4.1. Breithnithe ginearálta

Sonraítear sa teideal seo critéir chun samhail ghnó agus straitéis na hinstitiúide a mheasúnú. Is é cuspóir an mheasúnaithe seo ag údaráis inniúla tuiscint chuimsitheach a bhaint amach – i bpeirspictíochtaí reatha agus réamhbhreathnaitheacha – ar oibríochtaí na hinstitiúide, leochaileachtaí suntasacha atá ann cheana nó a d’fhéadfadh a bheith ann a shainaithint, ar leochaileachtaí iad is dóichí a mbeidh tionchar ábhartha acu ar an institiúid, agus fóntacht fhoriomlán a samhla gnó agus a straitéise gnó a mheas. I ndiaidh an mheasúnaithe seo, ba cheart d'údaráis inniúla na nithe seo a leanas a chinneadh:

• a. inmharthanacht shamhail ghnó reatha na hinstitiúide ar bhonn a cumas torthaí inghlactha a ghiniúint thar na 12 mhí ina dhiaidh sin;
• b. inbhuanaitheacht straitéis na hinstitiúide, ar bhonn a cumas torthaí inghlactha a ghiniúint thar thréimhse réamhbhreathnaithe 3 bliana ar a laghad, bunaithe ar a pleananna straitéiseacha agus a réamhaisnéisí airgeadais.

Ba cheart d'údaráis inniúla leas a bhaint as toradh an BMA chun tacú leis an measúnú ar gach gné eile SREP. Féadfaidh údaráis inniúla measúnú a dhéanamh ar ghnéithe sonracha den BMA, go háirithe an measúnú cainníochtúil ar an tsamhail ghnó, mar chuid den mheasúnú ar ghnéithe eile SREP (e.g. is féidir an struchtúr cistiúcháin a thuiscint mar chuid de na rioscaí maidir leis an measúnú leachtachta).

Ba cheart d’údaráis inniúla rioscaí comhshaoil, sóisialta agus rialachais (ESG) a chur san áireamh, agus tosaíocht á tabhairt do rioscaí aistrithe comhshaoil agus fisiceacha, agus an BMA á chur i gcrích acu, d’fhonn measúnú a dhéanamh ar na himpleachtaí straitéiseacha agus stuamachta a bhaineann leis na rioscaí sin do shamhail ghnó na hinstitiúide sa ghearrthéarma, sa mheántéarma agus san fhadtéarma.

Ba cheart d’údaráis inniúla an BMA a úsáid freisin chun measúnú a dhéanamh ar impleachtaí stuamachta na rioscaí ML/TF, atá nasctha le samhail ghnó na hinstitiúide. I ndáil leis sin, ba cheart go n-úsáidfeadh údaráis inniúla an t-ionchur ábhartha a fhaightear ó mhaoirseoirí AML/CFT chun a gcuid torthaí ó mhaoirseacht leanúnach a fhorlíonadh agus chun meastóireacht a dhéanamh ar cibé acu an iad nó nach iad is siocair le himní stuamachta a bhaineann le riosca ML/TF. I gcás ina léirítear sa mheasúnú go bhfuil imní stuamachta mar gheall ar shamhail ghnó na hinstitiúide a bhaineann le riosca ML/TF, ba cheart d’údaráis inniúla toradh an mheasúnaithe stuamachta ar an tsamhail ghnó a chomhroinnt leis an maoirseoir AML/CFT¹⁶ .

¹⁶ I gcomhréir le Treoirlínte Comhair AML/CFT ÚBE (ÚBE/GL/2021/15).

Chun BMA a sheoladh, ba cheart d’údaráis inniúla na foinsí faisnéise cainníochtúla agus cáilíochtúla seo a leanas ar a laghad a úsáid:

• a. plean/pleananna straitéiseacha na hinstitiúide le réamhaisnéisí don bhliain reatha agus don todhchaí, agus boinn tuisceana eacnamaíocha bunúsacha;
• b. tuairisciú airgeadais (e.g. brabús agus caillteanas - P&L, nochtadh clár comhardaithe);
• c. tuairisciú rialála (COREP, FINREP agus clár creidmheasa, i gcás ina bhfuil siad ar fáil);
• d. tuairisciú inmheánach (faisnéis bhainistíochta, lena n-áirítear – i gcás ina bhfuil sí ar fáil – ranníocaíocht leis an mbrabúsacht de réir línte gnó, pleanáil chaipitil, tuairisciú leachtachta, athléimneacht oibríochtúil, tuarascálacha riosca inmheánacha);
• e. pleananna téarnaimh;
• f. pleananna réitigh, lena n-áirítear obair agus torthaí an mheasúnaithe inréiteachta a chuir an t-údarás réitigh ar fáil i gcomhréir le hAirteagal 14 de Threoir 2014/59/AE;
• g. plean na hinstitiúide chun aghaidh a thabhairt ar rioscaí ESG, atá le hullmhú i gcomhréir le hAirteagal 76(2) de Threoir 2013/36/AE;
• h. tuarascálacha tríú páirtí (e.g. tuarascálacha iniúchta, tuarascálacha ó anailísithe cothromais/creidmheasa);
• i. staidéar/suirbhéanna macrastuamachta nó cobhsaíochtaí airgeadais ábhartha eile (m.sh ón gCiste Airgeadaíochta Idirnáisiúnta - CAI, údaráis agus institiúidí macrastuamachta, institiúidí Eorpacha).