzjoni jkunu disponibbli f'livell granulari ħafna, l-awtoritajiet kompetenti jistgħu jippermettu lill-istituzzjonijiet biex ma jissottomettux inkluż kull dokument disponibbli fir-rigward tal-oġġetti tal-informazzjoni meħtieġa. Meta tiġi eskluża informazzjoni granulari bħal din mis-sottomissjonijiet, bħad-dokumenti ta' appoġġ fir-rigward tat-tabelli operattivi lokali, il-minuti tal-laqgħa u l-indikaturi tal-prestazzjoni prinċipali individwali, l-awtoritajiet kompetenti għandhom jiżguraw li l-istituzzjonijiet ipprovdew il-politiki ġenerali tagħhom li jirregolaw dawn l-oġġetti u li "fil-manwal tal-qarrej" semmew liema informazzjoni ġiet eskluża mis-sottomissjoni. L-awtoritajiet kompetenti għandhom, skont kif ikun xieraq, jeħtieġu eżempji ta' din l-informazzjoni. L-awtoritajiet kompetenti għandhom jiżguraw li d-data u d-dokumenti esklużi mis-sottomissjoni jistgħu madankollu jkunu meħtieġa, fejn dan ikun meħtieġ jew adegwat, inkluż għal raġunijiet ta' evidenzjar tal-konformità tal-istituzzjoni mar-rekwiżiti regolatorji.